WƖA YƖƖLAA 51 - WƖA TENIŊ

Yɩɩl-la Devit sɩ yɩɩ pɩ gɔgʋ-hɩaŋ bʋa-la lɛ ʋ sɩ kɛŋ Bafɩsɛba pɩŋ, ŋɩɩ harɩŋ lɛ Wɩa wʋlaabʋlla Netaŋ kʋ bʋl ʋ teeŋ.

¹ Wɩa, ŋ chonuŋ sɩ bɩ dɛrɛ wɩaa, mɩɩ sʋlʋŋ, fá mɩ nenige. Ŋŋ fá nɩaa nenige kɩŋkɛŋ nɛ. Mɩɩ sʋlʋŋ, joŋ mɩ wʋbɔmɔ-la chɛmɛ.

² Chɛsɛ mɩ wʋbɔŋŋɔɔ kala ta, aŋ sɩ́ leŋe dɩ mɩ kɛŋ disiniŋ.

³ Mɩ jɩŋ mɩ wʋbɔŋŋɔɔ kala nɛ, ba hɛ mɩ tʋɔŋ lɛ nɛ bʋa na-kala.

⁴ Mɩ chaasa ŋaa wʋbɔŋ nɛ ŋ lɛ. Mɩ ŋaa wɩɩ-la sɩ bɩ zɔŋ nɛ ŋ lɛ. Ŋ kɩaa sɩma nɛ a magɛ dɩ ŋ bʋl mɩ teeŋ, a diimi sarɩya a dɔgɩsɛmɛ.

⁵ Mɩ ŋaa wʋbɔŋ ŋaarʋ nɛ, a chɩŋ bʋa-la lɛ mɩ naaŋ sɩ kɛŋ mɩ luoruŋ a lʋlmɛ a kaa kɔ jɩnɩŋ mɩ ŋaa wʋbɔŋŋɔɔ nɛ.

⁶ Ŋŋ chɛ dɩ mɩ kɛŋ wʋtɩtɩɩ nɛ mɩ tʋɔŋ lɛ, ŋɩɩ wɩaa, dagɛmɛ wʋjɩmɩŋ.

⁷ Pɩɩsɛ mɩ wʋbɔŋ-la ta, dɩ mɩ sɩ́ disiniŋ kɛŋ, aŋ chɛsɛmɛ dɩ mɩ pʋllɛ a kɩɩ kuŋkunuŋ.

⁸ Mɩ tʋɔŋ fa sɩ faasa chei ŋɩɩ, leŋ dɩ mɩ tʋɔŋ bɩra tɔrɛ dɩ mɩ jʋjʋɔsɛ.

⁹ Sɩ́ mɩ wʋbɔŋŋɔɔ beŋ. Chɛsɛ mɩ wʋbɔŋŋɔɔ kala ta.

¹⁰ Mɩ Wɩa, leŋ dɩ mɩ kɛŋ tʋɔpʋla, a wasa chɩŋ mɩ wʋtɩtɩɩ naaŋ lɛ.

¹¹ Sɩ́ mɩ kiru ŋ sɩpaaŋ, sɩ́ ŋ Dɩŋ-zɔmʋŋ kaa laa mɩ teeŋ.

¹² Ŋaa dɩ mɩ tʋɔŋ bɩra tɔrɛ a nagɛ bʋa-la lɛ ŋ sɩ laamɛ ta. Leŋ dɩ mɩ cho dɩ mɩ to ŋ niiŋ.

¹³ Dɩ ŋ nɛ ŋaa ŋɩɩ, mɩ jaŋ dagɛ wʋbɔŋ ŋaaraa ŋ wombiee, dɩ ba mɩɩra kɔ ŋ teeŋ.

¹⁴ Wɩa, lɩɩsɛmɛ nɩaa kpʋnʋŋ lɛ, ŋ nɛ ŋaa mɩ Laataara. Dɩ ŋ nɛ ŋaa ŋɩɩ, mɩ jaŋ yɩɩ yɩɩlaa a dagɛ ŋ tʋɔpʋla.

¹⁵ La Tɩɩna, pɛ mɩ lɛ dɩ mɩ wuo bʋbʋl wɩaa woruŋ, dɩ mɩ suri mɩ niiŋ a dɛnnɩŋ.

¹⁶ Ba sɩ kpʋ pʋsʋŋ a sʋl Wɩɩsʋlʋŋ arɩ kʋnyɩgaa Wɩɩsʋlʋŋ dee ŋ chɩchɛ. Dɩ ŋ nɛ faa chɛba, mɩ fa jaŋ ŋaa pɩŋ.

¹⁷ Wɩɩsʋlɩɩ-la ŋ sɩɩ chɛ nɛ, dɩ la leŋ la tʋɔŋ faasa chei la wʋbɔŋŋɔɔ lɛ, dɩ la kɛŋ la tɩtɩa muuri. Wɩɩsʋlʋŋ deeŋ doho nɛ ŋ-na Wɩa chɩchɛ.

¹⁸ La Tɩɩna, leŋ dɩ ŋ tʋɔŋ tɔrɛ Zaayɔŋ nyuŋ, dɩ ŋ pɛ ʋ lɛ, a wasa saa Jerusalɛm jeyee.

¹⁹ Ŋɩɩ lɛ nɛ la jaŋ kpʋ pʋsʋŋ a ŋaa tʋɔpʋl Wɩɩsʋlʋŋ arɩ la kʋnyɩgaa Wɩɩsʋlɩɩ-la sɩ jaŋ tɔrɛ ŋ tʋɔŋ. La jaŋ kpʋ nɛ-belliŋ a ŋaa Wɩɩsʋlʋŋ ŋ koruŋ nyuŋ.