WƖA YƖƖLAA 71 - WƖA TENIŊ

Nʋʋ sɩ hɩɛsa Wɩɩsʋlʋŋ

¹ La Tɩɩna, ŋ nɛ mɩ yuori, sɩ́ leŋe dɩ hɩɩsɩŋ diimi.

² Ŋ ŋaa tʋɔpʋl Tɩɩna nɛ, laamɛ ta. Jegile nɩɩ mɩ teeŋ a laamɛ ta.

³ Ŋ nagɛ bʋŋ nɛ mɩ teeŋ mɩ yuori, lee-la mɩ sɩ jaŋ wuo mʋ bʋa na-kala. Bʋla laamɛ ta, ŋ nagɛ bʋŋ nɛ mɩ teeŋ, ŋ nɛ mɩ dɩɩ-duoŋ.

⁴ Mɩ Wɩa, laamɛ ta nɩbɔŋŋɔɔ nɩsɩŋ lɛ, laamɛ ta tʋɔhɛɛ tɩmma-la sɩɩ ŋaa wʋbɔŋŋɔɔ nɩsɩŋ lɛ.

⁵ Mɩ Tɩɩna Wɩɩjarɩbakɔ, mɩ yɩɛlaa kala hɛ ŋ lɛ nɛ. Mɩ laaŋ dii nɛ mɩ bapʋɔsʋŋ kala lɛ.

⁶ A chɩŋ tapʋlɩɩ-la ba sɩ lʋlmɛ a kaa kɔ jɩnɩŋ, mɩ yɩɛlaa kala hɛ ŋ lɛ nɛ. Ŋ nɛ kɛmmɛ kaa kʋ lɩɩ mɩ naaŋ luoruŋ lɛ. Ŋɩɩ wɩaa, mɩ jaŋ dɛnnɩŋ bʋa na-kala.

⁷ Nɩaa yʋga nɛ aa to mɩ naabʋɔsʋŋ, bɛɛ wɩaa ŋ nɛ ŋaa mɩ dɩ-duoŋ mɩ yuori.

⁸ Tapʋlɩɩ na-kala mɩɩ dɛnnɩŋ nɛ, aa yɩrɛ ŋ yɩrɩ-balɩŋ.

⁹ Sɩ́ mɩ kire ta lɛɛlɛ mɩ sɩ hɩɛsa ŋ-la. Sɩ́ mɩ vɩa ta mɩ doluŋ sɩ dɛrɛ nɛ.

¹⁰ Mɩ dʋndɔŋŋɔɔ ka vʋʋrɛ mɩ wɩaa nɛ, baa chɛ dɩ ba kpʋmɛ nɛ.

¹¹ Ba sɩ, “Wɩa vɩaʋ ta nɛ, má leŋ dɩ la kire kɛnʋ. Nʋʋkala tuo dɩ ʋ laaʋ ta.”

¹² Mɩ Wɩa, mɩɩ sʋlʋŋ, sɩ́ dɩ-bolii hɛ. Kɔ lɩma mɩ Wɩa, a pɛ mɩ lɛ.

¹³ Leŋ dɩ nɩalɩŋ sɩɩ cheimi dii hɩɩsɩŋ a sʋʋ. Leŋ dɩ hɩɩsɩŋ dii nɩalɩŋ ma kala sɩɩ chɛ dɩ ba ŋaamɛ wʋbɔŋ.

¹⁴ Mɩ-na jaŋ joŋ mɩ yɩɛlaa hɛ ŋ lɛ bʋa na-kala. Mɩ jaŋ faasa dɩdɛnnɩŋ.

¹⁵ Tapʋlɩɩ kala mɩ jaŋ bʋl ŋ tʋɔpʋl wʋŋaalaa wɩaa, arɩ ŋɩɩ ŋ sɩ laa nɩaa tɩta. Ŋ tɩmba yʋga nɛ, mɩ paala bɩ ba niiŋ wuo jɩŋ.

¹⁶ Mɩ Tɩɩna Wɩɩjarɩbakɔ, mɩ jaŋ heele bʋl wʋduoru-la ŋ sɩ ŋaa. Ŋ dʋndʋŋa tʋɔpʋl wʋŋaalaa wɩaa nɛ mɩ jaŋ heele bʋl.

¹⁷ Mɩ Wɩa, ŋ dagɛmɛ mɩ hambiriŋ kala lɛ nɛ. Mɩ ha heelee bʋl wʋkpuŋkperisi-la ŋ sɩ ŋaa wɩaa nɛ arɩ jɩnɩŋ kala.

¹⁸ Mɩ Wɩa, mɩ hɩɛsa nɛ, mɩ nyuŋ pʋllɛ, sɩ́ mɩ vɩa ta. Leŋ dɩ mɩ ha heele bʋl ŋ dol-bal-la wɩaa a pɩ nɩalɩŋ ba ha sɩ jaŋ lʋl.

¹⁹ Mɩ Wɩa, ŋ tʋɔpʋl wʋŋaalaa paala jɩla teeli wɩa-nyuŋ ma kala nɛ. Wɩa, ŋ ŋaa wʋbalaa a yʋgɛ nɛ, nʋʋkala tuo a magɩŋ.

²⁰ Ŋ leŋe mɩ na hɛɛŋ nɛ woruŋ, ama ŋ jaŋ leŋ dɩ mɩ yaraa bɩra pɛ dɔŋɔ. Ŋ jaŋ kɛmmɛ lɛrɛ lɩɩsɛ buotuo-luŋuŋ deeŋ lɛ dɩ mɩ kɛŋ mɩɩsɩŋ.

²¹ Ŋ jaŋ leŋ dɩ mɩ ŋaa nɩbal, a leŋ dɩ mɩ bɩra kɛŋ tʋɔtɔrʋŋ.

²² Mɩ Wɩa, mɩ jaŋ du cheŋ a dɛnnɩŋ a tɩŋ ŋ wʋtɩtɩɩ wɩaa. Mɩ jaŋ du kɔnɛ a yɩɩ yɩɩlaa a dɛnnɛ ŋ-na Iziral tɩŋŋaa Wɩa sɩ bɩ disiniŋ kɛnɛ.

²³ Mɩ jaŋ yɩɩ yɩɩlaa a ŋaa goŋ arɩ tʋɔtɔrʋŋ a dɛnnɩŋ arɩ mɩ tʋɔŋ kala, a tɩŋ ŋ sɩ laamɛ ta.

²⁴ Tapʋlɩɩ-la kala mɩ jaŋ bʋl tʋɔpʋl wɩalɩŋ ŋ sɩ ŋaa a pɩ nɩaa. Ŋ leŋe nɩalɩŋ sɩɩ chɛ dɩ ba ŋaa wʋbɔŋŋɔɔ mɩ lɛ dii hɩɩsɩŋ nɛ, ba wɩaa vʋgʋmɛ.