WƖA YƖƖLAA 53 - WƖA TENIŊ

Yɩɩl-la Devit sɩ yɩɩ pɩ gɔgʋ-hɩaŋ.

¹ Nɩyaaraa nɛ yie bʋl ba tʋɔŋ lɛ, “Wɩa tuo.” Ba bɩ wʋtɩtɩɩ kɛnɛ, ba wʋŋaalaa lɔrɔ. Nɩbala ma paala tuo a ŋɩŋaa wɩaa ba bʋa lɛ.

² Wɩa hɛ ʋ jaŋ lɛ nɛ aŋ beŋ dɩ ʋ naa wʋjɩnnʋ hɛ tinteeŋ lɛ a ŋaa wɩaa chɩchɛ dɩ ʋ jɩŋ ʋ-na Wɩa.

³ Ama nʋʋkala yeŋŋe nɛ ba bɩ wʋtɩtɩɩ kɛnɛ. Nɩbala ma paala tuo a ŋɩŋaa wɩaa ba bʋa lɛ. Nʋʋ tuo.

⁴ Nɩbɔmɔ, ma-na bɩ wɩaa wuo gʋnnaa pɩ ma tɩtɩa koo? Ma vɩa dɩ ma chʋɔlɛmɛ nɛ, aŋ gɔllɔ kɛsɛ mɩ nɩaa liliŋ a nagɛ kʋdiilee.

⁵ Ama fawʋllʋŋ jaŋ kɛmma a kɩɩ faafaa-la. Wɩa jaŋ leŋ dɩ ʋ nɩaa dʋndɔŋŋɔɔ haŋgbelee pɩsɛ. Ʋ vɩaba ta nɛ. Ma-na Iziral tɩŋŋaa jaŋ yuo diiba dɩ hɩɩsɩŋ kɛmba.

⁶ Mɩ Wɩɩsʋlʋŋ nɛ, dɩ nʋʋ fa lɩɩ Zaayɔŋ a kʋ laa Iziral tɩŋŋaa ta. Dɩ Wɩa nɛ bɩra leŋe dɩ wɩaa vɛŋ woruŋ a pɩ ʋ nɩaa, Jekɔb dɩa nɩaa jaŋ jʋɔsɛ, Iziral tɩŋŋaa tʋɔŋ jaŋ tɔrɛ.