WƖA YƖƖLAA 18 - WƖA TENIŊ

Yɩɩl-la La Tɩɩna tɩntɩnna Devit sɩ yɩɩ pɩ gɔgʋ-hɩaŋ bʋa-la lɛ La Tɩɩna sɩ laaʋ ta ʋ dʋndɔŋŋɔɔ arɩ kuoro Sɔɔl kala nɩsɩŋ lɛ.

¹ Mɩ choŋ nɛ woruŋ La Tɩɩna, ŋ nɛ mɩ doluŋ.

² La Tɩɩna, ŋ nagɛ bʋŋ nɛ mɩ teeŋ, ŋ nɛ mɩ dɩ-duoŋ, ŋ nɛ laamɛ tɩta. Mɩ Wɩa, ŋ nagɛ bʋŋ nɛ mɩ teeŋ, ŋ nɛ mɩ yuori. Ŋ nɛ chu tɔmɛ, ŋ nɛ laamɛ tɩta, ŋ nɛ mɩ dɩ-duoŋ.

³ Mɩɩ dɛnnɩŋ La Tɩɩna, mɩ sʋla yɩrɩŋ nɛ, ŋ laamɛ ta mɩ dʋndɔŋŋɔɔ nɩsɩŋ lɛ.

⁴ Sʋʋŋ vɔɔmɛ nɛ arɩ ʋ ŋmɛsɩŋ, a nagɛ fuo sɩ suo, ʋ fa ka mʋa dɩ ʋ pɛllɛ jommi a liŋ.

⁵ Sʋʋŋ ŋmɛsɩŋ vɔɔmɛ nɛ a golli, aŋ ka ʋ bɛrɩsɩŋ ma gbɛrɛmɛ.

⁶ Wɩaa fa chaasa jʋʋmɛ nɛ, mɩ bunso pɩ ŋ-na mɩ Tɩɩna Wɩa dɩ ŋ pɛ mɩ lɛ. Ŋ hɛ ŋ dɩɩ-bal-la lɛ nɛ aŋ nɩɩ mɩ yikoro, mɩ nii-ŋmobo-la kala jʋʋ ŋ dɩgɩlaa nɛ.

⁷ Ŋ sɩ na baanɩŋ, tinteeŋ zigile nɛ, peelee ma jigisi a tuu kɛŋ ba gentisiŋ pɛ.

⁸ Ka nyʋɔsʋŋ lɩlɩɩ ŋ-na La TƖƖNA mɩɩ-boyee lɛ, nyiŋgeliŋ arɩ nyiŋ-hal-muloo maa lɩɩ ŋ niiŋ lɛ.

⁹ Ŋ kɛŋ wɩa-nyuŋ bɛgɛ ta nɛ aŋ kʋ tuu, ka duoŋ-bɩlɩmbaaŋ-bisiŋ hɛ ŋ naasɩŋ bʋbʋɔŋ.

¹⁰ Ŋ sagɛ kɩalɩŋ sɩ kɛŋ kɩŋkɛnsɩŋ a nagɛ Wɩa tɩndaaraa nyuŋ nɛ a file to peliŋ lɛ a kʋ tuu.

¹¹ Ŋ leŋe birimiŋ nagɛ lɛbɩŋ nɛ a golluŋ, ka duoŋ-bɩlɩmbaaŋ-bine ma tɔŋ.

¹² Ŋ sɩpaaŋ nɛ, duoŋ-tabɩaa arɩ nyiŋ-hal muloo lɩɩ duoŋ sɩ lɩgɩsa tʋɔŋ a ŋmoo duoŋ-bɩlɩmbaaŋ-bine-la pɩsɛ.

¹³ La Tɩɩna sɩ kɩɩ kʋŋkala, ŋ sɩ kpɩa goŋ wɩa-nyuŋ, leriŋ kala chɩɩma nɛ.

¹⁴ Ŋ yuo ŋ to-hɛŋŋɛɛ nɛ ŋ dʋndɔŋŋɔɔ pɩsɛ, ba nagɛ duonuŋ sɩ lɩgɩsa nɛ a kiriba ta ba fá.

¹⁵ La Tɩɩna, ŋ sɩ kpɩa mʋgʋ-balɩŋ lɛ, ʋ lɩɩŋ kala hʋa nɛ a nyɩɩsɛ tinteeŋ lɛ. Ŋ sɩ wiese ma, tinteeŋ zigile nɛ.

