WƖA YƖƖLAA 25 - WƖA TENIŊ

Yɩɩl-la Devit sɩ yɩa.

¹ La Tɩɩna, mɩ joŋ mɩ tɩtɩa kala hɛ ŋ nɩsɩŋ lɛ nɛ.

² Mɩ Wɩa, mɩ laaŋ dii nɛ. Sɩ́ leŋe dɩ hɩɩsɩŋ diimi, sɩ́ leŋe mɩ dʋndɔŋŋɔɔ yuo diimi.

³ Nɩalɩŋ sɩ joŋ ba yɩɛlaa hɛ ŋ lɛ, hɩɩsɩŋ bɩ jaŋ diiba. Ama hɩɩsɩŋ jaŋ dii nɩalɩŋ sɩ bɩ wʋtɩtɩɩ kɛnɛ.

⁴ La Tɩɩna, kɛŋ ŋ wombiee dagɛmɛ, a leŋ dɩ mɩ jɩmba.

⁵ Dagɛmɛ ŋ wʋtɩtɩɩ, bɛɛ wɩaa ŋ nɛ ŋaa mɩ Wɩa, Nɩɩ-la sɩ laamɛ ta. Bʋa na-kala mɩ yɩɛlaa yie hɛ ŋ lɛ nɛ.

⁶ La Tɩɩna, liise yi ŋ chonuŋ sɩ yʋga arɩ ŋ sɩ faasa fá nɩaa nenige ŋɩɩ faafaa kala.

⁷ Joŋ wʋbɔmɔ-la kala mɩ sɩ ŋaa mɩ hambiiriŋ lɛ a chɛmɛ. A tɩŋ ŋ chonuŋ arɩ ŋ zile wɩaa, liisi mɩ wɩaa.

⁸ La Tɩɩna ŋaa tʋɔpʋla Tɩɩna nɛ a ŋɩŋaa wʋzɔŋŋɔɔ, ŋɩɩ nɛ tɩɩ ʋʋ dagɛ wʋbɔŋ ŋaaraa ʋ wombii-la sɩ maga dɩ ba to.

⁹ Ʋ nɛ laa nɩalɩŋ sɩ kɛŋ ba tɩtɩa muuri sɩpaaŋ, a dagɛba dɩ ba ŋɩŋaa wɩaa ba bʋa lɛ aŋ tuto ʋ wombiiŋ.

¹⁰ La Tɩɩna, wɩɩ na-kala ŋ sɩ ŋaa lɛ, chonuŋ arɩ wʋtɩtɩɩ nɛ ŋ kɛŋ a pɩ nɩalɩŋ sɩɩ to nii-la sɩ hɛ ŋ dɩ ba pɛgɛ.

¹¹ La Tɩɩna, tɩŋ ŋ yɩrɩŋ wɩaa a joŋ mɩ wʋbɔŋŋɔɔ chɛmɛ, ba lɔrɔ kieli.

¹² Nɩalɩŋ kala sɩɩ fá La Tɩɩna, ʋ jaŋ dagɛba wombii-la sɩ maga dɩ ba to.

¹³ Bʋa na-kala ba jaŋ dʋa kɩaa yʋgɛ, ka dɩ ba doho nɩaa ma laa tinteeŋ tɩɩ.

¹⁴ La Tɩɩna, ŋ ŋaa nɩalɩŋ kala sɩɩ toŋ nandɔŋ nɛ. Ŋ leŋe ba kala jɩŋ nii-la sɩ hɛ ŋ dɩ ba pɛgɛ nɛ.

¹⁵ La Tɩɩna, mɩɩ beŋ ŋ lɛ nɛ bʋa na-kala. Pɛ mɩ lɛ, a lɩɩsɛmɛ bɛrɛ kala lɛ.

¹⁶ Beŋ mɩ sɩaa lɛ aŋ fá mɩ nenige. Wɩaa jʋʋmɛ nɛ, ka nʋʋ tuo dɩ ʋ pɛ mɩ lɛ.

¹⁷ Mɩ wʋwalɩmaa pʋŋa pɛ nɛ. Laamɛ ta mɩ tʋɔ-cheeŋ lɛ.

¹⁸ Beŋ mɩ wʋwalɩmɩa-la arɩ mɩ tʋɔ-cheeŋ aŋ joŋ mɩ wʋbɔŋŋɔɔ kala chɛmɛ.

¹⁹ Bee na mɩ dʋndɔŋŋɔɔ sɩ magɛ ŋɩɩ, arɩ ŋɩɩ ba sɩ chaasa bɛrɛmɛ.

²⁰ Mɩ kʋ yuoruŋ nɛ dɩ ŋ pɔmɛ. Laamɛ ta, sɩ́ leŋe dɩ hɩɩsɩŋ diimi.

²¹ Mɩɩ toŋ nɛ arɩ mɩ tʋɔŋ kala, a laa dii arɩ ŋ jaŋ laamɛ ta.

²² La Wɩa, mɩɩ sʋlʋŋ, laa Iziral tɩŋŋaa ta ba wʋwalɩmaa kala lɛ.