Biblia Todo Logo
အွန်လိုင်း သမ္မာကျမ်းစာ

- ကြော်ငြာတွေ -

WƖA YƖƖLAA 22 - WƖA TENIŊ


Yɩɩl-la Devit sɩ yɩɩ pɩ gɔgʋ-hɩaŋ.

1 Mɩ Wɩa, mɩ Wɩa, bɛɛ nɛ tɩɩ ŋ vɩamɛ ta? Bɛɛ nɛ tɩɩ ŋ hɛ dɩ-bolii aŋ vɩa dɩ ŋ laamɛ ta? Bɛɛ nɛ tɩɩ ŋ bɩ mɩ huunoo jegile nɩɩ?

2 Mɩ ŋmoo niiŋ wɩɩhɛyɛ arɩ tɩtaŋɩŋ kala nɛ, ama ŋ bɩ jegile nɩɩ, mɩ saa bɩ jaŋ leŋ.

3 Ŋ nɛ Wɩa sɩ bɩ disiniŋ kɛnɛ a hɔŋ ŋ kuoru kpasa nyuŋ, Iziral tɩŋŋaa dɩdɛnnɩŋ.

4 La naabalɩmaba joŋ ba yɩɛlaa hɛ ŋ lɛ nɛ, ŋɩɩ nɛ ŋ laaba ta.

5 Ba sɩ ŋmoo niiŋ pɩŋ dɩ ŋ pɛ ba lɛ, ŋ jegile nɩɩ nɛ a laaba ta. Ba sɩ laaŋ dii, ŋ bɩ leŋe hɩɩsɩŋ diiba.

6 Mɩ paala bɩ nʋʋ ŋaa, mɩ nagɛ vɛrɩŋ nɛ. Nɩaa bɛrɛmɛ a bɩ mɩ kaa tɩtɩŋ.

7 Nʋʋkala yie namɛ a sieri mɩ lɛ a tʋʋsɛmɛ, aŋ vivigisi nyuŋ,

8 a bʋl, “Ŋ laa La Tɩɩna dii nɛ, dɩ ʋ ma nɛ cho ŋ wɩaa, leŋ dɩ ʋ laaŋ ta, dɩ wɩɩkala sɩ́ ŋ lɛ ŋaa yei.”

9 La Tɩɩna, ŋ nɛ leŋe ba lʋlmɛ wɩɩkala bɩ mɩ lɛ ŋaa. Ŋ pɔmɛ nɛ bʋa-la lɛ mɩ ha sɩɩ wasɛ yɩlɩŋ.

10 A chɩŋ tapʋlɩɩ-la ba sɩ lʋlmɛ, ŋ nɩɩ beŋ mɩ nyuŋ, a chɩŋ bʋa-la lɛ mɩ naaŋ sɩ lʋlmɛ a kaa kɔ, ŋ nɛ mɩ Wɩa.

11 Sɩ́ dɩ-bolii hɛ, wʋjʋʋlaa kpagɛmɛ nɛ, ka nʋʋ tuo dɩ ʋ pɛ mɩ lɛ.

12 Mɩ dʋndɔŋŋɔɔ yʋga a gollimi a nagɛ Basaŋ tinteeŋ nɛ-bel duoruŋ sɩ werige.

13 Mɩ dʋndɔmɔ-la nagɛ naachigee nɛ a faasa suri ba niiree aa tʋɔrɛ dɩ ba kɛmmɛ pʋɔsɛ.

14 Mɩ doluŋ kala nɛ dɛrɛ aŋ ka mʋa a nagɛ lɩɩ-suosoo. Mɩ haŋgbel-susugusuŋ kala lɩɩ, mɩ tʋɔbɩɩnaa kala lɛl a nagɛ keliŋ sɩ ŋmɩɛra.

15 Mɩ doluŋ kala nɛ dɛrɛ a nagɛ pupoiŋ sɩ yɛrɛ. Mɩ nandelimiŋ ma hɩl a mɛrɛ mɩ tilimiŋ lɛ. Ŋ-na Wɩa nɛ lemmi ta dɩ mɩ sʋʋ kʋŋkɔlʋŋ lɛ.

