WƖA YƖƖLAA 7 - WƖA TENIŊ

Yɩɩl-la Devit sɩ yɩɩ pɩ La Tɩɩna a mʋ tɩgɛ Kus sɩ ŋaa Bɛnjamɩŋ tɩɩna lɛ.

¹ Mɩ Tɩɩna Wɩa, mɩ kʋ yuoruŋ nɛ dɩ ŋ pɔmɛ a laamɛ ta. Lɩɩsɛmɛ nɩalɩŋ kala sɩɩ kirimi nɩsɩŋ lɛ.

² Dɩ ŋɩɩ dee, ba jaŋ kɛmmɛ pʋɔsɛ muno muno a nagɛ naachigiŋ sɩ yie kɛŋ kʋa pʋɔsɛ ŋɩɩ, ka nʋʋ jaŋ tuo dɩ ʋ laamɛ ta.

³ Mɩ Tɩɩna Wɩa, mɩ bɩ wɩɩ ŋaa chei, mɩ bɩ wɩɩkala jɩŋ.

⁴ Mɩ bɩ mɩ nandɔŋ kala joŋo yallɛ koo a yuo mɩ dʋndɔmɔ sɩ bɩ mɩ wɩɩ ŋaa.

⁵ Dɩ mɩ nɛ ŋaa wɩaa deemba kʋŋ, leŋ dɩ mɩ dʋndɔŋŋɔɔ kire kɛmmɛ, a nʋɔsɛmɛ bil tinteeŋ dɩ mɩ sʋʋ.

⁶ Mɩ Tɩɩna, sii arɩ baanɩŋ a ŋaa wɩɩ. Yuo mɩ dʋndɔmɔ-la sɩ faasa na baanɩŋ mɩ nyuŋ. Sii a leŋ dɩ wʋtɩtɩɩ chɩŋ.

⁷ Leŋ dɩ tinteyee nɩaa kala kʋ chɩna golluŋ, ka dɩ ŋ hɔŋ ŋ kuoru kpasa lɛ wɩa-nyuŋ dɩ-bolii aŋ bibemba.

⁸ La Tɩɩna, ŋ nɩɩ dii nʋʋkala sarɩya, dii mɩ ma sarɩya a dagɛ arɩ mɩ ŋaa tʋɔpʋl tɩɩna nɛ a bɩ wʋcheeli kala kɛnɛ.

⁹ Mɩ Wɩa, ŋ ŋaa tʋɔpʋl Tɩɩna nɛ, a jɩŋ nɩaa tʋɔbɩɩnaa arɩ ba wʋchɛɛlɛɛ. Leŋ dɩ nɩbɔŋŋɔɔ leŋ wʋbɔŋŋɔɔ ŋaanɩŋ aŋ pɔ tʋɔpʋl tɩŋŋaa.

¹⁰ Wɩa nɩɩ pɔmɛ, ʋ nɩɩ pɔ nɩalɩŋ kala sɩ kɛŋ tʋɔpʋla.

¹¹ Wɩa kɛŋ tʋɔpʋla nɛ a didii sarɩya, ʋ yie chichei nɩbɔŋŋɔɔ nɛ tapʋlɩɩ na-kala.

¹² Dɩ ba nɛ bɩ ba wʋbɔmɔ-la leŋe, Wɩa jaŋ taa ʋ tokobiiŋ a lɛrɛ ʋ toŋ a ŋaa siri.

¹³ La Tɩɩna ŋaa ʋ bayuori kɩaa sɩ kɛŋ huoŋ siri nɛ, ʋ ŋaa ʋ to-hɛŋŋɛɛ sɩɩ chol nyiniŋ siri nɛ.

¹⁴ Nɩɩ-la kala tʋɔŋ sɩ suo arɩ tʋɔbɩɩŋ bɔŋŋɔɔ yie ŋɩŋaa wʋbɔmɔ-la nɛ a nyɩnyɩɛ wɩaa.

¹⁵ Nɩdosunu-la yie lu buotuoŋ a bil nɩaa lɛ, a tɩtɩa gʋra tuu.

¹⁶ Wɩalɩŋ ba sɩ hɛ yie gʋra nyʋa ba nyuŋ lɛ. Ba tɩtɩa wʋbɔŋŋɔɔ nɛ gʋra yɛrɛ ba nyuŋ.

¹⁷ Mɩ jaŋ lɔllɛ La Tɩɩna a tɩŋ ʋ tʋɔpʋla wɩaa, a yɩɩ yɩɩlaa a dɛnnʋ, ʋ nɛ kɩɩ kʋŋkala.