WƖA YƖƖLAA 36 - WƖA TENIŊ

Yɩɩl-la Devit sɩ yɩɩ pɩ gɔgʋ-hɩaŋ.

¹ Nɩbɔŋŋɔɔ bɩ Wɩa ka fá, wʋbɔŋŋɔɔ dʋndʋŋa nɛ ba bɩbɩɩnɛ ba tʋɔŋ lɛ.

² Ba dagɛ ba tɩtɩa kikieli arɩ ba sɩ jaŋ bɛrɛ ba tɩtɩa wʋbɔŋŋɔɔ koo a bee naba.

³ Baa bʋl wʋbɔŋŋɔɔ nɛ aa nyɩsɛ nɩaa, a bɩra bɩ wʋjɩmɩŋ kɛnɛ dɩ baa ŋaa wʋzɔŋŋɔɔ.

⁴ Dɩ ba nɛ paala pɩŋ ma, ba yie bɩbɩɩnɛ wʋbɔŋŋɔɔ nɛ, a joŋ ba nyuŋ kala hɛ wʋbɔmɔ-la ŋaanɩŋ lɛ, a bɩ wʋbɔŋŋɔɔ ŋaanɩŋ ka leŋ.

⁵ La Tɩɩna, ŋ chono-la sɩ bɩ dɛrɛ teeli wɩa-nyuŋ nɛ, ŋ wʋtɩtɩɩ ma yi lee-la duoŋ-bɩlɩmbaanaa sɩ hɛ.

⁶ La Tɩɩna, ŋ tʋɔpʋla leŋie a magɛ peel-balaa nɛ, ŋ wʋtɩtɩɩ ma luŋ a magɛ mʋgʋ-balɩŋ. Ŋ nɩɩ beŋ nuhuobiinee arɩ pʋsʋŋ kala.

⁷ Ŋ chono-la sɩ bɩ dɛrɛ bɩ magɩa kɛnɛ. Nɩbalaa arɩ nɩbiisiŋ kala hɛ ŋ kɩŋkɛnsɩŋ bʋbʋɔŋ nɛ, ŋ chu tɔba.

⁸ Ŋ pɩba kʋdii-daŋ nɛ ŋ dɩa lɛ, a pɩba kʋnyʋalaa yʋgɛ a nagɛ fuoŋ sɩɩ pɛllʋ.

⁹ Mɩɩsɩŋ kala lɩɩ ŋ teeŋ nɛ. Ŋ nɛ pʋlʋmʋŋ, ŋɩɩ leŋ la ma na pʋlʋmʋŋ.

¹⁰ Ha cho nɩalɩŋ sɩ jɩmɩŋ, a ŋaa wʋzɔŋŋɔɔ pɩ nɩalɩŋ kala sɩ kɛŋ tʋɔpʋla.

¹¹ Sɩ́ leŋe dɩ nɩalɩŋ sɩɩ bigisi ba tɩtɩa lɛ kʋ yuomi koo dɩ nɩbɔŋŋɔɔ kirimi dɩ mɩ fá.

¹² Bee na nɩbɔmɔ-la. Ba tele nɛ, a bɩra bɩ jaŋ wuo sii.