WƖA YƖƖLAA 144 - WƖA TENIŊ

Kuoro lɔllɛ Wɩa ʋ sɩ yuo dii

¹ Mɩɩ dɛnnɛ La Tɩɩna sɩ kɛŋ doluŋ a nagɛ bʋŋ, ʋ nɛ gʋnnɛmɛ laalɩŋ yuonuŋ.

² Ʋ nɛ mɩ Wɩa a chomi, ʋ nɛ ŋaa mɩ dɩ-duoŋ arɩ mɩ Laataara, ʋ nɛ chu tɔmɛ, ʋ nɛ mɩ yuori. Ʋ nɛ leŋe mɩ yuo dii tinteyee a kɛŋ doluŋ ba lɛ.

³ La Tɩɩna, nuhuobiine tuo kʋŋkala, ka ŋ chɩl ʋ wɩaa. Nuhuobiine bie tuo kʋŋkala, ka ŋ bɩbɩɩnɛ ʋ wɩaa.

⁴ La mɩɩsɩŋ nagɛ peliŋ nɛ, la tapʋlaa ma fɩfá a nagɛ daaliimiŋ.

⁵ La Tɩɩna, kɛŋ wɩa-nyuŋ bɛgɛ ta aŋ kʋ tuu, digi peelee dɩ ba kuu nyʋɔsʋŋ.

⁶ Leŋ dɩ taŋ lɩgɩsɛ a kɛŋ ŋ dʋndɔŋŋɔɔ pɩsɛ, yuoba arɩ ŋ toŋ dɩ ba fá.

⁷ Kɛŋ ŋ nɩsɩŋ tɩɛna lɩɩ wɩa-nyuŋ kʋ tuu a lɛrɛ lɩɩsɛmɛ lɩɩ-luŋuŋ tʋɔŋ, laamɛ ta nɩwogusuŋ nɩsɩŋ lɛ,

⁸ nɩalɩŋ sɩɩ nyɩɛ wɩaa, a yie hɛ niiŋ aŋ vɩa dɩ ba tou.

⁹ Mɩ Wɩa, mɩ jaŋ yɩɩ yɩɩl-falɩŋ a dɛnnɩŋ. Mɩ jaŋ du cheŋ a yɩɩ yɩɩlɩŋ hɛ a pɩŋ.

¹⁰ Ŋ doluŋ lɛ nɛ kuoroo yuo laalɩŋ dii, ŋ nɛ laa mɩ-na ŋ tɩntɩnna Devit ta ba bɩ mɩ kpʋa.

¹¹ Laamɛ ta nɩbɔŋŋɔɔ nɩsɩŋ lɛ, laamɛ ta nɩwogusu-la nɩsɩŋ lɛ, nɩalɩŋ sɩɩ nyɩɛ wɩaa nɩsɩŋ lɛ, a yie hɛ niiŋ aŋ vɩa dɩ ba tou.

¹² Leŋ dɩ la hambolibiisiŋ waa woruŋ, a nagɛ tɩɩsɩŋ sɩ waa, dɩ la toloo ma nagɛ kuoru dɩa jebiee ba sɩ kpɩɛra.

¹³ Leŋ dɩ la virisiŋ su arɩ kʋdii-doho kala. Dɩ la piesee ma pʋŋ a yi bʋɩ fiiba, a su la ŋmaŋkaanɩŋ.

¹⁴ Leŋ dɩ la nɛsɩŋ lʋl biiriŋ yʋgɛ, sɩ́ leŋe dɩ ba yuo dii la tasɩŋ kʋŋkala, koo dɩ ba yuo kɛŋ la nʋʋkala a kaa viiri. Sɩ́ leŋe dɩ la tʋɔ-cheeŋ leŋ dɩ la yelee baarɛ la wombiee lɛ.

¹⁵ Nɩalɩŋ sɩ jaŋ na wʋzɔŋŋɔɔ deemba jaŋ kɛŋ tʋɔtɔrʋŋ. Nɩalɩŋ Wɩa sɩ ŋaa ba Tɩɩna, ba jaŋ kɛŋ tʋɔtɔrʋŋ.