WƖA YƖƖLAA 145 - WƖA TENIŊ

Yɩɩl-la Devit sɩ yɩɩ dɛnnɛ Wɩa.

¹ Mɩ Wɩa, ŋ sɩ ŋaa mɩ kuoro, mɩ jaŋ ziliŋ. Mɩ jaŋ dɛnnɩŋ bʋa na-kala a kaa mʋ wuu.

² Tapʋlɩɩ na-kala mɩ jaŋ dɛnnɩŋ, a yɩrɛ ŋ yɩrɩŋ a kaa mʋ wuu.

³ La Tɩɩna, ŋ yʋga nɛ a magɛ dɩ la faasa dɛnnɩŋ. Ŋ ballɩŋ kɩɩ nuhuobiine jɩmɩŋ nɛ.

⁴ Nɩalɩŋ ba ha sɩ jaŋ lʋl ma jaŋ bʋl wɩalɩŋ ŋ sɩ ŋaa a pɩ ba harɩŋ nɩaa. Ba jaŋ bʋl wʋduoru-la ŋ sɩ ŋaa wɩaa.

⁵ Ba jaŋ bʋl ŋ tʋla arɩ ŋ ballɩŋ wɩaa, ka dɩ mɩ ma kɛŋ ŋ wʋduoru-la ŋ sɩ ŋaa chʋchɔgɩsɛ.

⁶ Ba jaŋ bʋl ŋ doluŋ arɩ ŋ wʋmagɩla-la ŋ sɩ ŋaa wɩaa, ka dɩ mɩ ma heele bʋl wʋbala-la ŋ sɩ ŋaa.

⁷ Ba jaŋ gbieli ŋ wʋzɔmɔ-la sɩ yʋga gbiele, a yɩɩ yɩɩlaa arɩ tʋɔtɔrʋŋ a dagɛ ŋ tʋɔpʋla.

⁸ La Tɩɩna ka fá nɩaa nenige nɛ, a kɛŋ zile. Ʋ baanɩŋ bɩ lɩma lɩma ka sii, ʋ cho nɩaa bʋa na-kala lɛ.

⁹ La Tɩɩna wɩaa zɔmɔ nɛ nʋʋkala teeŋ, ʋʋ fá kɩalɩŋ kala ʋ sɩ ŋaa nisusuŋ nɛ.

¹⁰ La Tɩɩna, kɩalɩŋ kala ŋ sɩ ŋaa jaŋ dɛnnɩŋ. Ŋ nɩaa kala jaŋ ziliŋ.

¹¹ Ba jaŋ bʋl ŋ kuoruŋ sɩ yʋga wɩaa a pɩ nɩaa, aŋ bʋl ŋ doluŋ ma wɩaa.

¹² Ŋɩɩ nɛ nɩaa jaŋ jɩŋ wʋduoru-la ŋ sɩ ŋaa, arɩ ŋ kuoruŋ tʋla sɩ magɛ ŋɩɩ.

¹³ Ŋ kuoruŋ bɩ dɩdɛrɩ kɛnɛ, ŋ nɛ kuoro a kaa mʋ wuu. La Tɩɩna kɛŋ niiri-la kala ʋ sɩ hɛ a tɩtɩŋ nɛ, a cho kɩalɩŋ kala ʋ sɩ ŋaa.

¹⁴ Dɩ nʋʋ nɛ ŋmoo naaŋ a tel, La Tɩɩna yie pɛ tɩɩna lɛ nɛ a kɛnʋ chʋʋlɛ.

¹⁵ Nʋʋkala ka beŋ ŋ sɩaa lɛ nɛ, ŋ yie pɩba kʋdiilee nɛ, dɩ bʋa-la sɩ maga nɛ yie.

¹⁶ Ŋ nɩsɩŋ lɛ nɛ kɩalɩŋ kala sɩ weye nɩna ba kʋchɛɛlɛɛ.

¹⁷ La Tɩɩna kɛŋ tʋɔpʋla nɛ a ŋɩŋaa ʋ wɩɩkala, a cho kɩalɩŋ kala ʋ sɩ ŋaa.

¹⁸ La Tɩɩna kpagɛ nɩalɩŋ kala sɩɩ yɩrʋ nɛ, nɩalɩŋ kala sɩɩ yɩrʋ arɩ wʋtɩtɩɩ.

¹⁹ Ʋ yie leŋ nɩalɩŋ kala sɩɩ fáʋ na ba kʋchɛɛlɛɛ nɛ, ʋ yie nɩɩ ba nii-ŋmobo a laaba ta.

²⁰ La Tɩɩna ka pɔ nɩalɩŋ kala sɩ chou nɛ, ama ʋ jaŋ chei nɩbɔŋŋɔɔ kala.

²¹ Mɩ jaŋ dɛnnɛ La Tɩɩna bʋa-kala lɛ, a leŋ dɩ kɩalɩŋ ma kala ʋ sɩ ŋaa dɛnnɛ ʋ yɩrɩ-zɔŋ-la a kaa mʋ wuu.