WƖA YƖƖLAA 39 - WƖA TENIŊ

Yɩɩl-la Devit sɩ yɩɩ pɩ gɔgʋ-hɩaŋ.

¹ Mɩ sɩ, “Mɩ jaŋ kɛŋ mɩ tɩtɩa woruŋ a sɩ́ wɩaa bʋla laa cheeriŋ. Mɩ jaŋ tɔrɛ mɩ niiŋ dɩ mɩ nɛ hɛ nɩbɔŋŋɔɔ tʋɔŋ.”

² Mɩ tɔrɛ mɩ niiŋ ŋɩɩ ma nɛ, mɩ bɩ wɩɩ bʋla, ka mɩ tʋɔŋ ha faasa chei.

³ Mɩ tʋɔbɩɩnaa nagɛ nyiniŋ sɩɩ dii nɛ mɩ tʋɔŋ lɛ. Dɩ mɩ nɛ kɛŋ wɩaa chɔgɩsɛ na-kala, ʋ yie nagɛ nyiŋ-la faasaa dii nɛ. Ŋɩɩ nɛ mɩ walɩma ka aŋ pɩɛsɛ,

⁴ “Mɩ Tɩɩna, ɛɛ nɛ mɩ jaŋ diene magɛ aŋ sʋʋ? Dagɛmɛ mɩ tapʋlaa niiŋ. Leŋ mɩ jɩŋ ŋɩɩ mɩ mɩɩsɩŋ sɩ jaŋ dɛrɛ lɩma.”

⁵ Ŋ leŋe mɩ mɩɩsɩŋ kui nɛ, ʋ bɩ kʋŋkala ŋaa ŋ teeŋ. Nuhuobiiŋ kala mɩɩsɩŋ bɩ wɩɩ maga.

⁶ Ʋ nagɛ daaliimiŋ nɛ, ʋ bɩ diene aŋ lɩlɛl. Nuhuobiine lɔlʋŋ kala ŋaa pɛɩ nɛ, ʋ yie chɛ kɩaa bil aŋ bɩ jɩŋ nɩɩ-la sɩ jaŋ dii kɩalɩŋ.

⁷ La Tɩɩna, mɩ yɩɛlaa hɛ ŋ lɛ nɛ, mɩ bɩra bɩ kʋŋ dɔŋ ka chɛ.

⁸ Lɩɩsɛmɛ mɩ wʋbɔŋŋɔɔ kala lɛ, sɩ́ leŋe dɩ nɩyaaraa sieri mɩ lɛ.

⁹ Mɩ tɔrɛ mɩ niiŋ nɛ, mɩ bɩ wɩɩ bʋla, bɛɛ wɩaa ŋ nɛ ŋaa mɩɩ na hɛɛŋ deeŋ.

¹⁰ Bɩra sɩ́ mɩ dɔgɩsʋ, ŋ ŋmoomi nɛ, mɩ chɩchɛ mɩ sʋʋ.

¹¹ Ŋ dɔgɩsɛla kɩŋkɛŋ a tɩŋ la wʋbɔŋŋɔɔ wɩaa. Ŋ nagɛ mʋgʋlʋŋ nɛ a chei kɩalɩŋ la sɩ faasa cho. Nuhuobiine kala nagɛ peliŋ nɛ.

¹² “Mɩ Tɩɩna, jegile nɩɩ mɩ sʋla, mɩ yele nɛ a sʋsʋlʋŋ dɩ ŋ pɛ mɩ lɛ. Sɩ́ fʋʋla yagɛmɛ. Mɩ kɔ ŋ teeŋ a nagɛ nʋhʋɔrʋ nɛ, arɩ mɩ naabalɩmaba fa sɩ ŋaa nʋhʋɔra ŋɩɩ.

¹³ Bɩra sɩ́ baanɩŋ na mɩ nyuŋ, leŋ dɩ mɩ tʋɔŋ bɩra tɔrɛ, ka dɩ mɩ na sʋʋ a mʋ.”