WƖA YƖƖLAA 57 - WƖA TENIŊ

Yɩɩl-la Devit sɩ yɩɩ pɩ gɔgʋ-hɩaŋ, bʋa-la ʋ sɩ fá dɩ ʋ laa ʋ mɩɩsɩŋ Sɔɔl nɩsɩŋ lɛ a mʋ jʋʋ bʋ-bʋa.

¹ Fá mɩ nenige, Wɩa, fá mɩ nenige mɩ kʋ yuoruŋ nɛ. Mɩ jʋʋ ŋ kɩŋkɛŋɛ nɛ dɩ ŋ tɔ hɛ mɩ lɛ, dɩ wʋlɔrʋŋ deeŋ bal.

² Wɩa sɩ kɩɩ kʋŋkala nɛ mɩ ŋmoo niiŋ pɩpa. Wɩa ʋ nɩɩ pɩmɛ mɩ wʋchɛɛlɛ-la sɩɩ tɔrɛ ʋ tʋɔŋ.

³ Ʋ jaŋ tɩŋ dɩ ba lɩɩ Wɩa-jaŋ a kʋ laamɛ ta, aŋ leŋ dɩ nɩalɩŋ sɩɩ yuomi jʋʋ wɩaa lɛ. Wɩa jaŋ dagɛ ʋ chono-la sɩ bɩ dɛrɛ arɩ ʋ wʋtɩtɩɩ.

⁴ Dʋndɔŋŋɔɔ gollimi nɛ a nagɛ naachigee losuŋ sɩ kɛnɛ, ba chɩchɛ nɩaa dɩ ba chaŋ. Ba nyɩlaa nagɛ tiŋŋee arɩ to-hɛŋŋɛɛ nɛ. Ba nandelimee ma nagɛ tokobiee sɩ kɛŋ niiŋ.

⁵ Wɩa, leŋ dɩ ŋ yɩrɩŋ sii kɩɩ wɩa-nyuŋ, dɩ ŋ tʋla su dʋnɩa lee na-kala.

⁶ Mɩ dʋndɔŋŋɔɔ hɛ bɛrɛ nɛ mɩ wombiiŋ lɛ, mɩ tʋɔŋ kala chei. Ba lu buotuoŋ nɛ bil mɩ lɛ. Ama ba tɩtɩa gʋra tuu nɛ.

⁷ Mɩ tʋɔbɩɩnaa chaasa chɩŋ nɛ, Wɩa, mɩ tʋɔbɩɩnaa chaasa chɩŋ nɛ. Mɩ jaŋ du kɩaa a yɩɩ yɩɩlaa a dɛnnɩŋ.

⁸ Mɩ jaŋ sii doŋ lɛ. Mɩ jaŋ sii sɩɩpʋʋraa a joŋ cheŋ arɩ kɔnɛ a du.

⁹ La Tɩɩna, mɩ jaŋ dɛnnɩŋ dɩ nʋʋkala nɩɩ. Tinteyee tʋɔŋ mɩ jaŋ yɩɩ yɩɩlaa pɩŋ.

¹⁰ Ŋ chonuŋ yʋga nɛ a teeli wɩa-nyuŋ kala, ŋ wʋtɩtɩɩ ma jɩla yi wɩa-nyuŋ.

¹¹ Wɩa, leŋ dɩ ŋ yɩrɩŋ sii kɩɩ wɩa-nyuŋ, dɩ ŋ tʋla su dʋnɩa lee na-kala.