WƖA YƖƖLAA 107 - WƖA TENIŊ

Má lɔllɛ Wɩa a tɩŋ ʋ wɩaa sɩ zɔmɔ

¹ Má lɔllɛ La Tɩɩna, bɛɛ wɩaa ʋ wɩaa zɔmɔ, ʋ chonuŋ bɩ dɛrɛ.

² Ma nɩalɩŋ La Tɩɩna sɩ laa ta, ma maga dɩ ma bʋl ŋɩɩ nɛ a dɛnnʋ. Ma nɛ nɩalɩŋ ʋ sɩ laa ta ma dʋndɔŋŋɔɔ nɩsɩŋ lɛ,

³ ma nɩalɩŋ ʋ sɩ kaa lɩɩ wɩɩpɔsʋŋ, wɩɩjʋʋlʋŋ, wɩɩpɔsʋŋ nagʋa arɩ wɩɩpɔsʋŋ nadiiŋ tintee-wogusuŋ kʋ hɛ dɔŋɔ.

⁴ Ba dɔnsʋŋ gɔllɔ baarɛ tintee-hɩlɩŋ sɩ kɛŋ wulumuŋ lɛ nɛ, ba bɩ taŋ kala wombiiŋ na dɩ ba mʋ hɔŋ nɩmɛ.

⁵ Losuŋ arɩ lɩɩnyʋasʋŋ fa kɛmba nɛ, ba bɛsɩmɛ.

⁶ Wɩaa chaasa jʋʋba nɛ ba ŋmoo niiŋ pɩ La Tɩɩna, ʋ laaba ta ba hɛɛŋ lɛ.

⁷ Ʋ kɛmba joŋ wombiiŋ nɛ tegi tegi a mʋ tabal-la ba sɩ jaŋ hɔŋ.

⁸ Ʋ maga dɩ ba lɔllɛ La Tɩɩna a tɩŋ ʋ chonuŋ sɩ bɩ dɛrɛ, arɩ wʋkpuŋkperisi-la ʋ sɩ ŋaa pɩpɩ nuhuobiine wɩaa.

⁹ Nɩalɩŋ lɩɩnyʋasʋŋ sɩ kɛnɛ, ʋ pɩba lɩɩŋ nɛ ba nyʋa vɔgɛ. Nɩalɩŋ ma losuŋ sɩ kɛnɛ, ʋ yie pɩba kʋzɔŋŋɔɔ nɛ ba dii vɔgɛ.

¹⁰ Ma dɔnsʋŋ fa ŋaa dansarɩkaba nɛ a hɔŋ birimiŋ tʋɔŋ lim, ba kɛŋ chɔrʋmɔ vɔɔma, ma nɩna hɛɛŋ,

¹¹ bɛɛ wɩaa ba vɩa Wɩa sɩ kɩɩ kʋŋkala niiŋ wɩaa nɛ, a bɩ wɩalɩŋ ʋ sɩ daga ka to.

¹² Ŋɩɩ nɛ ʋ leŋ ba tɩŋ tɩntɩŋ-duoruŋ a kala yɛrɛ, a gɩgɛrɛ, ka nʋʋ tuo dɩ ʋ pɛ ba lɛ.

¹³ Wɩaa chaasa jʋʋba nɛ, ba ŋmoo niiŋ pɩ La Tɩɩna, ʋ laaba ta ba hɛɛŋ lɛ.

¹⁴ Ʋ kɛmba lɩɩ biriŋ lim-la tʋɔŋ, a kɛŋ ba chɔrʋmɔ-la kɛrɛ ta.

¹⁵ Ʋ maga dɩ ba lɔllɛ La Tɩɩna a tɩŋ ʋ chonuŋ sɩ bɩ dɛrɛ, arɩ wʋkpuŋkperisi-la ʋ sɩ ŋaa pɩpɩ nuhuobiine wɩaa.

¹⁶ Ʋ ŋmoo boi-baala-la kala ba sɩ kɛŋ kɔlɩɩŋ ŋaa lo nɛ, a bori hɔɔ-daa-doloo.

¹⁷ Ba dɔnsʋŋ mɩɩra bɩrɩmɛ nɩyaara a vɩa Wɩa niiŋ, ŋɩɩ leŋ nyanyalaa jʋʋba a tɩŋ ba wʋbɔŋŋɔɔ wɩaa.

¹⁸ Ba niiŋ kpʋa nɛ, ba bɩ kʋdiilii kala cho, aŋ ka ba naaŋ lilieŋi sʋʋŋ bʋa lɛ.

¹⁹ Wɩaa chaasa jʋʋba nɛ ba ŋmoo niiŋ pɩ La Tɩɩna, ʋ laaba ta ba hɛɛŋ lɛ.

²⁰ Ʋ niiŋ wʋbʋlaa nɛ vaarɛba, a laaba ta ba sʋʋŋ bʋa lɛ.

²¹ Ʋ maga dɩ ba lɔllɛ La Tɩɩna a tɩŋ ʋ chonuŋ sɩ bɩ dɛrɛ arɩ wʋkpuŋkperisi-la ʋ sɩ ŋaa pɩpɩ nuhuobiine wɩaa.

