WƖA YƖƖLAA 30 - WƖA TENIŊ

Yɩɩl-la Devit sɩ yɩɩ lɔllɛ Wɩa.

¹ La Tɩɩna, mɩ jaŋ dɛnnɩŋ, mɩ fa chɩŋ sʋʋŋ naaŋ lɛ nɛ ŋ laamɛ ta. Mɩ dʋndɔŋŋɔɔ bɩ wuo na wombiiŋ a jʋɔsɛ mɩ sʋʋŋ lɛ.

² Mɩ Tɩɩna Wɩa, mɩ ŋmoo niiŋ nɛ a pɩŋ dɩ ŋ pɛ mɩ lɛ, ŋɩɩ nɛ ŋ vaarɛmɛ,

³ a lɩɩsɛmɛ sʋʋŋ lɛ, mɩ bɩ sʋʋŋ bʋa jʋa.

⁴ Ma nɩalɩŋ sɩ ŋaa La Tɩɩna nɩaa, má yɩɩ yɩɩlaa a dɛnnʋ. Má dɛnnɛ ʋ yɩrɩ zɔmʋŋ.

⁵ Dɩ ʋ baanɩŋ nɛ sie, ʋ bɩ dieni. Ama ʋ chonuŋ-na bɩ dɛrɛ. Ŋ jaŋ wuo yel tɩtaŋɩŋ, ama taŋ jaŋ pʋpʋl dɩ tʋɔtɔrʋŋ bɩra kɔ.

⁶ Wɩɩ fa sɩ bɩ mɩ jʋa, mɩ sɩ, “Nʋʋkala bɩ jaŋ wuo kɛmmɛ jigisi.”

⁷ La Tɩɩna, ŋ fa sɩ chɩŋ mɩ harɩŋ, ŋɩɩ leŋe mɩ kɛŋ doluŋ a nagɛ peel-duoŋ nɛ. Ama ŋ sɩ joŋ harɩŋ a yɩamɛ, fawʋllʋŋ chaasa kɛmmɛ nɛ.

⁸ Mɩ Tɩɩna, ŋ nɛ mɩ yɩrɛ, a sʋlʋŋ dɩ ŋ fá mɩ nenige.

⁹ Dɩ mɩ nɛ sʋba, bɛɛ nyʋʋrɩɩ nɛ ŋ jaŋ na? Dɩ mɩ nɛ bɩrɩmɛ hagɩla, ɛɛ nɛ mɩ jaŋ wuo bɩra ŋaa a dɛnnɩŋ a dagɛ ŋɩɩ ŋ sɩ kɛŋ wʋtɩtɩɩ?

¹⁰ La Tɩɩna, nɩɩ mɩ teeŋ a fá mɩ nenige. La Tɩɩna, pɛ mɩ lɛ.

¹¹ Ŋ leŋe mɩ tʋɔ-cheeŋ bɩrɩmɛ tʋɔtɔrʋŋ nɛ mɩ gʋgʋa. Ŋ wuri mɩ tʋɔ-chei gɛrɩŋ ta nɛ aŋ joŋ tʋɔtɔrɛ gɛrɩŋ laalɛmɛ,

¹² dɩ mɩ yɩɩ yɩɩlaa a dɛnnɩŋ arɩ mɩ tʋɔŋ kala a sɩ́ leŋ. Mɩ Tɩɩna Wɩa, mɩ jaŋ lɔllʋŋ a kaa mʋ wuu.