WƖA YƖƖLAA 20 - WƖA TENIŊ

Yɩɩl-la Devit sɩ yɩɩ pɩ gɔgʋ-hɩaŋ.

¹ Mɩɩ sʋl La Tɩɩna bʋa-la lɛ wɩaa sɩ jaŋ jʋʋŋ, dɩ ʋ jegile nɩɩ ŋ teeŋ, a leŋ dɩ Jekɔb Wɩa pɔŋ,

² a leŋ dɩ ʋ lɩɩ ʋ dɩɩ-bal-la tʋɔŋ a kʋ pɛ ŋ lɛ a lɩɩ Jerusalɛm lɛ a kʋ chɩŋ ŋ harɩŋ.

³ A leŋ dɩ ʋ liise yi ŋ Wɩɩsʋllɩ kɩaa arɩ ŋ kʋnyɩgaa Wɩɩsʋlʋŋ kɩaa lɛ, dɩ ʋ tʋɔŋ tɔrɛ dɩ ʋ laaba,

⁴ a leŋ dɩ ʋ pɩŋ kɩalɩŋ kala ŋ sɩɩ chɛ, dɩ wɩɩkala ŋ sɩɩ bɩɩnʋ vɛŋ woruŋ pɩŋ.

⁵ Ŋɩɩ nɛ ŋ jaŋ yuo dii ŋ dʋndɔŋŋɔɔ, dɩ la tʋɔŋ tɔrɛ dɩ la gbiele ŋaa goŋ, a kɛŋ la jɔnjɔmba je la Wɩa yɩrɩŋ lɛ. A leŋ dɩ La Tɩɩna pɩŋ wɩalɩŋ kala ŋ sɩɩ chɛ.

⁶ Mɩ lɛɛlɛ jɩma arɩ La Tɩɩna laa kuoru-la ʋ sɩ lɩɩsa a ta nɛ. Ʋ hɛ ʋ jaŋ sɩ zɔmɔ a bɩ disiniŋ kɛnɛ lɛ nɛ aŋ laa ʋ sʋla. Ʋ naduo-la nɛ ʋ kaa laaʋ ta.

⁷ Nɩaa dɔnsʋŋ joŋ ba yɩɛlaa hɛ ba laalɩyuori janɩŋ torukoba arɩ ba janɩŋ doluŋ lɛ nɛ, ama la-na joŋ la yɩɛlaa kala hɛ La Tɩɩna Wɩa lɛ nɛ.

⁸ Nɩdosunuŋ deemba jaŋ gɛrɛ tel, ama la-na jaŋ kɛŋ doluŋ a chɩŋ kpaŋkpaŋ.

⁹ La Tɩɩna, laa kuoru-la ta! Dɩ la nɛ yɩrɩŋ, nɩɩ a fá la bunso.