¹⁶ Ŋ lɩɩ wɩa-nyuŋ nɛ a kʋ tuu, a liirimi lɩɩŋ sɩ luŋie tʋɔŋ.

¹⁷ Ŋ nɛ laamɛ ta mɩ dʋndɔŋŋɔɔ nɩsɩŋ lɛ, nɩalɩŋ sɩ chaasa kɛŋ doluŋ a kɩɩmɛ.

¹⁸ Tapʋlɩɩ-la wʋlɔrʋnʋŋ sɩ jʋʋmɛ, ba sii kɔ dɩ ba yuomi, ŋ-na La TƖƖNA sii chɩŋ nɛ a pɔmɛ.

¹⁹ Ba sɩ tɔmɛ hɛ, ŋ nɛ lɩɩsɛmɛ ta pʋlʋŋ-jaala lɛ. Ŋ chomi nɛ, ŋɩɩ nɛ tɩɩ ŋ laamɛ ta.

²⁰ La Tɩɩna ŋaa wɩalɩŋ mɩ lɛ a tɩŋ mɩ sɩ ŋaa tʋɔpʋl tɩɩna wɩaa nɛ. Mɩ sɩ bɩ disiŋ kala kɛnɛ nɛ tɩɩ ŋ siilimi.

²¹ Mɩɩ to La TƖƖNA wombiee nɛ, mɩ ha bɩ Wɩa harɩŋ lɩa a ŋaa wʋbɔŋ.

²² Mɩɩ to wombie-la ŋ sɩ bile nɛ, mɩ bɩ wɩalɩŋ ŋ sɩ daga dɩ la tuto kʋŋkala vɩa.

²³ Mɩ bɩ wʋcheeli kɛnɛ ŋ sɩpaaŋ. Mɩ kɛŋ mɩ tɩtɩa nɛ dɩ mɩ sɩ́ wʋbɔŋ kala ŋaa.

²⁴ Mɩ sɩ ŋaa tʋɔpʋl tɩɩna wɩaa nɛ tɩɩ La TƖƖNA siilimi, mɩ sɩ bɩ disiŋ kɛnɛ ʋ sɩpaaŋ nɛ tɩɩ ʋ ŋaa ŋɩɩ mɩ lɛ.

²⁵ Nɩalɩŋ sɩ kɛŋ wʋtɩtɩɩ ŋ teeŋ, ŋ ma yie dagɛ ŋ wʋtɩtɩɩ pɩba nɛ. Nɩɩ-la ma sɩɩ ŋaa wɩaa ba bʋa lɛ, ŋ yie ŋaa wɩaa ba bʋa lɛ nɛ a pʋ.

²⁶ Nɩalɩŋ ma sɩ kɛŋ tʋɔpʋla, ŋ yie pʋllɛ ŋ tʋɔŋ pɩba nɛ, ama nɩalɩŋ wɩaa sɩ golibo, ŋ yie hosi ba nyuŋ nɛ.

²⁷ Ŋ laa nɩalɩŋ sɩ kɛŋ ba tɩtɩa muuri a ta nɛ, aŋ kɛŋ nɩalɩŋ sɩɩ bigisi ba tɩtɩa lɛ muuri.

²⁸ Mɩ Tɩɩna, ŋ leŋe mɩ chaanɩŋ chol nɛ a didii, mɩ Wɩa leŋe biriŋ-la tʋɔŋ mɩ sɩ hɛ bɩrɩmɛ pʋlʋmʋŋ nɛ.

²⁹ Ŋ pɛ mɩ lɛ nɛ mɩ yuo dii laalɩyuoroo, ŋ-na Wɩa leŋe mɩ yuo dii tasɩŋ ba sɩ saa kɛrɩsɩŋ golli nɛ.

³⁰ Mɩ Wɩa, ŋ wombiiŋ chaasa zɔŋ nɛ. Ŋ wɩaa ma tʋʋlɛ. Ŋ nagɛ hɔɔtaala-la laalɩyuoroo sɩ kaa kɛrɛɛ laa bayuori hɛŋŋɛɛ nɛ, a chu tɔ nɩalɩŋ sɩ kʋ yuoruŋ.

³¹ Wɩa dɔŋ hɛ nɩmɛ a pɛ La Tɩɩna, Wɩa lɛɛ? Kʋbɛɛ nɛ kɛŋ doluŋ dɩ la Wɩa dee?

³² Wɩa nɛ pɩmɛ doluŋ a leŋ mɩ wombiiŋ chaasa zɔŋ.

