WƖA YƖƖLAA 105 - WƖA TENIŊ

Wɩa arɩ ʋ nɩaa

¹ Má lɔllɛ La TƖƖNA, má yɩrɛ ʋ yɩrɩŋ. Má leŋ dɩ tinteyee nɩaa nɩɩ wɩalɩŋ ʋ sɩ ŋaa.

² Má yɩɩ yɩɩlaa a dɛnnɛ La TƖƖNA, má bʋl wʋkpuŋkperisi-la kala ʋ sɩ ŋaa a pɩ nɩaa.

³ Má leŋ dɩ ma tʋɔŋ tɔrɛ a tɩŋ ma sɩ ŋaa ʋ nɩaa, ma nɩalɩŋ kala sɩ ŋaa ʋ nɩaa, má jʋjʋɔsɛ.

⁴ Má joŋ ma yɩɛlaa hɛ La TƖƖNA doluŋ lɛ, aŋ chɩchɛʋ bʋa na-kala.

⁵ Má liisi wʋkpuŋkperisi-la arɩ wʋduoru-la ʋ sɩ ŋaa arɩ ŋɩɩ ʋ sɩ dii sarɩya ʋ bʋa lɛ,

⁶ ma-na Abɩraham sɩ ŋaa ʋ tɩntɩnna doho nɩaa, Jekɔb biiriŋ, nɩalɩŋ ʋ sɩ lɩɩsa.

⁷ Ʋ nɛ La TƖƖNA Wɩa, ʋ niiŋ wɩaa hɛ dʋnɩa lee-kala nɛ.

⁸ Ʋ bɩ nii-la ʋ sɩ bile ʋ dɩ ma pɛgɛ ka yʋ, nii-la sɩ hɛ nɩmɛ a kaa mʋ wuu,

⁹ nii-la ʋ sɩ bile ʋ dɩ Abɩraham arɩ Aɩzɩk pɛgɛ.

¹⁰ Ʋ leŋe nii-la chɩŋ nɛ a pɩ Jekɔb, a leŋ ʋ ŋaa nii sɩ hɛ ʋ dɩ Iziral pɛgɛ a kaa mʋ wuu.

¹¹ Ʋ sɩ, “Mɩ jaŋ joŋ Kɛnaŋ tinteeŋ pɩŋ dɩ ʋ ŋaa ŋ kʋŋ.”

¹² Bʋa-la lɛ ba fa bɩ wɩɩ maga, ba chaasa muuri nɛ a ŋaa nʋhʋɔra ma tintee-la lɛ.

¹³ Ba fa gɔllɔɔ baarɛ nɛ, a lɩɩ tinteeŋ a mʋ tinteeŋ dɔŋɔ.

¹⁴ Ʋ bɩ leŋe nʋʋkala dɔgɩsɛba, a tɩŋ ba wɩaa, ʋ dɔgɩsɛ kuoroo nɛ.

¹⁵ Ʋ sɩ, “Má pʋpɔ má sɩ́ mɩ nɩaa mɩ sɩ lɩɩsa digu, a sɩ́ mɩ wʋlaabʋllaa ma wʋbɔŋ kala ŋaa.”

¹⁶ La Tɩɩna leŋe ba kʋduuloo bɩ wasa, losuŋ jʋʋ ba tinteeŋ kala.

¹⁷ Ama Wɩa sɩɩ chɛ dɩ ʋ laa ʋ nɩaa ta, ʋ laa sɩpaaŋ ta nʋʋ kʋbala baa yɩrɛ Josɛf. Ba kɛnʋ yallɛ nɛ a nagɛ yomo, ba kaa mʋ Ijipiti tinteeŋ.

¹⁸ Ba joŋ chɔrʋmɔɔ a vɔɔ ʋ naasɩŋ a joŋ baŋkoguluŋ ma hɛ ʋ baŋŋaa lɛ,

¹⁹ a kaa mʋ yi bʋa-la lɛ wɩɩ-la Josɛf fa sɩ bʋla arɩ ʋ jaŋ ŋaa, sɛnɛ sɩ kʋ ŋaa wʋtɩtɩɩ. Wɩɩ-la La Tɩɩna sɩ daga sɛnɛ kʋ ŋaa wʋtɩtɩɩ nɛ.

²⁰ Ŋɩɩ nɛ kuoru-la sɩɩ beŋ tintee-la leŋ ba lɩɩsʋ, kuoru-la sɩɩ beŋ tinteyee pa wombiiŋ ba lɩɩsɛ Josɛf ta dansarɩka lɛ.

²¹ Ʋ joŋu hɛ ʋ bibeŋ ʋ kuoru dɩa a ŋaa nʋʋ sɩɩ beŋ kʋŋ na-kala ʋ sɩ kɛnɛ.

²² Ʋ leŋe Josɛf bibeŋ ʋ tɩntɩnnɩ-hɩasɩŋ arɩ ŋɩɩ ʋ sɩɩ chɛ nɛ a dɩdagɛ ʋ nɩhɩasɩŋ ma wʋjɩmɩŋ.

