WƖA YƖƖLAA 32 - WƖA TENIŊ

Yɩɩl-la Devit sɩ yɩa.

¹ La Tɩɩna sɩ joŋ nɩalɩŋ wʋbɔŋŋɔɔ chɛba, a kɛŋ ba wʋcheelee faa, ba tʋɔŋ jaŋ tɔrɛ.

² Nɩalɩŋ wʋbɔŋŋɔɔ La Tɩɩna sɩ bee kieli arɩ nɩalɩŋ sɩ bɩ nɩaa ka nyɩsɛ tʋɔŋ jaŋ tɔrɛ.

³ Mɩ fa sɩ vɩa dɩ mɩ dagɛ mɩ wʋbɔŋŋɔɔ, mɩ yele nɛ tapʋlɩɩ-la kala, a kala bɛsɩmɛ.

⁴ Ŋ walɩmɛmɛ wɩɩhɛyɛ arɩ tɩtaŋɩŋ kala nɛ, mɩ doluŋ kala dɛrɛ a nagɛ tafaaŋ wulumuŋ sɩ leŋe leriŋ hɩl.

⁵ Mɩ sɩ, “Mɩ jaŋ dagɛ mɩ wʋbɔŋŋɔɔ pɩ La Tɩɩna.” Ŋɩɩ nɛ mɩ dagɛ ba kala pɩŋ a bɩ kaa faaŋ. Ŋ joŋ ba kala chɛmɛ.

⁶ Ŋɩɩ wɩaa nɩalɩŋ kala sɩɩ to La Tɩɩna maga dɩ ba sʋlʋ nɛ dɩ hɛɛŋ nɛ jʋʋba. Ŋɩɩ nɛ jaŋ leŋ dɩ wʋjʋʋlaa nɛ paala yʋgɛ a kʋkɔ ma, dɩ ba sɩ́ ba yi.

⁷ Ŋ lɛ nɛ mɩ faa. Ŋ jaŋ pɔmɛ, dɩ wɩaa sɩ́ mɩ jʋʋ. Mɩ jaŋ yɩɩ yɩɩlaa a tɩŋ ŋ sɩ laamɛ ta wɩaa.

⁸ Ŋ bʋla pɩmɛ, “Mɩ jaŋ chagɩlɩŋ a dagɩŋ wombii-la ŋ sɩ jaŋ to, aŋ bibeniŋ.

⁹ Sɩ́ nɩyaarɩ ŋaa a nagɛ jaaba koo kakumo sɩ bɩ wɩaa sɩaa jɩŋ. Ba joŋ koŋ hɛ ʋ niiŋ koo ŋmɛnɩŋ vɔɔ a kɛnʋ dɩdagɛ wɩɩ-la sɩ maga dɩ ʋ ŋaa.”

¹⁰ Wʋbɔŋ doho kala jaŋ jʋʋ nɩbɔŋŋɔɔ, ama La Tɩɩna chono-la sɩ bɩ dɛrɛ jaŋ chu tɔ nɩalɩŋ kala sɩ laaʋ dii.

¹¹ Ma nɩalɩŋ kala sɩ kɛŋ tʋɔpʋla, má leŋ dɩ ma tʋɔŋ tɔrɛ wɩalɩŋ La Tɩɩna sɩ ŋaa lɛ, má ŋaa goŋ arɩ tʋɔtɔrʋŋ.