WƖA YƖƖLAA 109 - WƖA TENIŊ

Yɩɩl-la Devit sɩ yɩɩ pɩ gɔgʋ-hɩaŋ.

¹ Wɩa, mɩɩ dɛnnɩŋ nɛ, sɩ́ ŋ niiŋ tɔrʋ.

² Nɩbɔŋŋɔɔ arɩ nɩalɩŋ sɩɩ nyɩsɛ nɩaa suri ba niiŋ nɛ a chɩŋ mɩ lɛ, a nyɩɛ wɩaa bʋl wʋbɔŋŋɔɔ a chicheimi.

³ Ba bɛrɛmɛ nɛ a gollo bʋbʋlmɛ, a yuyuomi, ka mɩ bɩ wɩɩ cheye.

⁴ Mɩ-na choba nɛ, a paala sʋl Wɩa pɩpɩba, aŋ ka ba bɛrɛmɛ.

⁵ Ba joŋ wʋbɔŋŋɔɔ nɛ a tiŋ wʋzɔŋŋɔɔ chɩmɩŋ mɩ lɛ. Mɩ-na cho ba nɛ, ka ba bɛrɛmɛ.

⁶ Chɛ nɩbɔŋ dɩ ʋ chɩŋ mɩ dʋndɔmɔ lɛ, a bʋl ʋ teeŋ,

⁷ dɩ ba nɛ dii ʋ sarɩya dɩ ba na arɩ ʋ cheye nɛ. Leŋ dɩ ʋ Wɩɩ-chʋɔlʋŋ kɛnʋ hɛ wɩaa lɛ.

⁸ Leŋ dɩ ʋ mɩɩsɩŋ kui, dɩ nʋʋ dɔŋ laa ʋ leriŋ a ŋaa sɩpaalaarʋ.

⁹ Leŋ dɩ ʋ biiriŋ bɩrɩmɛ biisinsiŋ, dɩ ʋ haala ma bɩrɩmɛ yo-haal.

¹⁰ Leŋ dɩ ʋ biiriŋ gɔllɔ baaraa sʋl, dɩ ba kiriba ta dɩ ba lɩɩ ba jikpeeniŋ lɛ.

¹¹ Leŋ nɩalɩŋ chɩŋŋaa ʋ sɩ die kɛŋ ʋ kɩaa kala laa, leŋ dɩ nʋhʋɔraa laa ʋ dʋa kala.

¹² Leŋ dɩ nʋʋkala sɩ́ zile ŋaa ʋ lɛ, a sɩ́ ʋ biisinsi-la ma nenige fá.

¹³ Leŋ dɩ ʋ doho kala dɛrɛ, dɩ ʋ yɩrɩŋ lɛl nɩalɩŋ ba ha sɩ jaŋ lʋl tʋɔŋ.

¹⁴ La Tɩɩna, liise yi ʋ nyɩmmaba wʋbɔŋŋɔɔ lɛ, a sɩ́ wʋbɔmɔ-la ʋ naaŋ ma sɩ ŋaa yʋ.

¹⁵ La Tɩɩna, liliisi ba wʋbɔmɔ-la wɩaa bʋa na-kala, aŋ leŋ dɩ nɩaa bɩra sɩ́ ba wɩaa liisu tinteeŋ lɛ.

¹⁶ Baala deeŋ-na bɩ bɩɩnɛ dɩ ʋ ŋaa zile wɩɩ nʋʋ lɛ. Ʋ to naasɩŋ aa dɔgɩsɛ summoo arɩ nɩalɩŋ sɩ bɩ ba tɩtɩa lɛ wuo pɛ arɩ nɩalɩŋ nandaasɩŋ sɩ yʋɔra nɛ a kpʋkpʋba.

¹⁷ Ʋ cho nɩaa lɛ kalɩba hɛnɩŋ. Leŋ dɩ kalɩbɩna-la gʋra dii ʋ tɩtɩa. Ʋ bɩ Wɩɩ-zɔŋ sʋla pɩpɩ nʋʋ. Sɩ́ leŋe dɩ ʋ ma na wʋzɔŋ.

¹⁸ Bʋa na-kala lɛ nɛ ʋ kalɩba hɩhɛ nɩaa lɛ. Leŋ dɩ kalɩbɩna-la gʋra wurisu a nagɛ lɩɩŋ a jʋʋ kɛŋ ʋ haŋgbelee a nagɛ nʋʋŋ.

¹⁹ Leŋ dɩ ʋ nagɛ gɛrɩŋ a tɔʋ, a nagɛ damɛrɛ, a vɔɔ ʋ tɩŋa bʋa na-kala.

²⁰ La Tɩɩna, joŋ wɩalɩŋ tɩtɩa a tiŋ nɩalɩŋ sɩɩ chei mɩ yɩrɩŋ, nɩalɩŋ sɩɩ bʋl wʋbɔŋŋɔɔ mɩ lɛ.

²¹ Ama ŋ-na La Tɩɩna Wɩɩjarɩbakɔ, tɩŋ ŋ yɩrɩ zɔmʋŋ wɩaa a kɛmmɛ woruŋ. Ŋ sɩ cho nɩaa a ŋɩŋaa wʋzɔŋŋɔɔ ba lɛ, laamɛ ta.

²² Mɩ ŋaa summu nɛ, mɩ bɩ mɩ tɩtɩa lɛ wuo pɛ. Mɩ tʋɔŋ kala chaasa chei nɛ.

²³ Mɩ kala yʋɔla dɛrɛ nɛ a nagɛ daaliimiŋ sɩ yie lɛl ŋɩɩ dɩdaanɩŋ, a nagɛ peliŋ sɩ joŋ hɔbɔ kaa viiri.

²⁴ Mɩ naadʋsʋŋ kala nɛ yʋɔra a tɩŋ mɩ sɩ bɩ kɩaa ka dii, mɩ kala jagɛ, aŋ ka haŋgbelee.

²⁵ Mɩ ŋaa mɩ dʋndɔŋŋɔɔ nɩmɔmɩɩ nɛ, dɩ ba nɛ namɛ, ba chugisi nyuŋ.

²⁶ Mɩ Tɩɩna Wɩa, pɛ mɩ lɛ. Laamɛ ta a tɩŋ ŋ sɩ cho nɩaa wɩaa.

²⁷ Leŋ dɩ mɩ dʋndɔŋŋɔɔ jɩŋ arɩ ŋ-na La Tɩɩna nɛ laamɛ ta.

²⁸ Dɩ ba nɛ kalɩbaa hɛ mɩ lɛ ma, ŋ-na jaŋ pɛ mɩ lɛ. Dɩ ba nɛ golloo yuomi, ba jaŋ dii hɩɩsɩŋ. Ama mɩ-na ŋ tɩntɩnna jaŋ jʋjʋɔsɛ.

²⁹ Leŋ dɩ mɩ dʋndɔŋŋɔɔ hɛ hɩɩsɩŋ lɛ, leŋ dɩ hɩɩsɩ-la tɔba a nagɛ gɛrɩŋ ba sɩ laala.

³⁰ Mɩ jaŋ suri mɩ niiŋ a chaasa lɔllɛ La Tɩɩna. Mɩ jaŋ dɛnnʋ dɩ ʋ nɩaa nɛ hilime.

³¹ Ʋ nɛ chɩna pɔ nɩalɩŋ sɩ bɩ ba tɩtɩa lɛ wuo pɛ, a laaba ta nɩalɩŋ sɩɩ kpʋba nɩsɩŋ lɛ.