WƖA YƖƖLAA 5 - WƖA TENIŊ

Yɩɩl-la Devit sɩ ŋmʋʋ ŋmʋlʋŋ a yɩɩ pɩ gɔgʋ-hɩaŋ.

¹ La Tɩɩna, kpil dɩgɩlɩŋ a nɩɩ mɩ wʋbʋlaa. Jegile nɩɩ mɩ hʋʋna.

² Mɩ kuoro arɩ mɩ Wɩa, jegile nɩɩ mɩ nii-ŋmobo a pɛ mɩ lɛ. Ŋ nɛ mɩ sʋsʋl.

³ La Tɩɩna, chʋchʋɔ na-kala ŋ yie nɩɩ mɩ yikoro nɛ. Mɩ yie bʋl wɩalɩŋ kala mɩ sɩɩ chɛ nɛ a pɩŋ, aŋ gbɛrɛ dɩ mɩ nɩɩ wɩɩ-la ŋ sɩ jaŋ bʋla pɩmɛ.

⁴ Ŋ nɛ Wɩa a bɩ wʋbɔŋŋɔɔ cho. Ŋ dɩ nɩbɔŋŋɔɔ bɩ jaŋ wuo jʋʋ.

⁵ Nɩalɩŋ sɩɩ dagɛ ba tɩtɩa bɩ ŋ-na mɩ Tɩɩna sɩpaaŋ wuo chɩŋ, ŋ bɛrɛ nɩbɔŋŋɔɔ nɛ.

⁶ Ŋ yie chei nɩalɩŋ sɩɩ nyɩɛ wɩaa nɛ, aŋ bɛrɛ nɩkpʋʋraa arɩ nɩalɩŋ sɩɩ nyɩsɛ nɩaa.

⁷ Ama a tɩŋ ŋ sɩ faasaa fá nɩaa nisusuŋ wɩaa, mɩ jaŋ kʋ jʋʋ ŋ dɩa-la sɩ zɔmɔ a bɩ disiniŋ kɛnɛ tʋɔŋ a kpirime ziliŋ.

⁸ Mɩ Tɩɩna, ŋ ŋaa tʋɔpʋl Tɩɩna nɛ, dagɛmɛ dɩ mɩ ŋaa wɩɩ-la ŋ sɩɩ chɛ. Leŋ dɩ ŋ wombiiŋ pʋlla pɩmɛ dɩ mɩ to, a tɩŋ mɩ dʋndɔŋŋɔɔ wɩaa.

⁹ Ba niiŋ wʋbʋlaa bɩ wʋtɩtɩɩ kɛnɛ. Ba yie chɩchɛ dɩ ba chei wɩaa nɛ. Ba wʋbʋlaa nagɛ bʋa-suruŋ sɩɩ sʋɔrɛ ŋɩɩ nɛ, ba bʋl wɩaa a nyɩnyɩsɛ nɩaa.

¹⁰ Mɩ Wɩa, joŋ cheeriŋ pɩba a dɔgɩsɛba. Leŋ ba tɩtɩa sɩ vʋʋrɛ wɩalɩŋ ŋaa dɩ ba tel. Kiriba ta ŋ sɩpaaŋ a tɩŋ ba wʋbɔŋ dandaŋ-la wɩaa, bɛɛ wɩaa ba vɩaŋ nɛ.

¹¹ Leŋ dɩ nɩalɩŋ sɩ kʋ yuoruŋ tʋɔŋ tɔrɛ, dɩ ba yɩɩ yɩɩlaa a jʋjʋɔsɛ bʋa na-kala. Chu tɔ nɩalɩŋ kala sɩ choŋ, a leŋ dɩ ba jʋjʋɔsɛ.

¹² La Tɩɩna, ŋŋ pɛ nɩalɩŋ sɩ kɛŋ tʋɔpʋla lɛ nɛ. Ŋ chonuŋ chu tɔba a nagɛ laalɩyuoroo sɩ kɛŋ hɔ-taala-la kɛrɛɛ laa bayuori hɛŋŋɛɛ nɛ.