WƖA YƖƖLAA 4 - WƖA TENIŊ

Yɩɩl-la Devit sɩ du cheŋ a yɩɩ pɩ gɔgʋ-hɩaŋ.

¹ Mɩ Tɩɩna Wɩa, ŋ ŋaa tʋɔpʋl Tɩɩna nɛ. Dɩ mɩ nɛ yɩrɩŋ, jegile nɩɩ mɩ teeŋ. Lɩɩsɛmɛ hɛɛŋ lɛ, fá mɩ nisusuŋ aŋ laa mɩ sʋla.

² Ɛɛ nɛ ma nɩaa deemba chɛ dɩ ma tʋʋsɛ mɩ joŋŋoo a diene magɛ? Ɛɛ nɛ maa chɛ dɩ ma cho vesiŋ sɩ bɩ wʋtɩtɩɩ kɛnɛ a diene magɛ?

³ Ma jɩŋ arɩ La Tɩɩna tʋɔsɛ tʋɔpʋl tɩŋŋaa nɛ ba ŋaa ʋ nɩaa. Dɩ mɩ nɛ yɩrʋ, ʋ yie jegile nɩɩ mɩ teeŋ nɛ.

⁴ Dɩ ma nɛ na baanɩŋ, má sɩ́ leŋe dɩ baaŋ-la leŋ dɩ ma ŋaa wʋbɔŋ. Dɩ ma nɛ jʋʋ bɔsɔ, má pɩŋ sɔm a bɩbɩɩnɛ wɩalɩŋ.

⁵ Má kpʋ pʋsʋŋ a sʋl Wɩɩsʋlʋŋ ʋ bʋa lɛ, aŋ joŋ ma yɩɛlaa hɛ La Tɩɩna lɛ.

⁶ Nɩ-daŋ nɩɩ pɩɛsʋ, “Kʋbɛɛ nɛ jaŋ ŋaa wʋzɔŋŋɔɔ la lɛ?” La Tɩɩna, leŋ dɩ ŋ pʋlʋmʋŋ chaana hɛ la lɛ.

⁷ Tʋɔtɔrʋ-la ŋ sɩ joŋo pɩmɛ nɛ yʋga kɩɩ ba mɩaa arɩ ba tɩɩnɛnɛɛ sɩŋ-la kala ba sɩ kɛnɛ.

⁸ Dɩ mɩ nɛ jʋʋ bɔsɔ, mɩ yie pɩŋ doŋ woruŋ nɛ, bɛɛ wɩaa ŋ-na mɩ Tɩɩna yie pɔmɛ nɛ dɩ wɩɩ sɩ́ mɩ jʋʋ.