WƖA YƖƖLAA 135 - WƖA TENIŊ

Má dɛnnɛ Wɩa

¹ Má dɛnnɛ La Tɩɩna, má leŋ dɩ ʋ yɩrɩŋ yɩrɛ, ma nɩalɩŋ sɩ ŋaa La Tɩɩna tɩntɩnnaa, má dɛnnʋ,

² nɩalɩŋ kala sɩɩ tɩŋ La Tɩɩna Wɩa dɩɩ-balɩŋ arɩ ʋ kaalɩsɩŋ lɛ.

³ Má dɛnnɛ La Tɩɩna, ʋ wɩaa zɔmɔ. Ma yɩɩ yɩɩlaa a pʋ, ŋɩɩ ŋaa wʋzɔŋ nɛ.

⁴ La Tɩɩna lɩɩsɛ Jekɔb nɛ ʋ ŋaa ʋ nʋʋ, Iziral tɩŋŋaa kala ŋaa ʋ nɩchooloo.

⁵ Mɩ jɩma La Tɩɩna nɛ yʋga, La Tɩɩna nɛ kɛŋ doluŋ a kɩɩ vesiŋ kala.

⁶ La Tɩɩna ka ŋaa wɩɩ-la kala ʋ sɩ cho nɛ, wɩa-nyuŋ arɩ tinteeŋ lɛ, mʋgʋ-balaa arɩ ba dɩ-luŋuŋ kala lɛ.

⁷ Ʋ yie leŋ duoŋ-bɩlɩmbaanaa lɩɩ wɩa-nyuŋ lee-kala. Ʋ yie leŋ duonuŋ nɩnɩɩ aŋ lɩlɩgɩsɛ, a leŋ peliŋ lɩɩ ʋ dɩ-faalɩŋ a lulu.

⁸ La Tɩɩna nɛ kpʋ Ijipiti tɩŋŋaa bii-bumbumba arɩ ba pʋsʋŋ bii-bumbumba kala.

⁹ Ʋ ŋaa wʋmagɩlaa arɩ wʋkpuŋkperisiŋ nɛ dɩ ʋ dɔgɩsɛ Ijipiti tinteeŋ kuoro arɩ ʋ tɩntɩnnɩ-hɩasɩŋ kala.

¹⁰ Ʋ chei tinteyee yʋgɛ nɛ woruŋ, a kpʋ kuoroo ma sɩ kɛŋ doluŋ woruŋ:

¹¹ Amɔrɩ tɩŋŋaa kuoro ba sɩɩ yɩrɛ Sɩhɔŋ, Basaŋ tɩŋŋaa kuoro ba sɩɩ yɩrɛ Ɔgɩ, arɩ kuorie-la kala sɩ hɛ Kɛnaŋ tinteeŋ lɛ. Kuoroo deemba kala nɛ ʋ kpʋ,

¹² aŋ joŋ ba tinteeŋ kala pɩ ʋ nɩaa Iziral tɩŋŋaa dɩ ba tɩɩʋ.

¹³ La Tɩɩna, ŋ yɩrɩŋ jaŋ yɩrɛ a kaa mʋ wuu, nɩalɩŋ ma kala ba sɩ jaŋ lʋl jaŋ liisi ŋ wɩaa.

¹⁴ La Tɩɩna jaŋ laa ʋ nɩaa ta, aŋ fá ʋ tɩntɩnnaa ma nenige.

¹⁵ Tinteyee dɔnsʋŋ nɩaa kɛŋ hɔpʋla arɩ sɛlɩmɛ nɛ a libi tɔŋŋɔɔ. Ba tɩtɩa nɩsaa nɛ ŋaa kɩaa deemba.

¹⁶ Tɔmɔ-la kɛŋ niiŋ nɛ, aŋ bɩ wɩaa wuo bʋl, a kɛŋ sɩaa aŋ bɩ na.

¹⁷ Ba kɛŋ dɩgɩlaa nɛ, aŋ bɩ nɩɩ, a bɩ wiese ma kɛnɛ.

¹⁸ Nɩalɩŋ sɩ libi tɔmɔ-la arɩ nɩalɩŋ sɩ joŋ ba yɩɛlaa hɛ ba lɛ jaŋ ŋaa nɩpɛɩba a nagɛ tɔmɔ-la ba sɩ libe.

¹⁹ Má Iziral tɩmma, má dɛnnɛ La Tɩɩna. Má Arɔŋ dɩa nɩaa, ma Wɩɩsʋllɩ sɩpaalaaraa, má dɛnnɛ La Tɩɩna.

²⁰ Levi doho nɩaa, má dɛnnɛ La Tɩɩna. Ma nɩalɩŋ sɩɩ fá La Tɩɩna, má dɛnnʋ.

²¹ Má dɛnnɛ La Tɩɩna Zaayɔŋ lɛ, má dɛnnʋ ʋ jaŋ Jerusalɛm lɛ. Má dɛnnɛ La Tɩɩna.