WƖA YƖƖLAA 140 - WƖA TENIŊ

Devit sʋl Wɩa dɩ ʋ pɔʋ

¹ La Tɩɩna, laamɛ ta nɩbɔŋŋɔɔ nɩsɩŋ lɛ, aŋ pɔmɛ dɩ yuo-hɛɛrɛɛ sɩ́ mɩ wɩɩkala ŋaa.

² Baa bɩɩnɛ wʋbɔŋŋɔɔ nɛ bʋa na-kala, a hɩhɛ yuosuŋ tapʋlɩɩ kala.

³ Ba niiŋ ka dii a nagɛ dɩmɩŋ nɛ, ba wʋbʋlaa ma kɛŋ huoŋ a nagɛ dɩ-kuuro.

⁴ La Tɩɩna, chu tɔmɛ a lɩɩsɛmɛ nɩbɔmɔ-la nɩsɩŋ lɛ. Laamɛ ta yuo-hɛɛrɛ-la nɩsɩŋ lɛ, nɩalɩŋ sɩ vʋʋra aa paa mɩ naasɩŋ.

⁵ Nɩalɩŋ sɩɩ bigisi ba tɩtɩa lɛ bɛrɛ bɛrɩsɩŋ nɛ, ba hɛ jomba nɛ dɩ ba kɛmmɛ. Ba bɛrɛ bɛrɩsɩŋ nɛ mɩ dɩ-vɛnɛɛ dɩ ba kɛmmɛ.

⁶ Mɩ bʋla pɩ La Tɩɩna, “Ŋ nɛ mɩ Wɩa.” Mɩɩ sʋlʋŋ, jegile nɩɩ mɩ sɩɩ ŋmoo niiŋ dɩ ŋ fá mɩ nenige.

⁷ Mɩ Tɩɩna Wɩɩjarɩbakɔ, ŋ nɛ ŋaa mɩ nɩduoŋ a laamɛ tɩta, ŋ nɩɩ pɔmɛ laalɩŋ tapʋlʋŋ.

⁸ La Tɩɩna, sɩ́ leŋe dɩ nɩbɔŋŋɔɔ na wɩɩ-la ba sɩɩ chɛ. Sɩ́ leŋe dɩ wɩɩ-la ba sɩɩ vʋʋrʋ chɩŋ. Ŋɩɩ dee ba jaŋ bigisi ba tɩtɩa lɛ.

⁹ Sɩ́ leŋe dɩ nɩalɩŋ sɩ gollimi yuo diimi, leŋ dɩ ba niiŋ wʋbʋlaa gʋra dii ba tɩtɩa.

¹⁰ Leŋ dɩ nyiŋ-hal-muloo tuu ba lɛ a diiba, leŋ dɩ ba tuu buotuo-luŋuŋ, lee ba bɩra sɩ bɩ jaŋ wuo lɩɩ.

¹¹ Sɩ́ leŋe dɩ nɩbɔmɔ-la sɩ nyɩɛ wɩaa aa chei nɩaa yɩrɩŋ na dɩchɩnɩŋ tinteeŋ lɛ. Leŋ dɩ wʋlɔrʋnʋŋ paa puu yuo-hɛɛrɛɛ.

¹² La Tɩɩna, mɩ jɩma ŋ chɩŋ summoo harɩŋ nɛ, a chɩna gbɛrɛ dɩ nɩaa joŋ wʋtɩtɩɩ a to nɩalɩŋ sɩ bɩ ba tɩtɩa lɛ wuo pɛ.

¹³ Wʋtɩtɩɩ, nɩalɩŋ sɩ kɛŋ tʋɔpʋla jaŋ dɛnnɩŋ, nɩalɩŋ wʋŋaalaa sɩ tʋʋla jaŋ hɛ ŋ sɩpaaŋ.