WƖA YƖƖLAA 115 - WƖA TENIŊ

Wɩɩ-bala-la sɩ ŋaa Wɩɩ-tɩtɩɩ

¹ La-na bɩ maga dɩ nʋʋ dɛnnɛla. Ŋ-na La Tɩɩna, ŋ dʋndʋŋa nɛ maga dɩ ba dɛnnɛ, a tɩŋ ŋ chono-la sɩ bɩ dɛrɛ arɩ ŋ wʋtɩtɩɩ wɩaa.

² Bɛɛ nɛ tɩɩ tinteyee nɩaa jaŋ pɩɛsɛla, “Nɩɩ nɛ ma Wɩa hɛ?”

³ La Wɩa hɛ ʋ jaŋ lɛ nɛ. Ʋ yie ŋaa wɩɩ-la kala ʋ sɩ cho nɛ.

⁴ Tinteye-la nɩaa ka to vʋɩyaa nuhuobiine sɩ kɛŋ hɔpʋla arɩ sɛlɩmɛ kaa ŋaa nɛ.

⁵ Ba kɛŋ niiŋ, aŋ bɩ wɩaa wuo bʋl, a kɛŋ sɩaa, aŋ bɩ na.

⁶ Ba kɛŋ dɩgɩlaa, aŋ bɩ wɩaa ka nɩɩ, a kɛŋ mɩɩsɩŋ, aŋ bɩ sʋɔra ka nɩɩ.

⁷ Ba kɛŋ nɩsaa nɛ, aŋ bɩ jaŋ wuo digi kʋŋ a jɩŋ, a kɛŋ naasɩŋ, aŋ bɩ wuo vɛŋ, a bɩ goŋ ma wuo ŋaa.

⁸ Nɩalɩŋ sɩ ŋaa vʋɩya-la arɩ nɩalɩŋ sɩ joŋ ba yɩɛlaa hɛ ba lɛ, ba kala bɩ jaŋ kɛŋ bʋbʋa a nagɛ vʋɩya-la sɩ bɩ bʋbʋa-kala kɛnɛ ŋɩɩ.

⁹ Ma Iziral tɩŋŋaa, má laa La Tɩɩna dii. Ʋ nɛ pɛ ma lɛ a chu tɔma.

¹⁰ Ma Arɔŋ dɩa nɩaa, Wɩɩsʋllɩ sɩpaalaaraa, má laa La Tɩɩna dii. Ʋ nɛ pɛ ma lɛ a chu tɔma.

¹¹ Ma nɩalɩŋ sɩɩ fá La Tɩɩna, má laaʋ dii. Ʋ nɛ pɛ ma lɛ a chu tɔma.

¹² La Tɩɩna ka liisi la wɩaa nɛ, ʋ jaŋ pɛ la lɛ. Ʋ jaŋ pɛ Iziral tɩŋŋaa arɩ Arɔŋ doho nɩaa lɛ.

¹³ La Tɩɩna jaŋ pɛ nɩalɩŋ sɩɩ fáʋ lɛ, nɩbalaa arɩ nɩbiisiŋ kala.

¹⁴ Mɩɩ sʋl La Tɩɩna dɩ ʋ leŋ ma dɩ ma biiriŋ pʋŋa yʋgɛ.

¹⁵ A leŋ dɩ La Tɩɩna pɛ ma lɛ, ʋ nɛ ŋaa wɩa-nyuŋ arɩ tinteeŋ.

¹⁶ Wɩa-jaŋ nɛ ŋaa La Tɩɩna kʋa, ama ʋ joŋ tinteeŋ nɛ a pɩ nuhuobiinee.

¹⁷ Nɩalɩŋ sɩ sʋba dee bɩ La Tɩɩna ka dɛnnɛ, nɩalɩŋ sɩ mʋ lɛlɩŋ dee.

¹⁸ Ama la nɩalɩŋ sɩ weye nɛ jaŋ dɛnnʋ, a chɩŋ lɛɛlɛ a kaa mʋ wuu. Má dɛnnɛ La Tɩɩna.