WƖA YƖƖLAA 44 - WƖA TENIŊ

Yɩɩl-la Kora biiriŋ sɩ yɩɩ pɩ gɔgʋ-hɩaŋ.

¹ La Wɩa, la nɩɩ ŋ wɩaa nɛ, la naabalɩmaba bʋl wɩalɩŋ ŋ sɩ ŋaa faafaa kala pɩla nɛ, bʋa-la ba fa sɩ hɛ ba mɩɩsɩŋ lɛ la nɩɩba woruŋ.

² Ŋ kɛŋ ŋ naduo-la nɛ kiri tinteyee nɩaa ta aŋ leŋ la naabalɩmaba hɔŋ ba tinteeŋ lɛ. Ŋ leŋe wɩaa jʋʋ nɩalɩŋ nɛ, ka la naabalɩmaba dʋa woruŋ.

³ Ba laalɩyuori kɩaa dee ba kaa yuo laa tintee-la, ba doluŋ ma dee ba kaa yuo dii. Ŋ choba nɛ tɩɩ ŋ kɛŋ ŋ naduoŋ arɩ ŋ tʋla pʋlʋmʋŋ ŋaa ŋɩɩ pɩba.

⁴ Ŋ nɛ mɩ kuoro arɩ mɩ Wɩa, ŋ nɛ leŋe ŋ nɩaa yuo laalɩŋ didii.

⁵ Ŋ doluŋ lɛ nɛ la yuo dii la dʋndɔŋŋɔɔ, a nʋɔsɛba bil ŋ yɩrɩŋ lɛ.

⁶ Mɩ bɩ mɩ yɩɛlaa joŋo hɛ mɩ toŋ arɩ mɩ tokobiiŋ lɛ nɛ, ba dee bɩ leŋe mɩ yuo dii.

⁷ Ama ŋ nɛ leŋe la yuo dii la dʋndɔŋŋɔɔ, a leŋ ba dii hɩɩsɩŋ.

⁸ Wɩa, ŋ nɛ la kaa ŋmoo bɔyɛ bʋa kala lɛ, la jaŋ dɛnnɩŋ a kaa mʋ wuu.

⁹ Ama lɛɛlɛ ŋ vɩala ta nɛ a kɛnla muuri, ŋ bɩra bɩ la laalɩyuoroo sɩpaaŋ laa a kɛnla mʋmʋ laalɩŋ.

¹⁰ Ŋ leŋe la dʋndɔŋŋɔɔ kirila nɛ, la fá, ka ba paa la kɩaa.

¹¹ Ŋ joŋ la ta nɛ ba kpʋla a nagɛ piesee, ŋ kɛnla pɩsa guoli tinteyee lɛ.

¹² Ŋ joŋ ŋ nɩaa yallɛ nɛ, aŋ bɩ nyʋʋrɩɩ kala na.

¹³ Ŋ leŋe la ŋaa mɔmɩa nɛ nɩalɩŋ sɩ jʋʋ kpɩkpagɛla teeŋ. Tinteye-la sɩ gollila ma sisieri la lɛ.

¹⁴ Tinteye-la ma tʋɔŋ la sɩ guolo, ŋ leŋe la nagɛ mɔmɩa nɛ ba teeŋ, ba mɔmɔ duduuri.

¹⁵ Tapʋlɩɩ kala hɩɩsɩŋ yie kɛmmɛ nɛ, mɩ bɩ mɩ sɩaa wuo kaa suri,

¹⁶ a tɩŋ mɩ dʋndɔmɔ-la sɩɩ sieri mɩ lɛ aŋ mʋmɔmmɛ, a joŋ ba baanɩŋ aa fɩɩsɛ mɩ lɛ.

¹⁷ La bɩ ŋ wɩaa yʋa koo a kɛŋ nii-la sɩ hɛ la dɩŋ pɛgɛ chei, ka wɩaa deemba kala ha ŋaa la lɛ.

¹⁸ La tʋɔŋ kala hɛ ŋ lɛ nɛ, la bɩ begile ŋ wombiiŋ lɛ.

¹⁹ Ka ŋ kirila ta la ŋaa nɩpɛɩba a guoli baga kɩaa tʋɔŋ a hɛ birimiŋ lim lɛ.

²⁰ Dɩ la nɛ fa yʋ ŋ wɩaa, aŋ kpʋkpaarɛ vesiŋ,

²¹ ŋ-na Wɩa fa jaŋ jɩŋ, bɛɛ wɩaa ŋ jɩŋ nuhuobiine tʋɔbɩɩnaa kala nɛ.

²² Tapʋlɩɩ kala nɛ la sʋsʋʋ ŋ wɩaa. La nagɛ piesee ba sɩ kaa lɩɩ dɩ ba kpʋ nɛ.

²³ Sii doŋ lɛ, La Tɩɩna, bɛɛ nɛ tɩɩ ŋ pɩŋ? Sii, sɩ́ la vɩa ta deeŋ deeŋ.

²⁴ Bɛɛ nɛ tɩɩ ŋ kɛŋ ŋ tɩtɩa faala, a yʋ la wʋjʋʋlaa arɩ la hɛɛŋ wɩaa?

²⁵ Ba nyagɛla bil tinteeŋ nɛ, la yaraa kala ŋaa kʋŋkɔlʋŋ.

²⁶ Sii, a pɛ la lɛ, laala ta a tɩŋ ŋ chono-la sɩ bɩ dɛrɛ wɩaa.