WƖA YƖƖLAA 19 - WƖA TENIŊ

Yɩɩl-la Devit sɩ yɩɩ pɩ gɔgʋ-hɩaŋ.

¹ Wɩa-nyuŋ kɩaa kala ka dagɛ ŋɩɩ Wɩa tʋla sɩ maga nɛ, baa dagɛ wɩalɩŋ ʋ sɩ ŋaa nɛ.

² Tapʋlʋŋ yie bʋl Wɩa tʋla wɩaa a pɩ tapʋlʋŋ dɔŋɔ, tɩtaŋɩŋ ma bʋl ʋ tʋla wɩaa pɩ tɩtaŋɩŋ dɔŋɔ.

³ Ŋ bɩ ba wʋbʋlʋŋ koo ba yikoro ka nɩɩ.

⁴ Ama ba wʋbʋlaa ka yi dʋnɩa lee-kala nɛ. Dʋnɩa nʋʋkala nɛ nɩɩ ba yikoro. Wɩa hɛ lɛbɩŋ nɛ wɩa-nyuŋ a pɩ wɩɩpɔsʋŋ ʋ jʋjʋʋ.

⁵ Ʋ yie kʋ lɩɩ chʋchʋɔŋ a nagɛ ha-falɩŋ bala, koo a nagɛ fɩfaarɩ-wajɩa sɩ kɛŋ ʋ tɩtɩa hɛ dɔŋɔ dɩ ʋ fá pagɩsɛ.

⁶ Ʋ yie suomi wɩa-nyuŋ sɛmɛ dɔŋɔ, a vɛŋ ŋɩɩ deeŋ deeŋ a mʋ dɛrɛ sɛmɛ dɔŋɔ. Kʋŋkala bɩ jaŋ wuo faa dɩ ʋ wulumuŋ sɩ́ ʋ yi.

⁷ La Tɩɩna wombiee ʋ sɩ bile dɩ la tuto chaasa zɔŋ nɛ, a pɩpɩla dol-falɩŋ. Wɩalɩŋ La Tɩɩna sɩ daga ŋaa wɩa ŋ sɩ jaŋ wuo joŋ ŋ yɩɛlaa hɛ nɛ. Ba nɩɩ pɩ nɩalɩŋ sɩ bɩ wɩaa jɩŋ woruŋ wʋjɩmɩŋ.

⁸ Niiri-la La Tɩɩna sɩ bile dɩ la tuto chaasa tʋʋlɛ nɛ, nɩalɩŋ sɩɩ toba yie kɛŋ tʋɔtɔrʋŋ nɛ. La Tɩɩna wʋdagaa kɛŋ pʋlʋmʋŋ nɛ a susuri nɩaa sɩaa.

⁹ Dɩ ŋ nɩɩ fá La Tɩɩna, ŋɩɩ ŋaa wʋzɔŋ nɛ, ŋɩɩ jaŋ hɛ nɩmɛ a kaa mʋ wuu. Wɩalɩŋ La Tɩɩna sɩ sɩ la tuto kala ŋaa wʋtɩtɩɩba nɛ, gɩrɩma tuo ba lɛ.

¹⁰ Ba nɛ yuŋŋie kɩɩ sɛlɩmɛ, ba nɛ zɔmɔ kɩɩ sɛlɩmɛ sɩ chaasa zɔŋ. Ba nɛ sɩma ma a kɩɩ tʋʋŋ, ba nɛ sɩma kɩɩ tʋʋ-pɛɛŋ.

¹¹ Ba lɛ nɛ ŋ to a kpʋrɩsɛ mɩ-na ŋ tɩntɩnna dɩgɩlaa. Mɩ sɩ sɛɩba, ŋ timmi a yʋgɛ nɛ woruŋ.

¹² La kʋŋkala bɩ la wʋcheelee wuo jɩŋ. Dɩ mɩ nɛ ŋaa wʋbɔŋ aŋ bɩ jɩŋ, joŋo chɛmɛ.

¹³ Sɩ́ leŋe dɩ mɩ-na ŋ tɩntɩnna sɛŋ aŋ ŋɩŋaa wʋbɔŋŋɔɔ. Sɩ́ leŋe dɩ wʋbɔŋŋɔɔ ŋaanɩŋ kɛŋ doluŋ mɩ lɛ. Dɩ ŋ nɛ ŋaa ŋɩɩ, ŋɩɩ jaŋ leŋ dɩ mɩ lɩɩ wʋbɔŋŋɔɔ lɛ suoo a sɩ́ wʋcheeli kala kɛŋ.

¹⁴ Leŋ dɩ mɩ tʋɔbɩɩnaa arɩ mɩ niiŋ wʋbʋlaa tʋtɔrɛ ŋ tʋɔŋ. La Tɩɩna, ŋ nɛ kɛŋ doluŋ a nagɛ bʋŋ a laamɛ tɩta.