WƖA YƖƖLAA 68 - WƖA TENIŊ

Yɩɩl-la Devit sɩ yɩɩ pɩ gɔgʋ-hɩaŋ.

¹ Wɩa, sii ŋaa wɩɩ a kɛŋ ŋ dʋndɔŋŋɔɔ pɩsɛ. Leŋ dɩ ba mɩɩra fá ŋ sɩpaaŋ.

² Ŋmooba pɩsɛ a nagɛ peliŋ sɩ ŋmoo nyʋɔsʋŋ pɩsɛ. Wɩa, leŋ dɩ nɩbɔŋŋɔɔ lɛl ŋ sɩpaaŋ a nagɛ nyiniŋ sɩ dii keliŋ ʋ ŋmɩɛrɛ.

³ Ama leŋ dɩ tʋɔpʋl tɩŋŋaa tʋɔŋ tɔrɛ, dɩ ba jʋjʋɔsɛ ŋ sɩpaaŋ.

⁴ Má yɩɩ yɩɩlaa pɩ Wɩa, má yɩɩ yɩɩlaa a dɛnnʋ. Ʋ sagɛ duoŋ-bɩlɩmbaanaa nyuŋ nɛ. Ʋ yɩrɩŋ nɛ La Tɩɩna, maa jʋɔsɛ ʋ sɩpaaŋ.

⁵ Wɩa hɛ ʋ dɩɩ-bal-la sɩ bɩ disiniŋ kɛnɛ lɛ nɛ. Ʋ nɛ ŋaa biisinsiŋ nyɩmma, ʋ nɩɩ beŋ yo-haalaa ma.

⁶ Wɩa, ŋ nɛ leŋe nɩalɩŋ fa sɩ hɔŋ ba dʋndʋŋ kɛŋ dɩa nɩaa. Ŋ nɛ laa nɩalɩŋ ba sɩ kaa tɔ dɩa ta, ba tʋɔŋ tɔrɛ ba yɩyɩɩ yɩɩlaa. Ama nɩalɩŋ sɩ bɩ ŋ niiŋ ka to jaŋ hɛ tintee-hɩlɩŋ sɩ faasa lɩŋ lɛ.

⁷ Wɩa, ŋ sɩ laa ŋ nɩaa sɩpaaŋ a kɛmba vɛŋ tintee-hɩlɩŋ tʋɔŋ,

⁸ tinteeŋ zigile nɛ, duonuŋ nɩɩ ŋ sɩpaaŋ. Ŋ nɛ ŋaa Sɩnaɩ peel-la Wɩa, ŋ nɛ Iziral tɩŋŋaa Wɩa.

⁹ Ŋ tinteeŋ fa sɩ hɩla, ŋ leŋe duonuŋ nɩɩ nɛ, leriŋ fɩɛlɛ.

¹⁰ Ŋ nɩaa hɔŋ nɩmɛ nɛ, ŋ pɩ summoo kɩalɩŋ ba sɩɩ chɛ nɛ a tɩŋ ŋ zile sɩ yʋga wɩaa.

¹¹ La Tɩɩna, ŋ sɩ bʋl wɩaa ŋɩɩ, ha-daŋ nɛ laaba heele bʋl:

¹² “Kuoroo arɩ ba laalɩyuoroo mɩɩra fá nɛ, aŋ ka haala-la sɩ hɛ dɩa lɛ kɛŋ kɩalɩŋ ba sɩ yuo laa kaa kpaa.

¹³ Ma sɩ paala faa pie-dɩɩsɩŋ lɛ ma, kokomo kɩŋkɛnsɩŋ taara tɔ nɛ arɩ hɔpʋla, ka ʋ pʋnaa tʋtʋl a nagɛ sɛlɩmɛ.”

¹⁴ Wɩɩjarɩbakɔ, ŋ fa ŋmoo kuoroo pɩsɛ ʋ nagɛ bʋrʋŋ sɩ tɔ peel-la ba sɩɩ yɩrɛ Zalɩmɔŋ nyuŋ nɛ.

¹⁵ Peele-la sɩ hɛ Basaŋ lɛ leŋie, a pɛ ŋaa peel-balaa ma.

¹⁶ Bɛɛ nɛ saa tɩɩ ma yaraa bibieri Zaayɔŋ peel-la lɛ? Peel-la La Tɩɩna sɩ lɩɩsa ʋ ŋaa ʋ dɩjʋʋlʋŋ, lee-la ʋ sɩ jaŋ hɛ a kaa mʋ wuu.

¹⁷ Wɩa laalɩyuori janɩŋ torukoba ŋaa bʋɩ bʋɩba nɛ. La Tɩɩna lɩɩ Sɩnaɩ peel-la lɛ nɛ a kʋ jʋʋ ʋ dɩɩ-bal-la.

