WƖA YƖƖLAA 52 - WƖA TENIŊ

Yɩɩl-la Devit sɩ yɩɩ pɩ gɔgʋ-hɩaŋ bʋa-la lɛ Ɛdɔm tɩŋŋaa Duɛg sɩ mʋ bʋla pɩ Sɔɔl arɩ Devit mʋ Ahɩmɛlɛk dɩa.

¹ Nɩbal, bɛɛ nɛ tɩɩ ŋ bibigisi ŋ wʋbɔŋŋɔɔ lɛ? Bɛɛ nɛ tɩɩ ŋ bibigisi ŋ tɩtɩa lɛ tapʋlɩɩ kala aŋ bɩ jɩŋ dɩ ŋ ŋaa nʋʋ sɩ dii hɩɩsɩŋ nɛ Wɩa sɩpaaŋ?

² Ŋ yie chɩchɛ wombiiŋ dɩ ŋ chei ŋ dɔnsʋŋ tɩŋŋaa nɛ, a gɔllɔ nyɩnyɩɛ wɩaa. Ŋ niiŋ wʋbʋlaa didii a nagɛ nyu-fʋna.

³ Ŋ cho wʋbɔmʋŋ nɛ a kɩɩ wʋzɔmʋŋ, a cho wʋnyɩɛrɩŋ ma a kɩɩ wʋtɩtɩɩ.

⁴ Ŋ cho dɩ ŋ bʋl wɩaa jʋjʋʋ nɩaa lɛ nɛ, ŋ-na wʋnyɩɛrʋ.

⁵ Wɩa jaŋ cheyiŋ a kaa mʋ wuu. Ʋ jaŋ kɛnɩŋ lɛrɛ lɩɩ ŋ dɩa lɛ. Ʋ jaŋ lɩɩsɩŋ dʋnɩa lɛ.

⁶ Tʋɔpʋl tɩŋŋaa jaŋ na wɩɩŋ deeŋ dɩ fawʋllʋŋ kɛmba, ba jaŋ mɔmʋŋ aŋ bʋl,

⁷ “Má bee na nɩɩ-la sɩ bɩ Wɩa joŋo ʋ ŋaa ʋ dɩ-duoŋ aŋ joŋ ʋ yɩɛlaa hɛ ʋ dʋa lɛ, a kɛŋ doluŋ a chichei ʋ dɔnsʋŋ tɩŋŋaa.”

⁸ Ama mɩ-na nagɛ tɩa-la ba sɩɩ yɩrɛ Olif nɛ a hɛ Wɩa dɩa lɛ a tʋtɔsɛ. Mɩ laa Wɩa chono-la sɩ bɩ dɛrɛ a dii nɛ a kaa mʋ wuu.

⁹ Mɩ jaŋ lɔllɛ ŋ-na Wɩa bʋa na-kala a tɩŋ wɩalɩŋ ŋ sɩ ŋaa wɩaa. Mɩ joŋ mɩ yɩɛlaa hɛ ŋ yɩrɩ-la lɛ nɛ, bɛɛ wɩaa ʋ zɔmɔ. Mɩ jaŋ dɛnnɩŋ dɩ ŋ nɩaa nɛ hilime.