WƖA YƖƖLAA 17 - WƖA TENIŊ

Devit Wɩɩsʋlʋŋ.

¹ La Tɩɩna, mɩɩ sʋlʋŋ arɩ tʋɔpʋla, jegile nɩɩ mɩ nii-ŋmobo a pɛ mɩ lɛ. Mɩ kɛŋ wʋtɩtɩɩ nɛ a sʋsʋlʋŋ, jegile nɩɩ mɩ teeŋ.

² Ŋ dʋndʋŋa nɛ jaŋ wuo bʋl arɩ mɩ bɩ wɩɩ jɩŋ, bɛɛ wɩaa ŋ dʋndʋŋa nɛ jɩŋ wʋtɩtɩɩ.

³ Ŋ jɩŋ mɩ tʋɔŋ nɛ. Ŋ kɔ mɩ teeŋ nɛ tɩtaŋɩŋ a bemmi woruŋ a na dɩ mɩ bɩ wɩɩkala jɩŋ. Mɩ kɛŋ mɩ tʋɔŋ lɛ nɛ arɩ mɩ bɩ jaŋ bʋbʋl wʋbɔŋŋɔɔ.

⁴ Mɩ bɩ wɩalɩŋ nɩbɔŋŋɔɔ sɩɩ ŋaa ka to, ama wɩalɩŋ ŋ sɩ daga nɛ mɩ tuto. Mɩ bɩ yuo-hɛɛrʋ ŋaa.

⁵ Mɩ sɩɩ to ŋ wombiiŋ, mɩ bɩ begile.

⁶ Mɩ Wɩa, mɩɩ sʋlʋŋ, bɛɛ wɩaa mɩ jɩma ŋ jaŋ pɛ mɩ lɛ. Jegile nɩɩ aŋ laa mɩ Wɩɩsʋlʋŋ.

⁷ Dagɛ ŋ chono-la sɩ yʋga pɩmɛ. Ŋ nɩɩ pɔ nɩalɩŋ sɩ yuoruŋ a laaba tɩta ba dʋndɔŋŋɔɔ nɩsɩŋ lɛ.

⁸ Pɔmɛ arɩ ŋ sɩ jaŋ pɔ ŋ tɩtɩa sɩɩ-biiŋ ŋɩɩ. Kɛmmɛ faa ŋ kɩŋkɛnsɩŋ bʋbʋɔŋ.

⁹ Sɩ́ leŋe dɩ nɩbɔŋŋɔɔ yuomi, sɩ́ leŋe dɩ mɩ dʋndɔŋ-bisiŋ ma tɔmɛ hɛ.

¹⁰ Ba bɩ nɩaa nenige ka fá, aŋ bibigisi ba tɩtɩa lɛ.

¹¹ Ba to naasɩŋ kɛmmɛ nɛ, a lɛɛlɛ gollimi chu. Ba sɩaa kala pɛ mɩ lɛ dɩ ba nyagɛmɛ ŋmʋrɛ tinteeŋ.

¹² Ba nagɛ losuŋ sɩ kɛŋ naachigiŋ nɛ ʋ gɔllɔ chɩchɛ kʋdiilee koo naachigi-duoŋ sɩ faa gbɛrɛ dɩ ʋ kɛŋ kʋa.

¹³ La Tɩɩna, sii chemba, a yuo diiba. Joŋ ŋ tokobiiŋ a yuo laamɛ ta nɩbɔŋŋɔɔ deemba nɩsɩŋ lɛ.

¹⁴ Laamɛ ta nɩalɩŋ time kala sɩ hɛ dʋnɩa deeŋ nɩsɩŋ lɛ. Joŋ hɛɛ-la ŋ sɩ joŋo bil a gbɛrɛba a dɔgɩsɛba. Leŋ dɩ ʋ yi ba biiriŋ, aŋ ka dɩ mʋa ha ka a gbɛrɛ ba nihee ma.

¹⁵ Ama mɩ-na jaŋ naŋ, bɛɛ wɩaa mɩ ŋaa tʋɔpʋl tɩɩna nɛ. Dɩ mɩ nɛ sie, mɩ yie na ŋɩɩ ŋ sɩ naga nɛ, mɩ tʋɔŋ tɔrɛ.