WƖA YƖƖLAA 147 - WƖA TENIŊ

Má dɛnnɛ Wɩa doluŋ kala Tɩɩna

¹ Má dɛnnɛ La Tɩɩna. Ʋ ŋaa wʋzɔŋ nɛ dɩ la yɩɩ yɩɩlaa a dɛnnɛ la Wɩa, la tʋɔŋ jaŋ tɔrɛ dɩ la nɛ dɛnnʋ.

² La Tɩɩna nɛ wasa saa Jerusalɛm, ʋ nɛ kɛŋ Iziral tɩŋŋaa fa sɩ hɛ yoŋ-baga lɛ mɩɩra kɔ ba jaŋ.

³ Ʋ leŋe nɩalɩŋ tʋɔŋ sɩ cheye bɩra tɔrɛ nɛ, aŋ vɔɔ tɔ ba naawɩɩlaa ma.

⁴ Ʋ nɛ leŋe chɛnwʋlaa magɛ ŋɩɩ a hɛ wɩa-nyuŋ, ʋ jɩŋ ba kʋŋkala yɩrɩŋ nɛ.

⁵ La Tɩɩna nɛ yʋga, a kɛŋ doluŋ ma, ʋ wʋjɩmɩŋ bɩ dɩdɛrɩ kɛnɛ.

⁶ La Tɩɩna nɛ yie kɛŋ nɩalɩŋ sɩ kɛŋ ba tɩtɩa muuri ŋaa ba yʋgɛ, aŋ nʋɔsɛ nɩbɔŋŋɔɔ bil tinteeŋ.

⁷ Má yɩɩ yɩɩlaa a lʋlɔllɛ La Tɩɩna, má du cheŋ a yɩɩ yɩɩlaa a pɩ la Wɩa.

⁸ Ʋ nɛ leŋe duoŋ-bɩlɩmbaanaa tɔ wɩa-nyuŋ. Ʋ nɛ leŋe duonuŋ nɩnɩɩ a ŋaa yaŋ nyʋ tinteeŋ lɛ.

⁹ Ʋ nɛ yie pɩ pʋsʋŋ ba kʋdiilee, a pɩ diibiisiŋ ma sɩ yelee chɛ kʋdiilee.

¹⁰ La Tɩɩna sɩpaa kala tuo janɩŋ sɩ kɛŋ doluŋ lɛ, koo laalɩyuoroo sɩ dolie lɛ.

¹¹ La Tɩɩna cho nɩalɩŋ sɩɩ fáʋ nɛ, nɩalɩŋ sɩ joŋ ba yɩɛlaa kala hɛ ʋ chono-la sɩ bɩ dɛrɛ lɛ.

¹² Ma nɩalɩŋ sɩ hɛ Jerusalɛm lɛ, má dɛnnɛ La Tɩɩna, ma Zaayɔŋ nɩaa, má kʋ dɛnnɛ ma Wɩa.

¹³ Ʋ nɛ ŋaa ma taŋ boi-baalaa kɛŋ doluŋ, aŋ ŋaa wʋzɔŋŋɔɔ ma pɩ ma nɩaa sɩ hɛ taŋ-la lɛ.

¹⁴ Ʋ nɛ leŋe ma tinteeŋ kɛŋ yarɩfɩɛlaa, aŋ pɩma mɛmpɛ sɩ chaasa zɔŋ a yʋgɛ.

¹⁵ Ʋ sɩ bʋl wɩaa a pɩ tinteeŋ, wɩalɩŋ guu ŋaa nɛ.

¹⁶ Ʋ leŋe bʋrʋŋ tɔ tinteeŋ nɛ a pʋlla nagɛ kuŋkunuŋ, aŋ leŋ leriŋ bʋgɛ a nagɛ tʋɔrʋŋ ba sɩ mɩsa.

¹⁷ Ʋ nɛ leŋe duoŋ-tabɩaa kʋ tuu tʋtɔ tinteeŋ a nagɛ kpagɛ-nyɩlaa. Ʋ yie ŋaa leriŋ fɩɛlɛ, kʋbɛɛ nɛ jaŋ wuo hɛ ʋ tʋɔŋ?

¹⁸ Dɩ ʋ nɛ bʋl wɩaa, duoŋ-tabɩaa yie yʋɔlɛ nɛ, peliŋ lu, fuonuŋ suomo pɩpɛllɛ.

¹⁹ Ʋ joŋ ʋ niiŋ wɩaa dagɛ Jekɔb nɛ, a joŋ ʋ wombiee ʋ sɩ bile dɩ la tuto arɩ ʋ wʋdagaa a pɩ ʋ nɩaa Iziral tɩŋŋaa.

²⁰ Ʋ bɩ wɩɩŋ deeŋ ŋaa pɩ tintee dɔŋ kala, ba bɩ ʋ wombie-la ʋ sɩ bile dɩ la tuto jɩŋ. Má dɛnnɛ La Tɩɩna.