WƖA YƖƖLAA 21 - WƖA TENIŊ

Yɩɩl-la Devit sɩ yɩɩ pɩ gɔgʋ-hɩaŋ.

¹ La Tɩɩna, ŋ doluŋ nɛ leŋe kuoro tʋɔŋ tɔrɛ, ʋ faasa jʋjʋɔsɛ a tɩŋ ŋ sɩ́ leŋe ʋ yuo dii ʋ dʋndɔŋŋɔɔ.

² Ŋ ŋaa wɩalɩŋ kala ʋ sɩɩ chɛ nɛ a pʋ. Wɩalɩŋ ʋ sɩ pɩɛsɩŋ chɩchɛ, ŋ bɩ ʋ vɔmɔ.

³ Ŋ chaga laaʋ nɛ, a pɛ ʋ lɛ woruŋ a joŋ sɛlɩmɛ sɩ chaasa zɔŋ ba sɩ kaa ŋaa kuoru nyunchuulo a chuu.

⁴ Ʋ sʋlʋŋ nɛ dɩ ŋ pʋ mɩɩsɩŋ, ŋ joŋ mɩɩ-duduoŋ a pʋ.

⁵ Ŋ sɩ leŋe kuoru-la yuo dii ʋ dʋndɔŋŋɔɔ, ŋɩɩ leŋe ʋ chaasa laa yɩrɩŋ nɛ ba zizilu.

⁶ Ŋ ŋaa wʋzɔŋŋɔɔ sɩ bɩ dɛrɛ nɛ a pʋ, a leŋ ʋ tʋɔŋ chaasa tɔrɛ a tɩŋ ŋ sɩ kpagʋ wɩaa.

⁷ La Tɩɩna Wɩa sɩ kɩɩ kʋŋkala, kuoru-la joŋ ʋ yɩɛlaa hɛ ŋ lɛ nɛ. Ŋ chonuŋ sɩ bɩ dɛrɛ wɩaa nɛ tɩɩ ŋ bɩ jaŋ leŋ dɩ ba yuo diiu.

⁸ La Tɩɩna, ŋ naduo-la nɛ ŋ jaŋ kaa kɛŋ ŋ dʋndɔŋŋɔɔ kala, a ŋmooba lo.

⁹ Bʋa-la lɛ ŋ sɩ jaŋ kɔ, ŋ jaŋ cheiba a nagɛ nyiniŋ sɩ dii kɩaa. Ŋ-na La Tɩɩna baanɩŋ jaŋ nagɛ nyiŋgeliŋ a jomba dii.

¹⁰ Ŋ jaŋ chei ba doho nɩaa kala dɩ ba nyɩɩgɛ tinteeŋ lɛ. Ba yɩrɩŋ jaŋ lɛl nɩaa tʋɔŋ.

¹¹ Wʋbɔmɔ-la kala ba sɩ vʋʋra dɩ ba ŋaa ŋ lɛ, ba bɩ jaŋ na wombiiŋ.

¹² Ŋ jaŋ leŋ dɩ ba mɩɩra fá dɩ ŋ nɛ lɛrɛ toŋ a pɛ ba lɛ.

¹³ La Tɩɩna, laa dɛnnɩŋ, ŋ doluŋ yʋga. La jaŋ yɩɩ yɩɩlaa a dɛnnɩŋ a tɩŋ ŋ doluŋ wɩaa.