WƖA YƖƖLAA 31 - WƖA TENIŊ

Yɩɩl-la Devit sɩ yɩɩ sʋl Wɩa a tɩŋ ʋ sɩ laaʋ dii.

¹ La Tɩɩna, ŋ nɛ mɩ yuori, sɩ́ leŋe dɩ hɩɩsɩŋ diimi. Ŋ ŋaa tʋɔpʋl Tɩɩna nɛ, mɩɩ sʋlʋŋ, laamɛ ta.

² Jegile nɩɩ mɩ sʋla a kʋ laamɛ ta lɩma. Ŋaa mɩ dɩ-duoŋ, a laamɛ ta.

³ Ŋ nagɛ bʋŋ nɛ mɩ teeŋ, a ŋaa mɩ dɩ-duoŋ. Laa mɩ sɩpaaŋ a dagɛmɛ wombiiŋ a tɩŋ ŋ yɩrɩŋ wɩaa.

⁴ Lɩɩsɛmɛ bɛrɛ-la ba sɩ bɛrɛ bil mɩ lɛ, bɛɛ wɩaa ŋ nɛ mɩ yuori.

⁵ Mɩ joŋ mɩ tɩtɩa kala a hɩhɛ ŋ nɩsɩŋ lɛ nɛ. Mɩ Tɩɩna Wɩa, ŋ nɛ kɛŋ wʋtɩtɩɩ, laamɛ ta.

⁶ Mɩ bɛrɛ nɩalɩŋ sɩɩ to vʋɩyaa sɩ ŋaa kʋpɛɩba nɛ, ama mɩ-na laaŋ dii nɛ La Tɩɩna.

⁷ Mɩ tʋɔŋ jaŋ tɔrɛ dɩ mɩ jʋjʋɔsɛ a tɩŋ ŋɩɩ ŋ sɩ chomi. Ŋ na mɩ hɛɛŋ nɛ a jɩŋ mɩ wʋjʋʋlaa ma lɛ.

⁸ Ŋ bɩ leŋe mɩ jʋʋ mɩ dʋndɔŋŋɔɔ nɩsɩŋ, ama ŋ pɩmɛ wombiiŋ nɛ mɩ gʋgɔllɛ pʋlʋŋ-jaala lɛ.

⁹ La Tɩɩna, fá mɩ nenige, hɛɛŋ jʋʋmɛ nɛ. Mɩ yele nɛ, mɩ sɩaa kala gʋɔlɛ, a bɩra bɩ na woruŋ. Mɩ kala nɛ bɛsɩmɛ.

¹⁰ Mɩ mɩɩsɩŋ kala ŋaa tʋɔ-cheeŋ nɛ, mɩ nɩna hɛɛŋ jɩna na-kala. Tʋɔ-chee-la leŋ mɩ pʋgʋmɛ, mɩ haŋgbelee ma bɩra bɩ dol.

¹¹ Mɩ dʋndɔŋŋɔɔ kala nɛ kɛmmɛ ŋmuŋmoo gbɛɛŋ, a wasa nyaŋ mɩ dɩ nɩalɩŋ sɩ jʋʋ kpɩkpagɛ dɔŋɔ. Nɩalɩŋ sɩ jɩmmɛ mɩɩra fɩfámɛ. Dɩ ba nɛ na mɩ wombiiŋ lɛ, ba gɛbɛ.

¹² Ba yʋ mɩ wɩaa a nagɛ nɩa sɩ sʋba nɛ. Mɩ nagɛ pupoi-kpaaŋ nɛ.

¹³ Mɩ dʋndɔŋŋɔɔ yʋga a bʋl wʋbɔŋŋɔɔ aa tɩgɛ mɩ lɛ, fawʋllʋŋ kala nɛ kɛmmɛ. Baa vʋʋrɛ mɩ wɩaa nɛ dɩ ba kpʋmɛ.

¹⁴ Ama mɩ laaŋ dii nɛ mɩ Tɩɩna, ŋ nɛ ŋaa mɩ Wɩa.

¹⁵ Mɩ mɩɩsɩŋ hɛ ŋ nɩsɩŋ lɛ nɛ. Laamɛ ta mɩ dʋndɔmɔ-la sɩ to naasɩŋ dʋdɔgɩsɛmɛ nɩsɩŋ lɛ.

¹⁶ Suri ŋ sɩaa mɩ-na ŋ tɩntɩnna nyuŋ, a fá mɩ nenige, a laamɛ ta a tɩŋ ŋ chonuŋ sɩ bɩ dɛrɛ wɩaa.

¹⁷ Mɩ ŋmoo niiŋ pɩpɩŋ nɛ mɩ Tɩɩna, sɩ́ leŋe dɩ hɩɩsɩŋ diimi, ama leŋ dɩ nɩbɔŋŋɔɔ dii hɩɩsɩŋ a mʋ lɛlɩŋ.

¹⁸ Leŋ dɩ wʋnyɩɛra-la niiŋ jʋʋ kpʋrʋŋ. Ba yie bibigisi ba tɩtɩa lɛ nɛ a bʋl babiibal wɩaa a tʋtʋʋsɛ tʋɔpʋl tɩŋŋaa.

¹⁹ Ŋ wʋzɔŋŋɔɔ yʋga, ba nɛ ŋ joŋo bil nɩalɩŋ sɩɩ fáŋ lɛ. Ba nɛ ŋ joŋo pɩ nɩalɩŋ sɩ kʋ yuoruŋ, ka nɩaa bibeŋ.

²⁰ Ŋ kɛmba faa nɛ ŋ dɩjʋʋlʋŋ dɩ nʋʋkala sɩ́ wʋbɔŋ joŋo ŋaa ba lɛ. Ŋ pɔba nɛ, ba wiesi nɩalɩŋ sɩɩ tʋʋsɛba nɩsɩŋ lɛ.

²¹ Mɩ Tɩɩna, mɩ jaŋ dɛnnɩŋ a tɩŋ ŋ sɩ dagɛ ŋ chonuŋ mɩ teeŋ, bʋa-la lɛ ba sɩɩ yuomi a nagɛ ba sɩ gollo yuyuo taŋ.

²² Fawʋllʋŋ fa kɛmmɛ nɛ mɩ bɩɩnɛ arɩ ŋ kirimi ta nɛ ŋ sɩpaaŋ. Ama ŋ nɩɩ mɩ nii-ŋmobo nɛ mɩ sɩ yɩrɩŋ dɩ ŋ pɛ mɩ lɛ.

²³ Ma nɩalɩŋ kala sɩ ŋaa La Tɩɩna nɩaa, má chou. La Tɩɩna ka pɔ nɩalɩŋ sɩ kɛŋ wʋtɩtɩɩ nɛ, aŋ chaasa dʋdɔgɩsɛ nɩalɩŋ sɩɩ dagɛ ba tɩtɩa ŋɩɩ sɩ maga.

²⁴ Ma nɩalɩŋ kala sɩ kɛŋ yɩɛlaa La Tɩɩna lɛ, má nyɩrɛ bɔyɛ a kɛŋ tʋɔ-doluŋ.