WƖA YƖƖLAA 56 - WƖA TENIŊ

Yɩɩl-la Devit sɩ yɩɩ pɩ gɔgʋ-hɩaŋ bʋa-la lɛ Fɩlɩsɩtɩa tɩŋŋaa sɩ kɛnʋ Gaf lɛ.

¹ Wɩa, fá mɩ nenige bɛɛ wɩaa baa yuomi nɛ, mɩ dʋndɔŋŋɔɔ kirimi ŋɩɩ nɛ deeŋ deeŋ wɩa tuu jʋʋ.

² Nɩalɩŋ sɩɩ chei mɩ yɩrɩŋ kire to mɩ harɩŋ nɛ tapʋlɩɩ-la kala, nɩ-daŋ nɛ ŋmoo bɔyɛ a yuyuomi.

³ Ama dɩ fawʋllʋŋ nɛ paala kɛmmɛ ma, mɩ ha jaŋ laaŋ dii.

⁴ Mɩ Wɩa, mɩɩ dɛnnɩŋ a tɩŋ ŋ niiŋ wɩalɩŋ wɩaa. Mɩ laaŋ dii nɛ, mɩ bɩ fawʋllʋŋ ka fá. Bɛɛ kʋŋ nɛ nuhuobiine jaŋ wuo ŋaa mɩ lɛ?

⁵ Tapʋlɩɩ-la kala mɩ dʋndɔŋŋɔɔ chɛ dɩ ba na mɩ wʋcheeliŋ nɛ, a bɩbɩɩnɛ ŋɩɩ ba sɩ jaŋ to a ŋaamɛ wʋbɔŋ.

⁶ Ba yie vʋʋrɛ nɛ a faa bibeŋ mɩ naavɛnɛɛ, a chɩchɛ wombiiŋ dɩ ba kpʋmɛ.

⁷ Wɩa, ba sɩ chei wɩaa deemba, sɩ́ leŋe dɩ ba na wombiiŋ fá, na baanɩŋ a chei tinteye-la nɩaa.

⁸ Ŋ jɩŋ tapʋlɩa-la mɩ sɩ gɔllɔ baarɛ nɛ, a na mɩ sɩlɩɩrɩŋ ma sɩ lɩɩ magɛ ŋɩɩ. Ŋ paa su ŋ kpaalɩŋ nɛ a ŋmʋnsɛ ba niiŋ bil.

⁹ Dɩ mɩ nɛ yɩrɩŋ dɩ ŋ pɛ mɩ lɛ, mɩ dʋndɔŋŋɔɔ jaŋ mɩɩrɛ harɩŋ. Dɩ ŋɩɩ nɛ ŋaa, mɩ jaŋ jɩŋ arɩ ŋ-na Wɩa chɩŋ mɩ harɩŋ nɛ.

¹⁰ Mɩ Wɩa, mɩɩ dɛnnɩŋ a tɩŋ ŋ niiŋ wɩalɩŋ wɩaa. Ŋ-na mɩ Tɩɩna niiŋ wɩalɩŋ wɩaa, mɩɩ dɛnnɩŋ.

¹¹ Mɩ laaŋ ŋ-na Wɩa dii nɛ, mɩ bɩ fawʋllʋŋ ka fá. Bɛɛ kʋŋ nɛ nuhuobiine jaŋ wuo ŋaa mɩ lɛ?

¹² Mɩ Wɩa, mɩ jaŋ lɩɩsɛ nii-la mɩ sɩ hɛ a pɩŋ. Mɩ jaŋ kɛŋ Wɩɩsʋlʋŋ kɩaa kʋ lɔllʋŋ.

¹³ Ŋ laamɛ ta nɛ mɩ bɩ sʋba, a pɔmɛ mɩ sɩ tele. Ŋɩɩ wɩaa mɩ jaŋ vɛŋ ŋ-na Wɩa sɩpaaŋ pʋlʋŋ-la sɩɩ pɩ nɩaa mɩɩsɩŋ lɛ.