WƖA YƖƖLAA 118 - WƖA TENIŊ

Yuo-diiri yɩɩlaa

¹ Má lɔllɛ La Tɩɩna, bɛɛ wɩaa ʋ wɩaa zɔmɔ, ʋ chonuŋ bɩ dɛrɛ.

² Iziral tɩmma, má bʋl, “Ʋ chonuŋ bɩ dɛrɛ.”

³ Arɔŋ doho nɩaa, Wɩɩsʋllɩ sɩpaalaaraa, má bʋl, “Ʋ chonuŋ bɩ dɛrɛ.”

⁴ Ma nɩalɩŋ sɩɩ fá La Tɩɩna, má bʋl, “Ʋ chonuŋ bɩ dɛrɛ.”

⁵ Mɩ tʋɔŋ sɩ cheye, mɩ ŋmoo niiŋ pɩ La Tɩɩna nɛ, ʋ nɩɩ a laamɛ ta.

⁶ La Tɩɩna chɩŋ mɩ harɩŋ nɛ, mɩ bɩ fawʋllʋŋ ka fá. Bɛɛ nɛ nuhuobiine jaŋ wuo ŋaamɛ?

⁷ La Tɩɩna chɩŋ mɩ harɩŋ nɛ, ʋ nɩɩ pɛ mɩ lɛ. Mɩ sɩɩŋ jaŋ na dɩ ʋ yuo dii mɩ dʋndɔŋŋɔɔ.

⁸ Ŋ sɩ yuori La Tɩɩna nɛ kpɩa ŋ sɩ joŋ ŋ yɩɛlaa hɛ nuhuobiine lɛ.

⁹ Ŋ sɩ yuori La Tɩɩna nɛ kpɩa ŋ sɩ joŋ ŋ yɩɛlaa hɛ sɩpaalaarɩ-duoruŋ lɛ.

¹⁰ Tinteyee nɩaa yʋga nɛ a gollimi, ama La Tɩɩna doluŋ lɛ, mɩ yuo diiba nɛ.

¹¹ Ba gollimi sɛmɛ kala nɛ, ama La Tɩɩna doluŋ lɛ, mɩ yuo diiba nɛ.

¹² Ba tɔmɛ hɛ a nagɛ tʋʋ-biee nɛ, ama ba guu sʋʋ nɛ, a nagɛ nyiniŋ sɩ joŋ sɔsʋŋ dii. La Tɩɩna doluŋ lɛ, mɩ yuo diiba nɛ.

¹³ Ba fa pɛsɛ mɩ lɛ nɛ woruŋ, a ka mʋa dɩ ba yuo diimi, ama La Tɩɩna nɛ pɛ mɩ lɛ.

¹⁴ La Tɩɩna nɛ ŋaa mɩ doluŋ, mɩ jaŋ yɩɩ yɩɩlaa a dɛnnʋ, ʋ nɛ laamɛ ta.

¹⁵ Tʋɔtɔrɛ goŋ arɩ yuo-diiri goŋ nɛ baa ŋaa Wɩa nɩaa lɛŋŋɛɛ lɛ. Ba sɩ: “La Tɩɩna doluŋ nɛ ŋaa wʋduoru-la.

¹⁶ La Tɩɩna doluŋ nɛ la kaa yuo laalɩŋ dii, La Tɩɩna doluŋ nɛ ŋaa wʋduoru-la.”

¹⁷ Mɩ bɩ jaŋ sʋʋ, ama mɩ jaŋ kɛŋ mɩɩsɩŋ, a heele bʋl wɩalɩŋ La Tɩɩna sɩ ŋaa.

¹⁸ La Tɩɩna leŋe mɩ na hɛɛŋ nɛ woruŋ, ama ʋ bɩ leŋe mɩ sʋʋ.

¹⁹ Kɛŋ boi-baala-la tʋɔpʋl tɩŋŋaa sɩ too jʋʋ Wɩa dɩɩ-balɩŋ suro pɩmɛ, dɩ mɩ jʋʋ lɔllɛ La Tɩɩna.

²⁰ La Tɩɩna boi-baalɩŋ nɛ ŋ-la, tʋɔpʋl tɩŋŋaa sɩ to jʋjʋʋ.

²¹ Mɩ jaŋ lɔllʋŋ, a tɩŋ ŋ sɩ laa mɩ sʋla wɩaa, a laamɛ ta.

²² Tie-bii-la dɩɩ-saaraa sɩ vɩa ta nɛ kʋ ŋaa tie-bii-duoŋ ba sɩ joŋo bil dɩa gentine.

²³ La Tɩɩna nɛ ŋaa wɩɩŋ deeŋ, wɩɩ-la ŋaa wʋkpuŋkpere nɛ a pɩla.

²⁴ Tapʋlɩɩ-la La Tɩɩna sɩ ŋaa nɛ ŋ-la, ʋ maga dɩ la tʋɔŋ tɔrɛ nɛ dɩ la jʋjʋɔsɛ.

²⁵ Laa sʋlʋŋ La Tɩɩna, laala ta, La Tɩɩna, leŋ dɩ la yuo dii.

²⁶ Wɩa jaŋ pɛ nɩɩ-la sɩɩ kɔ La Tɩɩna yɩrɩŋ lɛ. Laa dɛnnɩŋ nɛ La Tɩɩna dɩa lɛ.

²⁷ La Tɩɩna nɛ Wɩa, ʋ leŋe ʋ pʋlʋmʋŋ chaana hɛ la lɛ nɛ. La jaŋ kori abɛ pɩpaarɩŋ a pʋɔla mʋ ʋ koru-la teeŋ.

²⁸ Ŋ nɛ mɩ Wɩa, mɩ jaŋ lɔllʋŋ, ŋ nɛ mɩ Wɩa, mɩ jaŋ dɛnnɩŋ.

²⁹ Má lɔllɛ La Tɩɩna, bɛɛ wɩaa ʋ wɩaa zɔmɔ, ʋ chonuŋ bɩ dɛrɛ.