WƖA YƖƖLAA 34 - WƖA TENIŊ

Yɩɩl-la Devit sɩ yɩa bʋa-la lɛ ʋ sɩ fugo nyaasɛ Abɩmɛlɛk sɩpaaŋ ʋ kiru ta ʋ viiri.

¹ Mɩ jaŋ dɛnnɛ La Tɩɩna bʋa na-kala lɛ. Ʋ dɛnnɩŋ sɩma mɩ niiŋ lɛ.

² Mɩ jaŋ dɛnnʋ a tɩŋ wɩɩ-la ʋ sɩ ŋaa wɩaa, a leŋ nɩalɩŋ kala sɩɩ na hɛɛŋ nɩɩ, dɩ ba tʋɔŋ tɔrɛ.

³ Má pɛ mɩ lɛ dɩ la dɛnnɛ La Tɩɩna, má leŋ la gbaara yɩrɛ ʋ yɩrɩ-balɩŋ.

⁴ Mɩ sʋl La Tɩɩna nɛ dɩ ʋ pɛ mɩ lɛ, ʋ nɩɩ a lɩɩsɛmɛ wɩalɩŋ kala sɩ leŋe fawʋllʋŋ kɛmmɛ lɛ.

⁵ Má joŋ ma wɩɩkala hɛ La Tɩɩna nɩsɩŋ lɛ, ʋ jaŋ leŋ dɩ ma chaanɛ a nagɛ wɩɩpɔsʋŋ. Hɩɩsɩŋ bɩ jaŋ diima.

⁶ Mɩ fa bɩ nʋʋ ŋaa, ama mɩ sɩ sʋl La Tɩɩna, ʋ laamɛ ta nɛ mɩ wʋjʋʋlaa kala lɛ.

⁷ Nɩalɩŋ kala sɩɩ fá La Tɩɩna, Wɩa tɩndaara nɩɩ pɔba aa lɩɩsɛba ba wʋjʋʋlaa kala lɛ.

⁸ Má chɛ a na ŋɩɩ La Tɩɩna sɩ kɛŋ zile. Nɩalɩŋ kala sɩ mʋ yuoru yie kɛŋ tʋɔtɔrʋŋ nɛ.

⁹ Ma nɩalɩŋ sɩ ŋaa La Tɩɩna nɩaa, má fáʋ. Nɩɩ-la kala sɩɩ fá La Tɩɩna bɩ kʋŋkala chɛɛ ka.

¹⁰ Losuŋ jaŋ wuo kɛŋ naachigee dɩ ba pʋgʋmɛ, ama nɩalɩŋ sɩɩ to La Tɩɩna bɩ kʋzɔŋ kala chɛɛ ka.

¹¹ Mɩ biiriŋ, má kɔ mɩ teeŋ a jegile nɩɩ, mɩ jaŋ dagɛma ŋɩɩ ma sɩ jaŋ zil La Tɩɩna.

¹² Nɩɩ-la kala sɩ cho dɩ ʋ kɛŋ mɩɩ-duduoŋ a nɩɩ sɩma ʋ mɩɩsɩŋ lɛ,

¹³ tɩɩna sɩ́ wʋbɔŋŋɔɔ bʋl a sɩ́ wɩaa ma nyɩnyɩa.

¹⁴ Leŋ wʋbɔŋŋɔɔ ŋaanɩŋ aŋ ŋɩŋaa wʋzɔŋŋɔɔ, a fɩɛsɛ sɩɩŋ chɩchɛ dɩ nii-maga hɛ ŋ dɩ nɩaa pɛgɛ.

¹⁵ La Tɩɩna sɩaa pɛ tʋɔpʋl tɩŋŋaa lɛ nɛ, a jegilee nɩɩ ba nii-ŋmobo.

¹⁶ Ama Wɩa joŋ ʋ harɩŋ yɩa wʋbɔŋ ŋaaraa nɛ, ʋ jaŋ tii paa ba kala tinteeŋ lɛ dɩ ba yɩrɩŋ lɛl.

¹⁷ Dɩ tʋɔpʋl tɩŋŋaa nɛ ŋmoo niiŋ pɩ La Tɩɩna dɩ ʋ pɛ ba lɛ, ʋ yie nɩɩ nɛ, a lɩɩsɛba ba wʋjʋʋlaa kala lɛ.

¹⁸ La Tɩɩna kpagɛ nɩalɩŋ nandaasɩŋ sɩ yʋɔra nɛ. Ʋ laa nɩalɩŋ bɩra sɩ bɩ yɩɛlaa kɛnɛ ta nɛ.

¹⁹ Wʋwalɩmaa jaŋ wuo yʋgɛ a jʋʋ tʋɔpʋl tɩŋŋaa, ama La Tɩɩna nɛ yie laaba ta wɩalɩŋ kala lɛ.

²⁰ Ʋ nɩɩ beŋ ba haŋgbelee nyuŋ ba kʋbala ma bɩ jaŋ bori.

²¹ Wʋbɔmɔ-la nɩbɔŋŋɔɔ sɩɩ ŋaa tɩtɩa nɛ jaŋ gʋra kpʋba. Nɩalɩŋ ma sɩ bɩ tʋɔpʋl tɩŋŋaa cho, ba jaŋ joŋ cheeriŋ pɩba.

²² La Tɩɩna nɛ laa ʋ tɩntɩnnaa tɩta. Nɩalɩŋ kala sɩ fá mʋ yuoru, ʋ bɩ jaŋ joŋ cheeriŋ pɩba.