WƖA YƖƖLAA 40 - WƖA TENIŊ

Yɩɩl-la Devit sɩ yɩɩ pɩ gɔgʋ-hɩaŋ

¹ Mɩ nyalɩma nɛ a gbɛrɛ La Tɩɩna dɩ ʋ pɛ mɩ lɛ, ŋɩɩ nɛ ʋ jegile nɩɩ mɩ bunso.

² Ʋ lɛrɛ lɩɩsɛmɛ buotuo-luŋuŋ sɩɩ sɩɛrʋ lɛ nɛ, a kɛmmɛ lɩɩsɛ vʋchɔɔŋ lɛ a jɩla bil bʋŋ nyuŋ, mɩ chɩŋ kpaŋkpaŋ.

³ Ʋ dagɛmɛ yɩɩl-falɩŋ nɛ mɩ sɩ jaŋ yɩɩ a dɛnnʋ. Nɩ-daŋ jaŋ na a fá Wɩa, a laa La Tɩɩna dii.

⁴ Nɩalɩŋ sɩ laa La Tɩɩna dii, ʋ jaŋ pɛ ba lɛ. Ba bɩ nɩalɩŋ sɩɩ bigisi ba tɩtɩa lɛ harɩŋ ka to, a bɩ vesiŋ maa kpaarɛ.

⁵ Mɩ Tɩɩna Wɩa, ŋ ŋaa wʋkpuŋkperisiŋ yʋgɛ nɛ. Wɩalɩŋ ŋ ha sɩɩ bɩɩnʋ dɩ ŋ ŋaa pɩla, nʋʋ bɩ jaŋ wuo dɩɩsɛba. Dɩ mɩ nɩɩ chɛ mɩ dagɛba pɩ nɩaa, ba jaŋ yʋga kɩɩ dɩɩsɩŋ.

⁶ Ŋ bɩ pʋsʋ-la ba sɩ yie kpʋ ŋaa Wɩɩsʋlʋŋ arɩ Wɩɩsʋlʋŋ kɩalɩŋ nɛ cho. Ŋ bɩra bɩ kʋnyɩgaa Wɩɩsʋlʋŋ arɩ wʋbɔŋŋɔɔ joŋo chɛnɩŋ Wɩɩsʋlʋŋ kɩaa ma nɩɩ chɛ. Ama ŋŋ chɛ dɩ mɩ jegile nɩɩ ŋ niiŋ wɩaa nɛ a toba.

⁷ Ŋɩɩ nɛ mɩ bʋl, “Namɛ, mɩ kɔ nɛ dɩ mɩ ŋaa wɩalɩŋ ba sɩ ŋmʋnsa bil ŋ teniŋ tʋɔŋ a tɩgɛ mɩ lɛ.

⁸ Mɩ Wɩa, mɩ cho dɩ mɩ ŋaa wɩalɩŋ sɩɩ tɔrɛ ŋ tʋɔŋ nɛ. Wombii-la ŋ sɩ bile dɩ la tuto hɛ mɩ tʋɔŋ lɛ nɛ.”

⁹ La Tɩɩna, dɩ ŋ nɩaa nɛ yʋga a hilimi ŋ yɩrɩŋ lɛ, mɩ yie bʋl ŋ tʋɔpʋla wɩaa pɩba nɛ, ŋ jɩma mɩ bɩ mɩ niiŋ ka tɔrɛ.

¹⁰ Mɩ bɩ ŋ tʋɔpʋla wɩaa kaa fɩfaa. Mɩ yie leŋ nɩaa jɩŋ ŋɩɩ ŋ sɩ kɛŋ wʋtɩtɩɩ a laa nɩaa tɩta nɛ. Mɩ bɩ ŋ chono-la sɩ bɩ dɛrɛ arɩ ŋ wʋtɩtɩɩ wɩaa joŋo faa ŋ nɩalɩŋ sɩ yʋga aa hilimi ŋ yɩrɩŋ lɛ.

¹¹ La Tɩɩna, ŋ sɩɩ fá mɩ nenige ŋɩɩ, sɩ́ leŋ. Leŋ dɩ ŋ chonuŋ arɩ ŋ wʋtɩtɩɩ pɔmɛ bʋa na-kala lɛ.

¹² Mɩ wʋwalɩmaa yʋga a gollimi, mɩ bɩ ba wuo dɩɩsɛ. Mɩ wʋbɔŋŋɔɔ gollimi nɛ, mɩ bɩra bɩ na. Mɩ wʋbɔŋŋɔɔ yʋga a kɩɩ mɩ nyu-pʋnaa, a leŋ mɩ nandaasɩŋ kala yʋɔrɛ.

¹³ La Tɩɩna, mɩɩ sʋlʋŋ, laamɛ ta, La Tɩɩna, guu kʋ pɛ mɩ lɛ.

¹⁴ Leŋ dɩ hɩɩsɩŋ dii nɩalɩŋ sɩɩ chɛ dɩ ba kpʋmɛ, dɩ ba wɩaa vʋgʋmɛ. Leŋ dɩ nɩalɩŋ sɩɩ chɛ dɩ ba lɩɩsɛ mɩ mɩɩsɩŋ mɩɩra dii hɩɩsɩŋ.

¹⁵ Nɩalɩŋ sɩ sieri mɩ lɛ, leŋ dɩ hɩɩsɩŋ diiba dɩ ʋ kperiba.

¹⁶ Ama leŋ dɩ nɩalɩŋ sɩɩ toŋ tʋɔŋ tɔrɛ ŋ nyuŋ dɩ ba jʋjʋɔsɛ. Leŋ dɩ nɩalɩŋ ma sɩ cho ŋɩɩ ŋ sɩ laaba ta bʋl bʋa na-kala lɛ, “La Tɩɩna nɛ kɩɩ kʋŋkala.”

¹⁷ La Tɩɩna, mɩ ŋaa nʋʋ sɩ summo a bɩ ʋ tɩtɩa lɛ wuo pɛ nɛ, ama ŋ bɩ mɩ wɩaa yʋa. Ŋ nɩɩ pɛ mɩ lɛ, ŋ nɛ mɩ Laataara. Mɩ Wɩa, guu kɔ, sɩ́ dienu.