WƖA YƖƖLAA 108 - WƖA TENIŊ

Devit sʋl Wɩa dɩ ʋ pɛ ʋ lɛ

¹ Wɩa, mɩ tʋɔbɩɩnaa chaasa chɩŋ nɛ, mɩ jaŋ du kɩaa a yɩɩ yɩɩlaa a dɛnnɩŋ arɩ mɩ tʋɔŋ kala.

² Mɩ jaŋ sii sɩɩpʋʋraa a joŋ cheŋ arɩ kɔnɛ a du.

³ La Tɩɩna, mɩ jaŋ dɛnnɩŋ dɩ nʋʋkala nɩɩ. Tinteyee tʋɔŋ, mɩ jaŋ yɩɩ yɩɩlaa a pɩŋ.

⁴ Ŋ chonuŋ yʋga nɛ a jɩla kieli wɩa-nyuŋ, ŋ wʋtɩtɩɩ ma jɩla yi wɩa-nyuŋ.

⁵ Wɩa, leŋ dɩ ŋ yɩrɩŋ sii kɩɩ wɩa-nyuŋ, dɩ ŋ tʋla su dʋnɩa lee-kala.

⁶ Laala ta arɩ ŋ doluŋ, a pɛ la lɛ dɩ wɩɩ sɩ́ nɩalɩŋ ŋ sɩ cho lɛ ŋaa.

⁷ Wɩa, ŋ dɩɩ-balɩŋ lɛ ŋ bʋla, “Mɩ tʋɔŋ jaŋ tɔrɛ dɩ mɩ kɛŋ taŋ-la ba sɩɩ yɩrɛ Sɛkɛm kaa kpaa, a kɛŋ fuonaa-la ba sɩɩ yɩrɛ Sʋkɔf ma kpaa muno muno.

⁸ Mɩ nɛ tɩɩ Gɩlɩad tinteeŋ, a tɩɩ Manasɛ tinteeŋ ma. Efirem nɛ ŋaa mɩ laalɩyuori nyunchu-gbaŋkogo, ka Juda ma ŋaa mɩ kuoru dantɩga.

⁹ Mʋab nɛ ŋaa gbaŋa-la mɩ sɩ kaa ŋaa lɩɩŋ a sʋsɔŋ mɩ naasɩŋ. Ɛdɔm tinteeŋ lɛ nɛ mɩ yie chaarɛ mɩ nɛntɛŋŋɛɛ, aŋ ŋaa laalɩyuori diiri-goŋ Fɩlɩsɩtɩa tɩŋŋaa lɛ.”

¹⁰ Kʋbɛɛ nɛ jaŋ kɛmmɛ mʋ tabal-la ba sɩ saa kɛrɛ golli? Kʋbɛɛ nɛ jaŋ laa mɩ sɩpaaŋ a kɛmmɛ mʋ Ɛdɔm tinteeŋ?

¹¹ Wɩa, ŋ nɛ vɩala ta, a bɩra bɩ la laalɩyuoroo kaa mʋmʋ laalɩŋ.

¹² Pɛ la lɛ dɩ la yuo dii la dʋndɔŋŋɔɔ, nuhuobiine pɛnɩŋ ŋaa pɛɩ nɛ.

¹³ Dɩ Wɩa nɛ chɩŋ la harɩŋ, la jaŋ yuo dii. Ʋ jaŋ yuo dii la dʋndɔŋŋɔɔ.