WƖA YƖƖLAA 47 - WƖA TENIŊ

Yɩɩl-la Kora biiriŋ sɩ yɩɩ pɩ gɔgʋ-hɩaŋ.

¹ Má tinteyee nɩaa kala, má porisi nɩsaa a yɩɩ yɩɩlaa a ŋaa goŋ arɩ tʋɔtɔrʋŋ dɛnnɛ Wɩa.

² Ʋ maga dɩ ma fá La Tɩɩna sɩ kɩɩ kʋŋkala nɛ, ʋ nɛ kuoru-balɩŋ sii beŋ dʋnɩa kala.

³ Ʋ leŋe la yuo dii nɩaa nɛ a bibeŋ tinteyee.

⁴ Ʋ nɛ joŋ tintee-la la sɩ kaa ŋmoo bɔyɛ pɩ la naabalɩma Jekɔb, nɩɩ-la ʋ sɩ cho.

⁵ Wɩa jɩla hɔŋ ʋ kuoru kpasa nyuŋ nɛ, La Tɩɩna hɔnɔ nɛ, ka nɩaa ŋmʋŋmʋʋ nyilliŋ aŋ ŋɩŋaa goŋ.

⁶ Má yɩɩ yɩɩlaa a dɛnnɛ Wɩa, má yɩɩ yɩɩlaa a dɛnnɛ la kuoro.

⁷ Wɩa nɛ kuoro dʋnɩa kala lɛ, má yɩɩ yɩɩlaa a dɛnnʋ.

⁸ Wɩa hɔŋ ʋ kuoru kpasa sɩ bɩ disiniŋ kɛnɛ nyuŋ nɛ, ʋ nɩɩ beŋ tinteyee nɩaa.

⁹ Tinteyee sɩpaalaaraa kala kʋ hilimi nɛ a lɛɛlɛ ŋaa Abɩraham Wɩa nɩaa. Wɩa nɛ tɩɩ dʋnɩa kuoroo kala, ʋ yɩrɩŋ jaŋ yɩrɛ.