WƖA YƖƖLAA 132 - WƖA TENIŊ

Ba bʋl wʋzɔŋŋɔɔ a tɩgɛ Wɩa dɩɩ-balɩŋ lɛ

¹ La Tɩɩna, liisi Devit wɩaa arɩ hɛɛ-la kala ʋ sɩ na.

² Ʋ ta niiŋ nɛ ŋ-na La Tɩɩna teeŋ, ʋ hɛ niiŋ nɛ a pɩ ŋ-na Jekɔb Wɩa sɩ kɩɩ kʋŋkala.

³ Ʋ sɩ, “Mɩ bɩ jaŋ mʋ mɩ dɩa koo a pɩŋ doŋ,

⁴ mɩ bɩ jaŋ pɩŋ doŋ, mɩ bɩ jaŋ dɩɛgɛ doŋ,

⁵ a kaa mʋ bʋa-la lɛ mɩ sɩ chɛ leriŋ, a pɩ La Tɩɩna Jekɔb Wɩa sɩ kɩɩ kʋŋkala dɩjʋʋlʋŋ.”

⁶ Bʋa-la lɛ la fa sɩ hɛ taŋ-la ba sɩɩ yɩrɛ Ɛfɩrata lɛ, la nɩa dɩ Wɩa niiriŋ daga-la hɛ lee dɔŋ nɛ a kpagɛ lee-la ba sɩɩ yɩrɛ Jaa.

⁷ Ŋɩɩ nɛ la bʋl, “Má leŋ dɩ la mʋ La Tɩɩna dɩa a dɛnnʋ ʋ sɩpaaŋ.

⁸ La Tɩɩna, ŋ dɩ ŋ niiriŋ daga-la sɩ ŋaa ŋ doluŋ magɩlɩŋ, sii kʋ jʋʋ ŋ dɩa.

⁹ Leŋ dɩ ŋ Wɩɩsʋllɩ sɩpaalaaraa kɛŋ tʋɔpʋla, aŋ leŋ dɩ nɩalɩŋ ma sɩ laa ŋ wɩaa dii yɩɩ yɩɩlaa a jʋjʋɔsɛ.”

¹⁰ Devit nɛ ŋaa ŋ tɩntɩnnʋ-la ŋ sɩ lɩɩsa, ŋɩɩ wɩaa sɩ́ ʋ vɩa ta.

¹¹ La Tɩɩna, ŋ fa ŋmɩɛsa a pɩ Devit nɛ, ŋ bɩ jaŋ vɩa nii-la ta, ŋ sɩ, “Mɩ-na ma Tɩɩna jaŋ leŋ dɩ ŋ doho nɩaa nɛ didii kuoruŋ.

¹² Dɩ ŋ biiriŋ nɛ to nii-la sɩ hɛ la pɛgɛ, a kɛŋ wɩalɩŋ mɩ sɩ dagɛba a tɩtɩŋ, ŋɩɩ-na ba biiriŋ ma jaŋ didii kuoruŋ a kaa mʋ wuu.”

¹³ La Tɩɩna, ŋ tʋɔtɔrʋŋ lɛ nɛ ŋ lɩɩsɛ Zaayɔŋ, ʋ ŋaa ŋ dɩjʋʋlʋŋ.

¹⁴ Ŋ bʋla, “Mɩ dɩjʋʋlʋŋ nɛ ŋ-la, mɩ jaŋ hɛ daha a kaa mʋ wuu. Mɩ jaŋ dii kuoruŋ daha, bɛɛ wɩaa mɩ cho ŋɩɩ nɛ.

¹⁵ Mɩ jaŋ pɛ Zaayɔŋ nɩaa lɛ dɩ ba kɛŋ kɩaa woruŋ, dɩ summo-la sɩ hɛ ba tʋɔŋ ma wuo na kʋdiilee a dii vɔgɛ.

¹⁶ Mɩ jaŋ laa ʋ Wɩɩsʋllɩ sɩpaalaaraa ta, aŋ leŋ dɩ ʋ nɩalɩŋ ma sɩ laa mɩ wɩaa dii yɩɩ yɩɩlaa a jʋjʋɔsɛ.”

¹⁷ Mɩ jaŋ leŋ dɩ Devit doho nʋʋ dii kuoruŋ nɩmɛ, dɩ ʋ kuoruŋ kɛŋ doluŋ a chaanɛ a nagɛ chaanɩŋ sɩ bɩ dɩsɛ,

¹⁸ a chu kuoru nyunchuulo sɩɩ tʋl, ka dɩ mɩ leŋ dɩ ʋ dʋndɔŋŋɔɔ dii hɩɩsɩŋ.