WƖA YƖƖLAA 66 - WƖA TENIŊ

Yɩɩl-la ba sɩ yɩɩ pɩ gɔgʋ-hɩaŋ.

¹ Dʋnɩa nɩaa kala, má ŋaa goŋ arɩ tʋɔtɔrʋŋ a dɛnnɛ Wɩa.

² Má yɩɩ yɩɩlɩŋ a leŋ dɩ ʋ yɩrɩŋ yɩrɛ.

³ Má bʋla pɩ Wɩa, “Wɩɩkala ŋ sɩ ŋaa kɛŋ fawʋllʋŋ nɛ. Ŋ doluŋ yʋga, ŋɩɩ leŋ ŋ dʋndɔŋŋɔɔ gbigbieni ŋ sɩpaaŋ.

⁴ Dʋnɩa nɩaa kala kpirimi ŋ sɩpaaŋ nɛ, a yɩɩ yɩɩlaa dɩdɛnnɩŋ, a yɩɩ yɩɩlaa aa yɩrɛ ŋ yɩrɩŋ.”

⁵ Má kʋ na wɩalɩŋ Wɩa sɩ ŋaa, wʋkpuŋkperisi-la ʋ sɩ ŋaa a tɩŋ nuhuobiine wɩaa.

⁶ Ʋ leŋe mʋgʋ-balɩŋ lɩɩŋ hʋ nɛ aŋ ka tintee-hɩlɩŋ pɩŋ, la naabalɩmaba vɛŋ ʋ lɛ, a chol. Ŋɩɩ nɛ la tʋɔŋ tɔrɛ ʋ nyuŋ la jʋjʋɔsɛ.

⁷ Ʋ doluŋ nɛ ʋ kaa beŋ dʋnɩa nɩaa a kaa mʋ wuu. Tinteyee nɩaa sɩɩ ŋaa wɩalɩŋ kala, ʋʋ naba nɛ. Ŋɩɩ wɩaa nʋʋkala sɩ́ ʋ harɩŋ mɩɩrʋ.

⁸ Tinteyee nɩaa kala, má dɛnnɛ la Wɩa. Má leŋ dɩ nɩaa nɩɩ ma yikoro ma sɩɩ dɛnnʋ.

⁹ Ʋ nɛ pɔ la mɩɩsɩŋ a bɩ leŋe la sɩɛrɛ.

¹⁰ Wɩa, ŋ magɩsɛla a nagɛ ba sɩ joŋ hɔpʋla chɔ dɩ ba lɩɩsɛ hɔɔ-biiŋ nɛ.

¹¹ Ŋ leŋe la jʋʋ bɛrɛ nɛ, a joŋ hɛɛŋ kɩŋkɛŋ hɛ la lɛ.

¹² Ŋ leŋe nɩaa nʋɔsɛla nɛ, la na hɛɛŋ, a nagɛ nɩa sɩ jʋʋ nyiniŋ koo lɩɩŋ sɩ pɛllɛ paa nɩaa. Ama ŋ kɛŋ la kaa kʋ lɩɩ bil tinteeŋ sɩ jalɩa lɛ nɛ.

¹³ Mɩ jaŋ kɛŋ kʋnyɩgaa Wɩɩsʋlʋŋ kɩaa kʋ jʋʋ ŋ dɩɩ-balɩŋ a lɩɩsɛ niiri-la mɩ sɩ hɛ ŋ teeŋ.

¹⁴ Mɩ hɛ niiri-la bʋa-la lɛ wɩaa sɩ jʋʋmɛ nɛ.

¹⁵ Mɩ jaŋ kpʋ pʋsʋŋ sɩ zɔmɔ ŋ koru-la nyuŋ, pie-belliŋ, nɛ-belliŋ arɩ bʋʋnaa a ŋaa kʋnyɩgaa Wɩɩsʋlʋŋ pɩŋ.

¹⁶ Ma nɩalɩŋ kala sɩɩ fá Wɩa, má kɔ daha dɩ mɩ bʋl wɩalɩŋ kala ʋ sɩ ŋaa pɩmɛ a pɩma.

¹⁷ Mɩ ŋmoo niiŋ nɛ a pʋ dɩ ʋ pɛ mɩ lɛ, aŋ yɩɩ yɩɩlaa a dɛnnʋ.

¹⁸ Dɩ mɩ nɛ fa kɛŋ tʋɔbɩɩŋ bɔŋŋɔɔ, ʋ bɩ jaŋ laa mɩ sʋla.

¹⁹ Ama Wɩa jegile nɩɩ nɛ a laa mɩ sʋla.

²⁰ Mɩɩ dɛnnɛ Wɩa nɛ, ʋ bɩ mɩ sʋla vɩa, ʋ dagɛ ʋ chonuŋ pɩmɛ nɛ.