²³ Ŋɩɩ nɛ Jekɔb arɩ ʋ dɩa nɩaa sii mʋ Ijipiti, a hɔŋ Ham tinteeŋ lɛ, a ŋaa nʋhʋɔraa.

²⁴ La Tɩɩna leŋ ʋ nɩaa chaasa pʋŋ woruŋ, a leŋ ba kɛŋ doluŋ kɩɩ ba dʋndɔŋŋɔɔ.

²⁵ Ʋ leŋ Ijipiti tɩŋŋaa bɛrɛba, a vʋʋra sii chɩŋ ʋ tɩntɩnnaa lɛ.

²⁶ Ŋɩɩ nɛ La Tɩɩna lɩɩsɛ ʋ tɩntɩnna Mosis a pɛ Arɔŋ lɛ, a tɩmba.

²⁷ Ba mʋ, Wɩa leŋ ba ŋaa wʋkpuŋkperisiŋ arɩ wʋmagɩlaa Ijipiti tinteeŋ lɛ.

²⁸ Ijipiti tɩŋŋaa sɩ vɩa dɩ ba to Wɩa niiŋ, ʋ leŋ birimiŋ tɔ ba tinteeŋ.

²⁹ Ʋ bɩra leŋ ba fuonuŋ lɩɩŋ kala bɩrɩmɛ chalɩŋ, a leŋ ba chenfilee sʋʋ.

³⁰ Ba tinteeŋ kala tɔ arɩ yɩŋŋaa, a paala su ba kuoroo dɩɩ-pɩnaa ma.

³¹ Wɩa leŋ nanchʋɔsʋŋ arɩ dɩnsɩŋ kʋ su ba tinteeŋ kala.

³² Ʋ leŋe ba duonuŋ mɩɩra bɩrɩmɛ duoŋ-tabɩaa nɛ a tele su ba tinteeŋ, ka taŋ ma lɩgɩsa su leriŋ kala.

³³ Ʋ chei ba girep tɩɩsɩŋ arɩ tutogusuŋ, a chei ba tinteeŋ tɩɩsɩŋ.

³⁴ Wɩa bɩra leŋe hɔbɔ kʋ tɔ ba tinteeŋ kala nɛ, nʋʋ bɩ jaŋ wuo dɩɩsɛba,

³⁵ a dii pɩpaa na-kala sɩ hɛ ba tinteeŋ lɛ, a dii ba kʋduuloo ma.

³⁶ Ŋɩɩ nɛ ka Wɩa kpʋ Ijipiti tɩŋŋaa hambolibii bumbumba kala, ba bapʋɔsɛ biiriŋ.

³⁷ Ʋ kɛŋ Iziral tɩŋŋaa kʋ lɩɩ Ijipiti tinteeŋ lɛ, dɩ ba chʋŋ hɔpʋla arɩ sɛlɩmɛ. Ba doho doho-la kala tʋɔŋ kʋŋ bɩ wɩɩ jʋa.

³⁸ Ijipiti tɩŋŋaa tʋɔŋ fa tɔrɔ nɛ ba sɩ lɩa, bɛɛ wɩaa fawʋllʋŋ fa kɛmba nɛ a tɩŋ Iziral tɩmma-la wɩaa.

³⁹ Wɩa fa leŋe duoŋ-bɩlɩmbaanɩŋ nɛ tɔ hɛ ʋ nɩaa lɛ, aŋ leŋ nyiniŋ ma laa ba sɩpaaŋ tɩtaŋɩŋ.

⁴⁰ Nɩalɩŋ sɩ pɩɛsa a chɩchɛ kʋdiilee, ʋ pɩba jɩmpɩrɩwɩɩba. Ʋ leŋe kʋdiilee lɩɩ Wɩa-jaŋ a kʋ tuu nɛ ba dii vɔgɛ.

⁴¹ Ʋ leŋe bʋŋ yɛrɛ nɛ, lɩɩŋ gbu lɩɩ a pɩpɛllɛ tintee-hɩlɩŋ lɛ a nagɛ fuoŋ.

⁴² Ʋ fa liise yi nii-la ʋ sɩ hɛ lɛ nɛ, nii-la sɩ hɛ ʋ dɩ ʋ tɩntɩnna Abɩraham pɛgɛ.

⁴³ La Tɩɩna sɩ kɛŋ ʋ nɩaa kaa kʋ lɩɩ Ijipiti tinteeŋ lɛ, ba tʋɔŋ tɔrɔ nɛ ba yɩyɩɩ yɩɩlaa.

⁴⁴ Ʋ joŋ tinteyee dɔnsʋŋ nɩaa tinteeŋ arɩ ba bagɩsɩŋ kɩaa kala a pɩba,

⁴⁵ dɩ ŋɩɩ leŋ dɩ ba to wɩalɩŋ ʋ sɩ daga, a kɛŋ wombie-la ʋ sɩ bile dɩ ba tuto tɩtɩŋ. Má dɛnnɛ La Tɩɩna.