WƖA YƖƖLAA 11 - WƖA TENIŊ

Yɩɩl-la Devit sɩ yɩɩ pɩ gɔgʋ-hɩaŋ.

¹ La Tɩɩna nɛ mɩ yie fá mʋ yuori. Ɛɛ nɛ ma jaŋ wuo bʋla pɩmɛ, “Lʋara fá a nagɛ diibie a sii jɩl peeliŋ nyuŋ.

² Bee na, nɩbɔŋŋɔɔ lɛrɛ ba tosuŋ hɛ nɛ, a hɛ hɛŋŋɛɛ a chɩŋ birimiŋ tʋɔŋ a mɩmagɩsɛ dɩ ba yuo nɩalɩŋ wʋŋaalaa sɩ tʋʋla.

³ Dɩ wɩɩ nɛ chei ʋ gentine lɛ, tʋɔpʋl tɩɩna bɩra bɩ wɩɩkala wuo ŋaa.”

⁴ La Tɩɩna hɔŋ ʋ kuoru kpasa nyuŋ nɛ, ʋ dɩa-la sɩ zɔmɔ a bɩ disiniŋ kɛnɛ lɛ Wɩa-jaŋ. Ʋ jɩŋ wɩalɩŋ kala la sɩɩ ŋaa nɛ, bɛɛ wɩaa ʋʋ na la kala nɛ.

⁵ La Tɩɩna yie bibeŋ tʋɔpʋl tɩŋŋaa arɩ nɩbɔŋŋɔɔ wʋŋaalaa nɛ, ama ʋ bɛrɛ nɩbɔŋŋɔɔ arɩ nɩalɩŋ sɩɩ hɛ yuosuŋ nɛ.

⁶ Ʋ jaŋ leŋ dɩ nyiŋ-hal muloo arɩ jiribiiŋ chol nyiniŋ a lɩɩ wɩa-nyuŋ a kʋ tuu nɩbɔŋŋɔɔ lɛ a nagɛ duonuŋ sɩɩ nɩɩ, aŋ ka dɩ pel-lɩmɩŋ kɛmba.

⁷ La Tɩɩna ŋaa tʋɔpʋl Tɩɩna nɛ, ʋ cho wʋtɩtɩɩ. Nɩalɩŋ wʋŋaalaa sɩ tʋʋla jaŋ hɔŋ ʋ teeŋ.