WƖA YƖƖLAA 16 - WƖA TENIŊ

Yɩɩl-la Devit sɩ yɩa.

¹ Mɩ Wɩa, pɔmɛ, mɩ yuoruŋ nɛ.

² Mɩ bʋla pɩ La Tɩɩna, “Ŋ nɛ mɩ Tɩɩna, kʋzɔmɔ-la kala mɩ sɩ kɛnɛ, ŋ nɛ pɩmɛ.”

³ Ŋ nɩaa wɩaa chaasa zɔŋ nɛ woruŋ, mɩ tʋɔŋ tɔrɛ ba nyuŋ nɛ.

⁴ Ama nɩalɩŋ sɩɩ to vesiŋ, ba tʋɔŋ jaŋ chei kɩŋkɛŋ. Mɩ-na bɩ jaŋ kpaarɛ vesi-la koo a kɛŋ ba yɩrɩŋ tɩŋ.

⁵ La Tɩɩna, ŋ dʋndʋŋa nɛ ŋaa kpaal-la mɩ sɩ kɛnɛ, ŋ nɛ pɩmɛ kɩalɩŋ kala mɩ sɩɩ chɛ. Mɩ chie kala hɛ ŋ nɩsɩŋ lɛ nɛ.

⁶ Mɩ tʋɔŋ tɔrɛ kpaal-la ŋ sɩ pɩmɛ nyuŋ nɛ woruŋ, ba ŋaa tʋɔtɔrɛ dʋa nɛ.

⁷ Mɩ jaŋ dɛnnɛ La Tɩɩna, Nɩɩ-la sɩɩ dagɛmɛ. Tɩtaŋɩŋ ma paala, wɩalɩŋ ŋ sɩ dagɛmɛ ha yie hɛ mɩ nyuŋ lɛ nɛ, a liliisimi.

⁸ Mɩ jɩma La Tɩɩna yie hɛ mɩ teeŋ nɛ bʋa na-kala. Ʋ kpagɛmɛ nɛ, wɩɩkala bɩ jaŋ wuo jigisimi.

⁹ Ŋɩɩ wɩaa, mɩ tʋɔŋ tɔrɔ nɛ mɩ jʋjʋɔsɛ, wɩɩkala bɩ jaŋ ŋaa mɩ lɛ.

¹⁰ Mɩ nɛ ŋaa nɩɩ-la ŋ sɩ lɩɩsa, ŋ bɩ jaŋ leŋ dɩ mɩ ka bʋa tʋɔŋ, koo a mʋ lɛlɛɛ-jaŋ.

¹¹ Ŋ dagɛmɛ wombii-la mɩ sɩ jaŋ to a kɛŋ mɩɩsɩŋ nɛ. Ŋ sɩ kpagɛmɛ, ŋɩɩ leŋe mɩ tʋɔŋ tɔrɛ nɛ. Mɩ tʋɔŋ jaŋ tɔrɛ bʋa na-kala mɩ sɩ jaŋ hɔŋ ŋ nadiiŋ.