WƖA YƖƖLAA 102 - WƖA TENIŊ

Tʋɔ-chei tɩɩna Wɩɩsʋlʋŋ.

¹ La Tɩɩna, jegile nɩɩ mɩ teeŋ. Dɩ mɩ nɛ ŋmoo niiŋ a sʋlʋŋ, pɛ mɩ lɛ.

² Dɩ wɩaa nɛ jʋʋmɛ, sɩ́ harɩŋ joŋo yɩamɛ. Dɩ mɩ nɛ bunso pɩŋ, jegile nɩɩ a guu pɛ mɩ lɛ.

³ Mɩ tapʋlaa ka dɛrɛ nɛ, a nagɛ nyʋɔsʋŋ sɩɩ lɛl. Mɩ yaraa kala didii a nagɛ nyiniŋ.

⁴ Mɩ yaraa kala ŋmaama nɛ a nagɛ yaŋ sɩ hɩla. Mɩ niiŋ kpʋa nɛ, mɩ bɩ kʋdiilee cho.

⁵ Mɩ hʋʋna bɩ dɛrɛ, mɩ kala jagɛ aŋ ka haŋgbelee.

⁶ Mɩ nagɛ diibie sɩ hɛ tintee-hɩlɩŋ lɛ nɛ, a nagɛ hajaaŋkuŋkuŋ dʋndʋŋa sɩɩ jʋʋ jikpeeŋ.

⁷ Mɩ bɩ doŋ ka pɩŋ, mɩ nagɛ zaarɩ-kokobie dʋndʋŋa sɩ sagɛ dɩa nyuŋ nɛ.

⁸ Mɩ dʋndɔŋŋɔɔ tʋʋsɛmɛ ŋɩɩ nɛ wɩa tuu jʋʋ. Nɩalɩŋ sɩɩ mɔŋ mɩ lɛ mɩɩra kɛŋ mɩ yɩrɩŋ ŋmɩɛsaa hɛ nɩaa lɛ nɛ.

⁹ Tʋɔrʋŋ nɛ mɩɩra ŋaa mɩ kʋdiilee, mɩ lɩɩ-nyʋalʋŋ kala su arɩ sɩlɩɩrɩŋ.

¹⁰ A tɩŋ ŋ baanɩŋ sɩ sii kɩŋkɛŋ wɩaa, ŋ jommi yuo ta nɛ.

¹¹ Mɩ tapʋlaa ka dɛrɛ nɛ, a nagɛ daaliimiŋ sɩ yie lɛl ŋɩɩ dɩdaanɩŋ. Mɩ yaraa kala ŋmaamɛ a nagɛ yaŋ sɩ hɩla.

¹² Ama ŋ-na La Tɩɩna, ŋ nɛ kuoro a kaa mʋ wuu. Nɩalɩŋ ma ba ha sɩ bɩ lʋla jaŋ yɩrɛ ŋ yɩrɩŋ.

¹³ Ŋ jaŋ sii a fá Zaayɔŋ nɩaa nenige, bɛɛ wɩaa bʋa-la sɩ maga dɩ ŋ ŋaa ŋɩɩ yie nɛ, bʋa-la ŋ sɩ daga yie nɛ.

¹⁴ La-na ŋ tɩntɩnnaa cho taŋ-la, arɩ ba sɩ cheyu ʋ pɩŋ jikpeeŋ ma kala. Ʋ wɩaa kɛŋ nenige nɛ a pɩla.

¹⁵ Tinteyee nɩaa jaŋ fá La Tɩɩna, dʋnɩa kuoroo kala jaŋ zilu a tɩŋ ʋ tʋla wɩaa.

¹⁶ La Tɩɩna jaŋ paa Zaayɔŋ wasa saa, a dagɛ ʋ doluŋ.

¹⁷ Ʋ jaŋ jegile nɩɩ nɩalɩŋ sɩ bɩ ba tɩtɩa lɛ wuo pɛ Wɩɩ-chʋɔlʋŋ, ʋ bɩ jaŋ vɩa ba sʋla.

¹⁸ Má ŋmʋnsɛ wɩɩŋ deeŋ bil nɩalɩŋ ba maachie sɩ jaŋ lʋl lɛ, dɩ nɩalɩŋ ba ha sɩ bɩ lʋla sii a dɛnnɛ La Tɩɩna.

¹⁹ La Tɩɩna hɛ ʋ jaŋ lɛ nɛ dɩ-bolii, aŋ bibeŋ dʋnɩa,

²⁰ a nɩɩ nɩalɩŋ ba sɩ kaa tɔ dɩa huuno, a laa nɩalɩŋ ba sɩɩ chɛ dɩ ba kpʋ ta.

²¹ Nɩaa jaŋ heele bʋl wɩalɩŋ La Tɩɩna sɩ ŋaa Zaayɔŋ lɛ, aŋ dɛnnʋ Jerusalɛm lɛ,

²² dɩ tinteyee nɩaa nɛ kʋ hilimi dɩ ba chʋɔlʋ.

²³ Mɩ ha ŋaa bapʋɔsɩ-bie nɛ, ka La Tɩɩna leŋ mɩ pʋgʋmɛ. Ʋ keri mɩ tapʋlaa ta nɛ.

²⁴ Ŋɩɩ nɛ mɩ bʋl, “Wɩa, sɩ́ leŋe dɩ mɩ buuro sʋʋ, dɩ mɩ tapʋlaa bɩ yie. Ŋ nɛ hɛ nɩmɛ a kaa mʋ wuu.

²⁵ Dɩ-suomuŋ kala, ŋ nɛ bil tinteeŋ gentine, ŋ nɛ ŋaa wɩa-nyuŋ ma.

²⁶ Ba jaŋ lɛl, ama ŋ-na jaŋ hɛ nɩmɛ, ba kala jaŋ kɔsɛ a nagɛ gɛnnɩŋ sɩɩ kɔsɛ ŋɩɩ. Ba jaŋ bɩrɩmɛ a nagɛ gɛrɩ-zɔmʋŋ sɩ lɩa, ba jaŋ jomba yuo ta.

²⁷ Ama ŋ-na bɩ jaŋ kɔ dɩ ŋ bɩrɩma. Ŋ jaŋ hɛ nɩmɛ a kaa mʋ wuu.

²⁸ La ŋaa ŋ tɩntɩnnaa nɛ, ŋ jaŋ pɔ la biiriŋ arɩ ba doho nɩaa dɩ wɩɩkala sɩ́ ba walɩmʋ.”