WƖA YƖƖLAA 29 - WƖA TENIŊ

Yɩɩl-la Devit sɩ yɩa.

¹ Ma Wɩa tɩndaaraa kala sɩ hɛ Wɩa-jaŋ lɛ, má zil La Tɩɩna, má zilu a tɩŋ ʋ tʋla arɩ ʋ doluŋ wɩaa.

² Má zil La Tɩɩna yɩrɩ-balɩŋ. Má kpɩɛrɛ ma tɩtɩa a dɛnnɛ La Tɩɩna, ʋ nɛ kɛŋ tʋla.

³ La Tɩɩna yikoro dɔmɔ nɛ mʋgʋ-balaa nyuŋ. La Tɩɩna Wɩa sɩ kɛŋ tʋla kpɩa goŋ nɛ mʋgʋ-balaa nyuŋ a nagɛ duonuŋ sɩ kpɩa.

⁴ La Tɩɩna yikoro kɛŋ doluŋ nɛ woruŋ, ʋ yikoro ŋaa babiibal yikoro nɛ.

⁵ La Tɩɩna yikoro-la ka bori kuolu-tɩɩsɩŋ nɛ, a paala bori kuolusuŋ sɩ hɛ Lɛbanɔŋ peele-la nyuŋ.

⁶ Wɩa leŋe Lɛbanɔŋ peel-la sii fɩl nɛ a nagɛ nɛ-bie, a leŋ peel-la ma ba sɩɩ yɩrɛ Hɛmɔŋ fɩl a nagɛ baga nɛ-bel-pɔrʋŋ.

⁷ La Tɩɩna yikoro leŋe taŋ lɩlɩgɩsɛ nɛ.

⁸ Ʋ yikoro-la yie leŋ tintee-hɩlɩŋ zigili nɛ. La Tɩɩna yikoro leŋe tintee-hɩlɩɩ-la sɩ kpagɛ Kadɛs zigili nɛ.

⁹ La Tɩɩna yikoro leŋe tɩɩ-balaa golibi nɛ, aŋ leŋ duuŋ tɩɩsɩŋ pɩpaarɩŋ kala yuori. Nɩalɩŋ kala sɩ hɛ ʋ dɩɩ-balɩŋ lɛ ŋaa goŋ a bʋl, “Wɩa nɛ kɛŋ doluŋ.”

¹⁰ La Tɩɩna nɩɩ beŋ lɩɩraa kala. Ʋ nɛ kuoro a kaa mʋ wuu.

¹¹ La Tɩɩna nɛ joŋ doluŋ a pɩ ʋ nɩaa, a pɛ ba lɛ ba hɔŋ arɩ fɩɛlɩŋ.