WƖA YƖƖLAA 27 - WƖA TENIŊ

Yɩɩl-la Devit sɩ yɩa.

¹ La Tɩɩna nɛ ŋaa mɩ pʋlʋmʋŋ arɩ mɩ Laataara, mɩ bɩ kʋŋkala ka fá. La Tɩɩna nɛ ŋaa mɩ dɩ-duoŋ, mɩ bɩ nʋʋkala ka fá.

² Dɩ nɩbɔŋŋɔɔ nɛ gollimi a wʋwalɩmɛ dɩ ba kpʋmɛ, dɩ mɩ dʋndɔŋŋɔɔ nɩɩ yuomi, ba jaŋ gɛrɛ tel.

³ Laalɩyuoroo jaŋ wuo gollimi, ama fawʋllʋŋ bɩ jaŋ kɛmmɛ. Laalɩŋ ma jaŋ wuo sii mɩ nyuŋ, ama mɩ jaŋ laaŋ dii.

⁴ Wʋbala nɛ mɩ chɩchɛ ŋ teeŋ mɩ Tɩɩna. Wɩɩ-la mɩ sɩɩ chɛ nɛ ŋ-la: Dɩ mɩ hɛ ŋ dɩa lɛ tapʋlɩɩ-kala mɩ mɩɩsɩŋ lɛ a bɩbagɩsɛ ŋ zɔmʋŋ aŋ chʋchʋɔlʋŋ.

⁵ Dɩ wɩaa nɛ jʋʋmɛ tapʋlɩɩ dɔŋ, ŋ jaŋ pɔmɛ. Ŋ jaŋ kɛmmɛ faa ŋ lɛbɩŋ tʋɔŋ, a jommi sagɛ bʋŋ nyuŋ.

⁶ Ŋɩɩ nɛ mɩ jaŋ wuo yuo dii mɩ dʋndɔmɔ-la sɩ gollimi, aŋ jʋʋ ŋ lɛbɩ-la tʋɔŋ a kpʋ pʋsʋŋ a sʋl Wɩɩsʋlʋŋ a jʋɔsa ŋaa goŋ a yɩɩ yɩɩlaa a dɛnnɩŋ.

⁷ La Tɩɩna, dɩ mɩ nɛ sʋlʋŋ, jegile nɩɩ, a fá mɩ nenige a laa mɩ sʋla.

⁸ Mɩ tʋɔbɩɩnaa bʋla pɩmɛ arɩ mɩ chʋɔlʋŋ. Mɩ Tɩɩna, mɩ jaŋ chʋɔlʋŋ.

⁹ Sɩ́ ŋ tɩtɩa kaa faamɛ. Sɩ́ baanɩŋ na a kiri mɩ-na ŋ tɩntɩnna ta. Ŋ nɛ ŋaa Nɩɩ-la sɩɩ pɛ mɩ lɛ. Mɩ Wɩa arɩ mɩ Laataara, sɩ́ mɩ vɩa ta.

¹⁰ Dɩ mɩ nyɩmma arɩ mɩ naaŋ nɛ paala vɩamɛ ta ma, ŋ-na La Tɩɩna jaŋ beŋ mɩ nyuŋ.

¹¹ La Tɩɩna, dagɛmɛ ŋ wombiiŋ. Kɛmmɛ to wombii-la sɩ tʋʋla, a tɩŋ mɩ dʋndɔŋŋɔɔ wɩaa.

¹² Sɩ́ leŋe dɩ mɩ dʋndɔŋŋɔɔ ŋaa wɩɩ-la ba sɩ cho mɩ lɛ. Nɩaa nyɩɛ wɩaa a pɩpɩmɛ nɛ a chaasa fufugisimi.

¹³ Ama mɩ laa dii arɩ mɩ jaŋ kɛŋ mɩɩsɩŋ a na La Tɩɩna wʋzɔŋŋɔɔ dʋnɩa deeŋ lɛ la sɩ hɛ.

¹⁴ Má kɛŋ yɩɛlaa a gbɛrɛ La Tɩɩna. Má nyɩrɛ bɔyɛ a kɛŋ tʋɔ-doluŋ a gbɛrɛ La Tɩɩna.