WƖA YƖƖLAA 26 - WƖA TENIŊ

Yɩɩl-la Devit sɩ yɩa.

¹ La Tɩɩna, leŋ dɩ nɩaa jɩŋ arɩ mɩ bɩ wɩɩ cheye. La Tɩɩna, mɩ laaŋ dii nɛ, mɩ bɩ begili.

² La Tɩɩna, magɩsɛmɛ a na, a jɩŋ mɩ tʋɔbɩɩnaa, a jɩŋ ŋɩɩ mɩ sɩ naga.

³ Mɩ yie liisi ŋ chono-la sɩ bɩ dɛrɛ wɩaa nɛ, a tuto ŋ wʋtɩtɩɩ-la bʋa kala lɛ.

⁴ Mɩ bɩ wʋnyɩɛraa tʋɔŋ ka guoli. Mɩ dɩ kanfugi tɩŋŋaa ma bɩ wɩɩ pɛ.

⁵ Mɩ bɩ nɩalɩŋ sɩɩ ŋaa wʋbɔŋŋɔɔ tʋɔŋ ka guoli. Mɩ dɩ tʋɔhɛɛ-tɩŋŋaa ma bɩ hɔŋ.

⁶ La Tɩɩna, mɩ sɔmɔ lɩɩsɛ mɩ nɩsɩŋ nɛ, a dagɛ arɩ mɩ bɩ wɩɩ cheye, aŋ dɛnnɩŋ gugolli ŋ koruŋ,

⁷ a yɩɩ yɩɩlaa aa lɔllʋŋ, aŋ pɛ bʋbʋl wʋkpuŋkperisi-la ŋ sɩ ŋaa.

⁸ Mɩ Tɩɩna, mɩ cho ŋ dɩa-la lɛ ŋ sɩ hɛ nɛ woruŋ, lee-la ŋ tʋla sɩ chaana.

⁹ Sɩ́ mɩ dɩ nɩbɔŋŋɔɔ chei hɛ dɔŋɔ, sɩ́ mɩ dɩ nɩkpʋʋraa chei hɛ dɔŋɔ,

¹⁰ nɩalɩŋ sɩɩ ŋaa wʋbɔŋŋɔɔ bʋa-kala lɛ aa laa kpalaa.

¹¹ Mɩ-na ŋaa wɩaa ba bʋa lɛ nɛ, fá mɩ nenige aŋ laamɛ ta.

¹² La Tɩɩna, mɩ-na chɩna nɛ kpaŋkpaŋ. Dɩ ŋ nɩaa nɛ hilime a yʋgɛ, mɩ jaŋ dɛnnɩŋ ba tʋɔŋ.