WƖA YƖƖLAA 41 - WƖA TENIŊ

Yɩɩl-la Devit sɩ yɩɩ pɩ gɔgʋ-hɩaŋ.

¹ La Tɩɩna jaŋ pɛ nɩalɩŋ sɩɩ beŋ summoo nyuŋ woruŋ. Dɩ wɩaa nɛ jʋʋba, ʋ jaŋ lɩɩsɛba.

² La Tɩɩna jaŋ chu tɔba a leŋ dɩ ba kɛŋ mɩɩsɩŋ. Ʋ jaŋ leŋ dɩ ba kɛŋ tʋɔtɔrʋŋ tintee-la lɛ. Ʋ bɩ jaŋ jomba hɛ ba dʋndɔŋŋɔɔ nɩsɩŋ lɛ.

³ Dɩ ba nɩɩ wɩɩlʋ, La Tɩɩna jaŋ pɛ ba lɛ, a leŋ dɩ ba duori a kɛŋ yarɩfɩɛlaa.

⁴ Mɩ sɩ, “Mɩ Tɩɩna, mɩ ŋaa wʋbɔŋ nɛ ŋ lɛ, fá mɩ nenige aŋ vaarɛmɛ.”

⁵ Mɩ dʋndɔŋŋɔɔ bʋl wʋbɔŋŋɔɔ nɛ a tɩgɛ mɩ lɛ. Baa chɛ dɩ mɩ sʋʋ nɛ, dɩ nɩaa yʋ mɩ wɩaa.

⁶ Ba nɩalɩŋ sɩ kʋʋ namɛ bɩ nɩfɩɛma ŋaa. Ba bɩ wʋtɩtɩɩ ka bʋl, aa bɩɩnɛ tʋɔbɩɩŋ bɔŋŋɔɔ mɩ lɛ. Ba yie kʋ na mɩ wɩaa a kaa lɩɩ bʋla gaarɛ leriŋ kala.

⁷ Mɩ dʋndɔŋŋɔɔ munsoo bʋl mɩ wɩaa nɛ. Ba bɩɩnɛ wʋbɔŋŋɔɔ nɛ aa tɩgɛ mɩ lɛ, ba sɩ,

⁸ “Nyanyal-bɔŋ nɛ kɛnʋ, ʋ bɩ jaŋ waa.”

⁹ Mɩ nandɔŋ-fɩɛmɩŋ mɩ sɩ laa dii, mɩ dɩ ʋ didii kɩaa, ma paala vɩamɛ nɛ.

¹⁰ La Tɩɩna, fá mɩ nenige aŋ vaarɛmɛ, dɩ mɩ wuo tiŋ mɩ dʋndɔmɔ-la chɩmɩŋ.

¹¹ Mɩ jɩma ŋ tʋɔŋ tɔrɛ mɩ nyuŋ nɛ, mɩ dʋndɔŋŋɔɔ bɩ jaŋ wuo yuo diimi.

¹² Ŋ pɛ mɩ lɛ nɛ a leŋ mɩ hɛ ŋ sɩpaaŋ a kaa mʋ wuu, bɛɛ wɩaa mɩ bɩ wɩɩ ŋaa chei.

¹³ Má dɛnnɛ La Tɩɩna, Iziral tɩŋŋaa Wɩa a kaa mʋ wuu. Amɩɩ. Amɩɩ.