WƖA YƖƖLAA 148 - WƖA TENIŊ

Kʋŋ na-kala sɩ hɛ nɩmɛ, má dɛnnɛ Wɩa

¹ Má dɛnnɛ La Tɩɩna. Wɩa-nyuŋ kɩaa kala, má dɛnnɛ La Tɩɩna. Kɩalɩŋ kala sɩ hɛ wɩa-nyuŋ balegi balegi, má dɛnnʋ.

² Wɩa tɩndaaraa kala, má dɛnnʋ, kɩalɩŋ kala sɩ hɛ wɩa-nyuŋ, má dɛnnʋ.

³ Wɩɩpɔsʋŋ arɩ chɛnɛ, má dɛnnʋ, chɛnwʋlaa kala sɩɩ chaanʋ, má dɛnnʋ.

⁴ Wɩa-nyuŋ dɩ-bolii arɩ lɩɩ-la kala sɩ hɛ wɩa-nyuŋ, má dɛnnʋ.

⁵ Má leŋ dɩ ba kala dɛnnɛ La Tɩɩna. Ʋ wʋbʋlaa nɛ leŋe ba kala hɛ nɩmɛ.

⁶ Ʋ leŋe ba chɩŋ ba dɩchɩnaa nɛ a kaa mʋ wuu, ba bɩ jaŋ wuo vɩa ʋ niiŋ.

⁷ Tinteeŋ kɩaa kala arɩ kɩalɩŋ kala sɩ hɛ mʋgʋ-balɩŋ tʋɔŋ, má dɛnnɛ La Tɩɩna,

⁸ duoŋ-lɩgɩsɩŋ arɩ duoŋ-tabɩaa, bʋrʋŋ arɩ duoŋ-bɩlɩmbaanɩŋ, duoŋ-peliŋ sɩɩ to La Tɩɩna niiŋ,

⁹ peelee arɩ dundolluŋ kala, tɩɩsɩ-la sɩɩ nɛŋ arɩ kuolusuŋ kala,

¹⁰ bagɩlaa arɩ pʋsʋŋ, kɩalɩŋ kala sɩɩ tuuri tinteeŋ arɩ zaaraa,

¹¹ dʋnɩa kuoroo arɩ tinteyee kala, tɩntɩnnɩ-hɩasɩŋ arɩ sɩpaalaaraa,

¹² bapʋɔsɩ-biisiŋ arɩ hatol-biisiŋ, banɩhɩasɩŋ arɩ hambiisiŋ.

¹³ Kɩaa deemba kala, má dɛnnɛ La Tɩɩna. Ʋ dʋndʋŋa yɩrɩŋ nɛ maga dɩ ma yɩrɛ. Ʋ kɛŋ doluŋ a kɩɩ kʋŋkala sɩ hɛ tinteeŋ arɩ wɩa-nyuŋ.

¹⁴ Ʋ nɛ joŋ doluŋ a pɩ ʋ nɩaa Iziral tɩŋŋaa dɩ ba wuo dɛnnʋ. Ba nɛ nɩalɩŋ ʋ tʋɔŋ sɩ kɛnɛ woruŋ. Má dɛnnɛ La Tɩɩna.