²² Ʋ maga dɩ ba kpʋ pʋsʋŋ a ŋaa Wɩɩsʋlʋŋ a lɔllʋ, a yɩɩ yɩɩlaa arɩ tʋɔtɔrʋŋ a dagɛ wɩalɩŋ ʋ sɩ ŋaa.

²³ Ba dɔnsʋŋ jʋʋ lɩɩŋ daborusuŋ nɛ, a gɔllɛ mʋgʋ-balɩŋ tʋɔŋ aa yallɛ bayalɩŋ.

²⁴ Ba na La Tɩɩna tɩntɩŋŋaa nɛ, wʋkpuŋkperisiŋ ʋ sɩ ŋaa Mʋgʋ-balɩŋ tʋɔŋ.

²⁵ Ʋ wʋbʋlaa nɛ leŋe pel-duoŋ lu, lɩɩ-peliŋ sii a kɛŋ mʋgʋ-balɩŋ vuvuugi.

²⁶ Lɩɩŋ daborusuŋ sii jɩjɩl wɩa-nyuŋ aŋ tutuu lɩɩŋ bʋbʋɔŋ, wɩaa lɔrɛ ba nandaasɩŋ yʋɔrɛ.

²⁷ Baa gɛrɛ a nagɛ nʋʋ sɩ nyʋa sɩnɩŋ bugi, ba wʋjɩmɩŋ kala ŋaa pɛɩ.

²⁸ Wɩaa chaasa jʋʋba nɛ, ba ŋmoo niiŋ pɩ La Tɩɩna, ʋ laaba ta ba hɛɛŋ lɛ.

²⁹ Ʋ nɛ leŋe pel-duoŋ arɩ lɩɩ-peliŋ kala sigili, ka mʋgʋ-balɩŋ fɩɛla pɩŋ.

³⁰ Ba tʋɔŋ fa tɔrɔ nɛ ʋ sɩ leŋe pel-la sigili, aŋ kɛmba mʋ yi lee-la ba sɩɩ mʋ.

³¹ Ʋ maga dɩ ba lɔllɛ La Tɩɩna a tɩŋ ʋ chonuŋ sɩ bɩ dɛrɛ, arɩ wʋkpuŋkperisi-la ʋ sɩ ŋaa pɩpɩ nuhuobiine wɩaa.

³² Dɩ nɩaa nɛ hilimi La Tɩɩna yɩrɩŋ lɛ, má leŋ dɩ ʋ yɩrɩŋ yɩrɛ kɩŋkɛŋ. Dɩ ma sɩpaalaaraa ma nɛ hilime, má dɛnnʋ.

³³ Ʋ nɛ leŋe fuonuŋ bɩrɩmɛ tintee-hɩlɩŋ, a ŋaa lɩɩ-bul-sɩaa tɔ.

³⁴ Ʋ nɛ leŋe tintee-la sɩma lɩɩ, bɛɛ wɩaa nɩalɩŋ sɩ hɔŋ nɩmɛ faa ŋaa wʋbɔŋŋɔɔ nɛ.

³⁵ Ʋ nɛ bɩra leŋe fuonuŋ pɩŋ tintee-hɩlɩŋ lɛ, a leŋ lɩɩŋ bubul tintee-hɩlɩɩ-la lɛ.

³⁶ Ʋ nɛ leŋe losumoo hɔŋ nɩmɛ, a saa ba jaŋ a jʋjʋʋ.

³⁷ Ba pɛrɛ bagɩsɩŋ arɩ tɩɩnɛnɛɛ bagɩsɩŋ nɛ, a na kʋdiilee arɩ tɩɩnɛnɛɛ woruŋ.

³⁸ Ʋ pɛ ʋ nɩaa lɛ ba pʋŋa yʋgɛ woruŋ, a leŋ ba pʋsʋŋ ma pʋŋa pɛ.

³⁹ Dɩ Wɩa nɩaa dʋndɔŋŋɔɔ nɛ yuo diiba a nyagɛba bil a dɔgɩsɛba, ba na hɛɛŋ ba tʋɔŋ chei, ŋɩɩ yie leŋ ba muuri nɛ.

⁴⁰ La Tɩɩna yie joŋ ʋ baanɩŋ a fɩɩsɛ nɩalɩŋ sɩ yuo diiba lɛ, a leŋ ba gɔllɔ baarɛ tintee-hɩlɩŋ lɛ.

⁴¹ Ama ʋ yie laa nɩalɩŋ sɩ bɩ ba tɩtɩa lɛ wuo pɛ ta nɛ ba hɛɛŋ lɛ, a leŋ ba dɩa nɩaa pʋŋa yʋgɛ a nagɛ piesee.

⁴² Tʋɔpʋl tɩŋŋaa na wɩɩŋ deeŋ nɛ ba tʋɔŋ tɔrɛ, ka nɩbɔŋŋɔɔ niiŋ jʋʋ kpʋrʋŋ.

⁴³ Nʋʋ na-kala sɩ jɩŋ wɩaa, ʋ tɩɩna joŋ wɩaa deemba hɛ ʋ tʋɔŋ lɛ, a kɛŋ La Tɩɩna chono-la sɩ bɩ dɛrɛ wɩaa bɩbɩɩnɛ.