³³ Ŋ nɛ leŋe mɩ naachɛɛŋ lɩŋ a nagɛ aamɩŋ. Ŋ pɛ mɩ lɛ nɛ mɩ wuo jɩla chɩŋ peelee nyuŋ.

³⁴ Ŋ nɛ gʋnnɛmɛ laalɩŋ yuonuŋ. Mɩ jaŋ wuo yuo toŋ-la ba sɩ kɛŋ kɔlɩɩŋ ŋaa.

³⁵ Ŋ chu tɔmɛ nɛ a laamɛ ta. Ŋ nɩsɩ-la sɩ kɛŋ doluŋ nɛ ŋ kaa chɩŋ mɩ harɩŋ. Ŋ pɛ mɩ lɛ nɛ a leŋ mɩ ŋaa nɩbal.

³⁶ Ŋ nɛ pori mɩ wombiiŋ ʋ jal, dɩ mɩ sɩ́ mɩ naaŋ joŋo ŋmoo.

³⁷ Mɩ kire kɛsɛ mɩ dʋndɔŋŋɔɔ nɛ, mɩ bɩ harɩŋ mɩɩra aŋ cheiba.

³⁸ Mɩ ŋmooba lo mɩ naasɩŋ bʋbʋɔŋ nɛ, ba bɩ wuo sii. Mɩ yuo diiba nɛ.

³⁹ Ŋ pɩmɛ doluŋ nɛ mɩ kaa yuo laalɩŋ, a yuo dii mɩ dʋndɔŋŋɔɔ.

⁴⁰ Ŋ leŋe mɩ dʋndɔmɔ-la mɩɩra fɩfá nɛ, ka mɩ kire kpʋba.

⁴¹ Ba ŋmoo niiŋ a chɩchɛ nʋʋ nɛ dɩ ʋ pɛ ba lɛ, ka nʋʋ tuo dɩ ʋ laaba ta. Ba yɩrɛ ŋ-na La TƖƖNA ma, ŋ fʋʋla yagɛba.

⁴² Mɩ ŋmooba, ba kala bɩɩ a nagɛ kʋŋkɔlʋŋ peliŋ sɩ paa. Mɩ nʋɔsɛba a nagɛ vʋchɔɔŋ sɩ hɛ womporuŋ lɛ.

⁴³ Ŋ nɛ laamɛ ta nɩalɩŋ sɩɩ yuomi nɩsɩŋ lɛ, a leŋ mɩ ŋaa tintee-wogusuŋ sɩpaalaara. Lɛɛlɛ ba ŋaa mɩ tɩntɩnnaa nɛ.

⁴⁴ Dɩ mɩ nɛ bʋl wɩɩ, ba yie nɩɩ nɛ a to mɩ niiŋ. Tintee-wogusuŋ nɩaa ka kpirimi mɩ sɩpaaŋ nɛ.

⁴⁵ Ba nandaasɩŋ kala nɛ yʋɔra, ba lɩɩ ba dɩ-duoruŋ lɛ a chele kʋkɔ.

⁴⁶ Ŋ-na La Tɩɩna weye nɛ. Mɩ jaŋ dɛnnɩŋ, ŋ kɛŋ doluŋ a nagɛ bʋŋ nɛ. Mɩ jaŋ heele bʋl Wɩa sɩ laamɛ ta yɩrɩ-balɩŋ wɩaa.

⁴⁷ Ŋ nɛ Wɩa a laa mɩ dʋndɔŋŋɔɔ yuo pɩmɛ, a joŋ tinteyee nɩaa pɩmɛ mɩ bibeŋ.

⁴⁸ Ŋ nɛ laamɛ ta mɩ dʋndɔmɔ-la sɩ cho yuosuŋ woruŋ nɩsɩŋ lɛ, a leŋ mɩ ŋaa nɩbal a kɩɩ ba kala.

⁴⁹ Ŋɩɩ wɩaa, mɩ Tɩɩna, mɩ jaŋ dɛnnɩŋ tinteyee nɩaa tʋɔŋ. Mɩ jaŋ yɩɩ yɩɩlaa a dɛnnɩŋ.

⁵⁰ Ŋ nɛ leŋe mɩ-na ŋ kuoro Devit yuo dii. Ŋ dagɛ ŋ chono-la sɩ bɩ dɛrɛ nɛ a pɩ mɩ-na, nɩɩ-la ŋ sɩ lɩɩsa arɩ mɩ doho nɩaa a kaa mʋ wuu.