WƖA YƖƖLAA 116 - WƖA TENIŊ

Wɩa sɩ laa nʋʋ ta, ʋ dɛnnʋ

¹ Mɩ cho La Tɩɩna, bɛɛ wɩaa ʋ nɩɩ mɩ yikoro nɛ. Ʋ nɩɩ mɩ sɩɩ ŋmoo niiŋ dɩ ʋ fá mɩ nenige nɛ.

² Ʋ sɩɩ jegili mɩ teeŋ ŋɩɩ, mɩ mɩɩsɩŋ kala lɛ, mɩ jaŋ yɩrʋ.

³ Sʋʋŋ ŋmɛsɩŋ vɔɔmɛ nɛ a golli, fawʋllʋŋ kɛmmɛ, wɩaa jʋʋmɛ, mɩ tʋɔŋ chei.

⁴ Ŋɩɩ nɛ mɩ yɩrɛ La Tɩɩna a bʋl, “Mɩ Tɩɩna, mɩɩ sʋlʋŋ, laamɛ ta.”

⁵ La Tɩɩna ka fá nɩaa nisusuŋ nɛ, ʋ tʋɔŋ pʋlla. La Wɩa ka fá nɩaa nenige.

⁶ La Tɩɩna nɩɩ pɔ nɩalɩŋ sɩ bɩ wɩaa jɩŋ woruŋ. Bʋa-la lɛ wɩaa sɩ jʋʋmɛ, ʋ nɛ laamɛ ta.

⁷ Mɩ jaŋ bɩra ta jɩa, bɛɛ wɩaa La Tɩɩna kɛmmɛ woruŋ nɛ.

⁸ La Tɩɩna, ŋ laamɛ ta nɛ mɩ bɩ sʋba, a tɩɩgɛ mɩ sɩlɩɩrɩŋ ta, a pɔmɛ mɩ bɩ tele.

⁹ Lɛɛlɛ mɩ jaŋ vɛŋ La Tɩɩna sɩpaaŋ dʋnɩa deeŋ lɛ.

¹⁰ Mɩ fa ha laaŋ dii nɛ, bʋa-la lɛ mɩ sɩ sɩ, “Hɛɛŋ jʋʋmɛ nɛ kɩŋkɛŋ.”

¹¹ Fawʋllʋŋ fa sɩ kɛmmɛ, mɩ sɩ, “Nʋʋkala ŋaa wʋnyɩɛrʋ nɛ.”

¹² Bɛɛ nɛ mɩ jaŋ ŋaa tiŋ La Tɩɩna, a tɩŋ wʋzɔmɔ-la kala ʋ sɩ ŋaa pɩ mɩ wɩaa?

¹³ Mɩ jaŋ ŋaa kʋnyʋalaa Wɩɩsʋlʋŋ a lɔllɛ La Tɩɩna a tɩŋ ʋ sɩ laamɛ ta wɩaa.

¹⁴ Mɩ jaŋ lɩɩsɛ niiri-la mɩ sɩ hɛ pɩ La Tɩɩna ʋ nɩaa kala sɩpaaŋ.

¹⁵ La Tɩɩna chɩl nɩalɩŋ sɩɩ to ʋ niiŋ sʋʋŋ wɩaa nɛ woruŋ.

¹⁶ La Tɩɩna, mɩ ŋaa ŋ tɩntɩnnʋ nɛ, mɩ chaasa tɩma pɩpɩŋ a nagɛ mɩ naaŋ sɩ tɩma pɩŋ ŋɩɩ nɛ. Ŋ laamɛ ta sʋʋŋ nɩsɩŋ lɛ nɛ.

¹⁷ Mɩ jaŋ kpʋ pʋsʋŋ a ŋaa Wɩɩsʋlʋŋ a lɔllɛ La Tɩɩna, a yɩrɛ ʋ yɩrɩŋ.

¹⁸ Mɩ jaŋ lɩɩsɛ niiri-la mɩ sɩ hɛ pɩ La Tɩɩna, ʋ nɩaa kala sɩpaaŋ.

¹⁹ Mɩ jaŋ ŋaa ŋɩɩ Wɩa dɩɩ-bal-la sɩ hɛ Jerusalɛm lɛ tʋɔŋ. Má dɛnnɛ La Tɩɩna.