WƖA YƖƖLAA 12 - WƖA TENIŊ

Devit sʋl Wɩa dɩ ʋ pɛ ʋ lɛ.

¹ Mɩɩ sʋlʋŋ mɩ Tɩɩna, pɛ mɩ lɛ. Nɩalɩŋ fa sɩɩ fáŋ kʋŋ bɩra tuo, wʋtɩtɩɩ tɩŋŋaa bɩra tuo.

² Nʋʋkala ka nyɩɛ wɩaa nɛ ʋ naambie teeŋ, a kɛŋ nii-sɩma nyɩnyɩsɛ dɔŋɔ.

³ La Tɩɩna, leŋ dɩ nɩalɩŋ sɩ kɛŋ nii-sɩma arɩ babiibal wʋbʋllaa niiŋ tɔ.

⁴ Ba sɩ, “La nɛ tɩɩ la niiree, la jaŋ wuo bʋl wɩɩkala la sɩ cho. Nʋʋkala bɩ jaŋ wuo pɔ dɩ la sɩ́ wɩaa bʋl.”

⁵ La Tɩɩna sɩ, “Mɩ jaŋ kɔ lɛɛlɛ a tɩŋ ba sɩɩ dɔgɩsɛ nɩalɩŋ sɩ bɩ ba tɩtɩa lɛ wuo pɛ arɩ summoo ba yiyel. Mɩ jaŋ laaba ta nɩalɩŋ sɩɩ dɔgɩsɛba nɩsɩŋ lɛ.”

⁶ La Tɩɩna wʋbʋlaa ŋaa wʋtɩtɩɩba nɛ, a nagɛ hɔpʋla ba sɩ chɔ naansɩɩŋ bʋlɩpɛ a lɩɩsɛ disiniŋ ta.

⁷ La Tɩɩna, laala ta nɩdosunuŋ deemba nɩsɩŋ lɛ, a pɔla a kaa mʋ wuu.

⁸ Nɩbɔŋŋɔɔ hɛ lee-kala nɛ aa bigisi ba tɩtɩa lɛ, ka nɩaa bɩbɛsɛ ba wʋbɔŋ wʋŋaalaa lɛ.