¹⁸ La Tɩɩna Wɩa, ŋ sɩɩ jɩl peel-la nyuŋ, ŋ pɛ kɛsɛ nɩalɩŋ ba sɩ yuo dii laalɩŋ lɛ nɛ, nɩaa pɩŋ zile kɩaa. Nɩalɩŋ sɩ paala bɩ ŋ niiŋ lɛ ka to ma pɩŋ zile kɩalɩŋ nɛ. Nɩmɛ nɛ ŋ jaŋ hɔŋ.

¹⁹ Má dɛnnɛ La Tɩɩna Wɩa sɩ ŋaa la Laataara. Ʋ nɛ laa la wʋwalɩmaa a chʋchʋŋ tapʋlɩɩ kala.

²⁰ La Wɩa nɛ ŋaa Laataara, Wɩa nɛ laa nɩaa tɩta sʋʋŋ nɩsɩŋ lɛ.

²¹ Wɩa sɛnɛ jaŋ yɛrɛ ʋ dʋndɔŋŋɔɔ nyusuŋ, nɩalɩŋ sɩ pɛsɛ a ŋɩŋaa wʋbɔŋŋɔɔ.

²² La Tɩɩna bʋla, “Mɩ jaŋ kɛmba kaa lɩɩ Basaŋ lɛ. Mɩ jaŋ kɛmba lɩɩ mʋgʋ-balɩŋ bʋbʋɔŋ a kʋ lɩɩ,

²³ dɩ ŋ wuo kɛŋ ba chalɩŋ a sɔŋ ŋ naasɩŋ, ka dɩ ŋ vasɩŋ ma lenni ba chalɩŋ.”

²⁴ Wɩa, la na ŋ nɩaa dɩ ba pʋɔla nɛ. La Wɩa arɩ la kuoro, ŋ nɩaa pʋɔla mʋmʋ ŋ dɩɩ-balɩŋ nɛ.

²⁵ Nɩalɩŋ sɩɩ yɩɩ yɩɩlaa nɛ laa sɩpaaŋ, kʋduuroo tuto, ka hantolibiisiŋ hɛ ba pɛgɛ a chɩchɩgɩsɛ chɩnchɩgɩsɩŋ.

²⁶ Wɩa nɩaa, má dɛnnɛ Wɩa dɩ ma nɛ hilime, Má Iziral tɩŋŋaa kala, má dɛnnɛ La Tɩɩna.

²⁷ Bɛnjamɩŋ doho nɩaa nɛ muuro ba doho doho kala tʋɔŋ, ba nɛ laa sɩpaaŋ. Juda doho nɩaa sɩpaalaaraa tɩtɩgɛ. Ŋɩɩ nɛ Zebuluŋ arɩ Nafɩtalɩ doho nɩaa sɩpaalaaraa ma tuto.

²⁸ Wɩa, bɩra dagɛla ŋ doluŋ arɩ ŋ fa sɩ laa sɩpaaŋ a ŋaa ŋɩɩ.

²⁹ Ŋaa dɩ kuoroo kɛŋ zile kɩaa kʋ pɩŋ, ŋ dɩɩ-bal-la sɩ hɛ Jerusalɛm lɛ.

³⁰ Dɔgɩsɛ Ijipiti tɩŋŋaa, ba nagɛ pʋna-la sɩ hɛ fuolo-ŋmʋlba tʋɔŋ nɛ. Dɔgɩsɛ tinteye-la nɩaa arɩ ba biiriŋ sɩ nagɛ nɛ-belliŋ. Leŋ dɩ ba pʋgʋmɛ a gbiene kɛŋ hɔpʋla kʋ ŋaa zile a pɩŋ. Kɛŋ tinteye-la nɩaa sɩ cho laalɩŋ yuonuŋ a pɩsɛ.

³¹ Ijipiti tɩŋŋaa arɩ Kus tɩŋŋaa sɩpaalaaraa jaŋ kɔ a dɛnnɛ Wɩa.

³² Dʋnɩa nɩaa kala, má yɩɩ yɩɩlaa a pɩ Wɩa, má dɛnnɛ La Tɩɩna.

³³ Ʋʋ zaarɛ wɩa-nyuŋ nɛ. Ʋ nɛ yie kpɩa goŋ arɩ yikori-balɩŋ ŋɩɩ.

³⁴ Má heele bʋl Wɩa doluŋ wɩaa, ʋ nɩɩ beŋ Iziral tɩŋŋaa. Ʋʋ dagɛ ʋ doluŋ wɩa-nyuŋ nɛ.

³⁵ Iziral tɩŋŋaa Wɩa kɛŋ fawʋllʋŋ nɛ ʋ dɩɩ-bal-la lɛ, ʋ nɛ leŋe la kɛŋ doluŋ. Má dɛnnɛ Wɩa.