16 Nɩbɔŋŋɔɔ nɛ gollimi a nagɛ vasɩŋ, a tɔɔ mɩ nɩsaa arɩ mɩ naasɩŋ luri.

17 Mɩ jaŋ wuo dɩɩsɛ mɩ haŋgbelee, ba kala nyɩɩsa nɛ. Mɩ dʋndɔŋŋɔɔ yie bemmi fii aŋ gɛlɛ dieri.

18 Ba tɔnsɛ mɩ gɛnnɩŋ wɩaa nɛ, aŋ paa kpaa dɔŋɔ.

19 La Tɩɩna, sɩ́ dɩ-bolii hɛ. Ŋ nɛ mɩ doluŋ, ŋaa lɩma a kʋ pɛ mɩ lɛ.

20 Laamɛ ta mɩ dʋndɔŋŋɔɔ nɩsɩŋ lɛ, ba nagɛ vasɩŋ nɛ, sɩ́ leŋe dɩ ba kpʋmɛ.

21 Laamɛ ta naachigee niiŋ lɛ, a laamɛ ta nɛ-bel-duoru-la ma sɩ werige lɛ.

22 Ŋɩɩ nɛ mɩ jaŋ bʋl wɩalɩŋ ŋ sɩ ŋaa a pɩ mɩ naambiiriŋ, a dɛnnɩŋ nɩalɩŋ sɩɩ hilimu ŋ yɩrɩŋ lɛ ma tʋɔŋ.

23 Ma nɩalɩŋ sɩɩ fá La Tɩɩna, má dɛnnʋ. Ma Jekɔb doho nɩaa kala, má zilu. Ma Iziral doho kala, má fáʋ.

24 La Tɩɩna bɩ nɩalɩŋ sɩɩ na hɛɛŋ wɩaa yʋa. Ʋ bɩ ba kaa gbigbesi ba wʋjʋʋlaa lɛ. Dɩ ba nɛ yɩrʋ dɩ ʋ pɛ ba lɛ, ʋ yie nɩɩ nɛ. Ʋ bɩ harɩŋ joŋo yɩyɩaba.

25 Dɩ ŋ nɩaa nɛ yʋga a hilimi ŋ yɩrɩŋ lɛ, mɩ jaŋ dɛnnɩŋ a mʋ tɩgɛ wɩalɩŋ ŋ sɩ ŋaa lɛ. Nɩalɩŋ sɩɩ fáŋ sɩpaaŋ, mɩ jaŋ kpʋ pʋsʋŋ a ŋaa Wɩɩsʋlʋŋ a lɩɩsɛ nii-la mɩ sɩ ta.

26 Summoo jaŋ dii kɩaa vɔgɛ. Nɩalɩŋ ma kala sɩ kɔ La Tɩɩna teeŋ jaŋ dɛnnʋ. A leŋ dɩ ba kɛŋ mɩɩ-duduoŋ.

27 Nʋʋkala sɩ hɛ dʋnɩa lɛ jaŋ liisi La Tɩɩna wɩaa a mɩɩra kɔ ʋ teeŋ. Tinteye-la sɩ hɛ dʋnɩa lɛ nɩaa kala jaŋ kpirimi ʋ sɩpaaŋ a chʋɔlʋ,

28 bɛɛ wɩaa La Tɩɩna nɛ kuoro, a kɛŋ doluŋ a bibeŋ tinteyee kala.

29 Nɩalɩŋ kala sɩ kɛŋ kɩaa kɩŋkɛŋ jaŋ kʋ kpirimi ŋ sɩpaaŋ. Nɩalɩŋ ma naaŋ sɩɩ lieŋi sʋʋŋ bʋa lɛ a bɩ wuo wiesee yi kala jaŋ kʋ kpirimi ŋ sɩpaaŋ a chʋɔlʋŋ.

30 La Tɩɩna, nɩalɩŋ ba ha sɩ jaŋ lʋl, ba ma jaŋ nɩɩ ŋ wɩaa a toŋ.

31 Ba jaŋ bʋl ŋ tʋɔpʋla wɩaa a pɩ nɩalɩŋ ba ha sɩ bɩ lʋla a bʋl: “La Tɩɩna laa ʋ nɩaa ta nɛ.”

©Ghana Institute of Linguistics Literacy and Bible Translation 1984, 2014

Wycliffe Bible Translators, Inc.
ကြှနျုပျတို့နောကျလိုကျပါ:



ကြော်ငြာတွေ