WƖA YƖƖLAA 146 - WƖA TENIŊ

Má dɛnnɛ La Tɩɩna

¹ Má dɛnnɛ La Tɩɩna. Mɩ dɩma, dɛnnɛ La Tɩɩna.

² Mɩ jaŋ dɛnnɛ La Tɩɩna mɩ mɩɩsɩŋ kala lɛ. Mɩ ha sɩ hɛ mɩ mɩɩsɩŋ lɛ, mɩ jaŋ yɩɩ yɩɩlaa a dɛnnɛ Wɩa.

³ Sɩ́ ŋ yɩɛlaa joŋo hɛ kuoroo lɛ, nuhuobiiŋ kala bɩ jaŋ wuo laaŋ ta.

⁴ Dɩ ba nɛ sʋba, ba yie bɩrɩmɛ hagɩla nɛ, tapʋlɩɩ-la tɩtɩa nɛ wɩalɩŋ kala ba sɩ bɩɩna dɩ ba ŋaa yie dɛrɛ.

⁵ Nɩalɩŋ lɛ Jekɔb Wɩa sɩ pɛ tʋɔŋ jaŋ tɔrɛ, nɩalɩŋ sɩ joŋ ba yɩɛlaa hɛ La Tɩɩna Wɩa lɛ.

⁶ La Tɩɩna nɛ ŋaa wɩa-nyuŋ, tinteeŋ, mʋgʋ-balɩŋ arɩ kʋŋ na-kala sɩ hɛ ba lɛ. Wɩa kɛŋ wʋtɩtɩɩ arɩ wɩalɩŋ kala ʋ sɩ bʋla lɛ nɛ a kaa mʋ wuu.

⁷ Ʋ nɛ yie bʋla laa nɩalɩŋ ba sɩ nyaga bil, aŋ pɩpɩ nɩalɩŋ ma losuŋ sɩ kɛnɛ kʋdiilee. La Tɩɩna nɛ yie laa dansarɩkaba ta.

⁸ La Tɩɩna nɩɩ suri nyʋlɩmaa sɩaa, aŋ kɛŋ nɩalɩŋ ma sɩ tele aa chʋʋlɛ. La Tɩɩna cho tʋɔpʋl tɩŋŋaa.

⁹ La Tɩɩna ka beŋ nʋhʋɔraa nyuŋ nɛ, a chɩna gbɛrɛ biisinsiŋ arɩ yo-haalaa, aŋ chichei nɩbɔŋŋɔɔ wɩaa.

¹⁰ La Tɩɩna nɛ kuoro a kaa mʋ wuu. Zaayɔŋ nɩaa, ma Wɩa nɛ kuoro a kaa mʋ wuu. Má dɛnnɛ La Tɩɩna.